જમ્યા પછી કેમ આવે છે ગાઢ ઊંઘ? જાણો તેની પાછળનું સાચું વૈજ્ઞાનિક કારણ!
છેલ્લું અપડેટ : 11 Aug 2026
જમ્યા પછી ઘણા લોકોને ભારે આળસ કે ઊંઘ આવવા લાગે છે. ખાસ કરીને બપોરે કે પેટ ભરીને જમ્યા પછી આવું વધારે અનુભવાય છે. કેટલીકવાર આ શરીરની સામાન્ય પ્રક્રિયા હોય છે, પરંતુ જો આના કારણે રોજના કામ પર અસર પડવા લાગે તો તેને નજરઅંદાજ ન કરવી જોઈએ.
જમ્યા પછી કેમ ઊંઘ આવે છે?
ડોક્ટરના જણાવ્યા અનુસાર, જમ્યા પછી ઊંઘ આવવાનું મુખ્ય કારણ ખોરાકનું પ્રમાણ અને તેમાં રહેલા પોષક તત્વો છે.
કાર્બોહાઈડ્રેટ્સ: ભાત, રોટલી, પાસ્તા અને બટાકા જેવી કાર્બોહાઈડ્રેટ્સ યુક્ત વસ્તુઓ ખાધા પછી શરીરમાં બ્લડ સુગર અને ઈન્સ્યુલિનના સ્તરમાં ફેરફાર થાય છે, જેનાથી સુસ્તી અનુભવાય છે.
પ્રોટીન: ઈંડા, દાળ અને મીટ જેવા પ્રોટીન યુક્ત ખોરાકમાં ‘ટ્રિપ્ટોફેન’ (Tryptophan) નામનું અમીનો એસિડ હોય છે. તે શરીરમાં એવા કેમિકલ્સ બનાવે છે જે ઊંઘ અને આરામ સાથે જોડાયેલા હોય છે.
ભારે ખોરાક: વધુ પડતું જમવાથી શરીરની મોટાભાગની ઊર્જા પાચનક્રિયામાં વપરાઈ જાય છે, જેથી શરીરમાં ભારેપણું અને આળસ આવે છે.
અપૂરતી ઊંઘ: રાત્રે ઊંઘ પૂરી ન થઈ હોય તો પણ બપોરે જમ્યા પછી વધુ આળસ આવે છે.
આળસ અને ઊંઘથી બચવા શું કરવું?
સંતુલિત આહાર: એકસાથે ખૂબ વધારે ખાવાને બદલે થોડું થોડું જમો. ખોરાકમાં શાકભાજી, કઠોળ, અનાજ અને પ્રોટીનનો યોગ્ય માત્રામાં સમાવેશ કરો.
ગળ્યા ખોરાકથી બચો: વધુ પડતી મીઠી અને પ્રોસેસ્ડ વસ્તુઓ ખાવાનું ટાળો.
હળવુ ચાલવું: જમ્યા પછી તરત સૂવાને બદલે થોડીવાર હળવું વોક (ચાલવું) કરવું ફાયદાકારક છે.
પૂરતી ઊંઘ અને પાણી: દિવસભર પૂરતું પાણી પીઓ અને રાત્રે 7-8 કલાકની પૂરતી ઊંઘ લો.
