Health Tips : રવિવારની રજામાં પણ સોમવારનું ટેન્શન કેમ રહે છે? ઓફિસના ડરને દૂર કરી વર્ક-લાઈફ બેલેન્સ જાળવવાની સરળ રીતો
છેલ્લું અપડેટ : 13 May 2026
ઘણા લોકોને ઓફિસ જવું ગમે છે. તેઓ નિયમિત ઓફિસ જઈને પોતાનું કામ સમયસર પૂરું કરવામાં માહિર હોય છે. આવા લોકો વીક-ઓફ (રજા) પૂરી થવાની રાહ જોતા હોય છે, જેથી સોમવારથી ફરી નવા મૂડ અને ફ્રેશ માઇન્ડ સાથે ઓફિસ જઈ શકે. પરંતુ, કેટલાક લોકો એવા પણ છે જેમને ઓફિસ જવું કંટાળાજનક લાગે છે. તેઓ મજબૂરીમાં કામ કરે છે કારણ કે ઘર ચલાવવું છે અને પોતાના ખર્ચા ઉઠાવવા છે. સોમવાર શરૂ થતાની સાથે જ આ લોકો ફરી રજા ક્યારે આવશે તેની રાહ જોતા હોય છે. શનિવાર વીત્યા પછી જ્યારે રવિવાર આવે છે, ત્યારે તેઓ આખો દિવસ એ જ વિચાર્યા કરે છે કે કાલથી એટલે કે સોમવારથી ફરી ઓફિસ, કામનું દબાણ અને ટેન્શન શરૂ થઈ જશે. ઓફિસ જવાના આ ડર અથવા વિચારને ‘સંડે સ્કેરીઝ’ (Sunday Scaries) નામ આપવામાં આવ્યું છે. ચાલો જાણીએ શું છે આ 'સંડે સ્કેરીઝ' અને કેમ કેટલાક લોકોને રવિવારથી જ સોમવારે ઓફિસ જવાનું ટેન્શન સતાવવા લાગે છે?
શું છે ‘સંડે સ્કેરીઝ’?
‘સંડે સ્કેરીઝ’ એવો શબ્દ છે જેનો ઉપયોગ તે બેચેની, તણાવ કે એન્ઝાયટી માટે કરવામાં આવે છે જે ઘણા લોકોને રવિવાર પૂરો થવાની સાથે અનુભવાય છે. જેમ જેમ સોમવાર નજીક આવે છે, તેમ મગજમાં ઓફિસ, કામનું ભારણ, મીટિંગ્સ, ડેડલાઈન અને જવાબદારીઓની ચિંતા વધવા લાગે છે.
આ સમસ્યા કેમ થાય છે?
ઘણા લોકો માટે વીકએન્ડ આરામ અને આઝાદીનો સમય હોય છે, પરંતુ રવિવારની સાંજ આવતા જ મગજ ફરીથી કામકાજના રૂટિનમાં પરત ફરવા લાગે છે. આ ફેરફારને કારણે તણાવ અનુભવાય છે.
તેના પાછળના કેટલાક સામાન્ય કારણો
- ઓફિસનું વધુ પડતું દબાણ.
- કામથી અસંતોષ.
- સોમવારની મીટિંગ કે ટાર્ગેટનું ટેન્શન.
- વર્ક-લાઈફ બેલેન્સ બગડવું.
- પૂરતો આરામ ન મળવો.
- નોકરીને લઈને અસલામતી કે ચિંતા.
સંડે સ્કેરીઝના સામાન્ય લક્ષણો
- રવિવારની સાંજે ઉદાસી કે ગભરામણ થવી.
- ઊંઘ બરાબર ન આવવી.
- પેટમાં બેચેની કે ભારેપણું લાગવું.
- મૂડ ખરાબ રહેવો.
- સતત સોમવાર વિશે વિચાર્યા કરવું.
- થાક કે ચિડચિડાપણું અનુભવવું.
શું આ સામાન્ય છે?
થોડી ચિંતા અનુભવવી સામાન્ય ગણાય છે, પરંતુ જો આ દર અઠવાડિયે ખૂબ વધી જાય અને માનસિક સ્વાસ્થ્ય, ઊંઘ કે રોજિંદા જીવન પર અસર કરે, તો તેને અવગણવી જોઈએ નહીં.
સંડે સ્કેરીઝમાંથી રાહત મેળવવાના સરળ ઉપાયો
રવિવારને પૂરો ‘વર્ક ડે’ ન બનાવો: વીકએન્ડમાં થોડો આરામ કરો, શોખ પૂરા કરો અથવા પરિવાર સાથે શાંતિથી સમય વિતાવો. ઓફિસના વિચારો મગજમાંથી કાઢી નાખો.
સોમવારની તૈયારી પહેલેથી કરી લો: કપડાં, જરૂરી કામ કે ટુ-ડુ લિસ્ટ (To-do list) અગાઉથી તૈયાર રાખવાથી તણાવ ઓછો થઈ શકે છે.
પૂરતી ઊંઘ લો: રવિવારની રાત્રે મોડે સુધી જાગવાથી સોમવાર વધુ મુશ્કેલ લાગી શકે છે.
સ્ક્રીન ટાઈમ ઘટાડો: સૂતા પહેલા સતત ઈમેલ કે ઓફિસ ચેટ જોવાથી એન્ઝાયટી વધી શકે છે.
રિલેક્સિંગ રૂટિન બનાવો: હળવું ચાલવું, મ્યુઝિક, યોગ કે મેડિટેશન મદદરૂપ થઈ શકે છે.
નિષ્ણાતની સલાહ લો: જો સતત તણાવ, ગભરામણ કે કામનો ડર વધી જાય, તો માનસિક સ્વાસ્થ્ય નિષ્ણાત (Psychologist) ની સલાહ લેવી ઉપયોગી સાબિત થઈ શકે છે.
નોંધ : આ આર્ટિકલ તમને જાગૃત કરવાના હેતુથી લખવામાં આવ્યો છે.
