માત્ર 45 સેકન્ડમાં થઈ શકે છે બાળકોનું અપહરણ! સુરક્ષિત રહેવા માટે જરૂર શીખવો આ 5 સેફ્ટી રૂલ્સ

કોઈ બાળકનું અપહરણ કરવું એ અસામાજિક તત્વ અને ચાલાક લોકો માટે માત્ર થોડી જ સેકન્ડોની રમત હોય છે. જરાક ચૂક થાય અને એક બાળક સાથે આખો પરિવાર બરબાદ થઈ જાય છે. પરંતુ તમારી થોડીક જાગરૂકતા તમારા બાળકને હંમેશાં સુરક્ષિત રાખી શકે છે. જેમ તમે તમારા બાળકને સંસ્કાર શીખવો છો, અલગ-અલગ પ્રવૃત્તિઓમાં ભાગ લેતા શીખવો છો, તે જ રીતે બાળકને સુરક્ષિત રહેવાની બાબતો પણ ચોક્કસ શીખવવી જોઈએ. જ્યારે બાળકો મોટા થવા લાગે છે, ત્યારે તેમને શાળાએ મોકલવાની સાથે-સાથે તમે પાર્ક કે સોસાયટીમાં રમવા માટે મોકલો છો અને તે એકલા જ આસપાસની જગ્યાઓ શોધખોળ કરે છે. આવા સંજોગોમાં, મોટા થઈ રહેલા આ બાળકોને આ 5 બાબતો શીખવવાથી તેમની સુરક્ષિત રહેવાની શક્યતા જાય છે. જાણો અહીં આ સેફ્ટી સાથે જોડાયેલા આ 5 નિયમો, જે બાળકને અવશ્ય શીખવવા જોઈએ.

બાળકોને જરૂર શીખવો આ 5 નિયમો

બાળકની સુરક્ષા માટે આ 5 નિયમોની જાણકારી હોવી ખૂબ જ જરૂરી છે

1- ફોટો રૂલ (ફોટો પાડવાનો નિયમ)

દર અઠવાડિયે તમારા બાળકનો એક ફોટો જરૂર પાડો. બાળકો દરરોજ મોટા થાય છે અને તેના દેખાવમાં ફેરફાર થતો રહે છે. બાળકની ઊંચાઈ કેટલી છે, કોઈ નવો નિશાન છે કે બાળકે શું પહેર્યું છે, આ બધી બાબતો ફોટામાં સ્પષ્ટ દેખાઈ જાય છે. જો દુર્ભાગ્યવશ બાળક ખોવાઈ જાય અને ફોટો છ મહિના જૂનો હોય, તો પોલીસ એવા બાળકને શોધે છે જે હવે તેવો દેખાતો જ નથી. એટલા માટે 'ફોટો રૂલ' દરેક વાલીએ ફોલો કરવો જોઈએ.

2- ભોળવતા લોકોથી દૂર રહેવું

બાળકોને ચોક્કસ શીખવો કે જે લોકો અલગ-અલગ વાતો કરે, તેમનાથી હંમેશાં દૂર રહેવું. બાળકને હંમેશાં યાદ કરાવો કે સાચા અને સારા વડીલો ક્યારેય નાના બાળકો પાસે મદદ માંગતા નથી. કોઈ અંકલ-આન્ટી અથવા કોઈપણ વડીલ એમ કહે કે મારા પપ્પી (કૂતરાનું બચ્ચું) કે બિલાડીને શોધવામાં મદદ કરી દો, અથવા એમ કહે કે મારો સામાન ગાડી સુધી પહોંચાડી દો, ચાલો ચોકલેટ અપાવું કે એમ કહે કે મમ્મીએ બોલાવ્યા છે ચાલો હું મૂકી આવું, તો આવા લોકોથી દૂર રહેવું. સાચા વડીલો જેને મદદની જરૂર હોય છે તેઓ પોતાના જ કદના કે મોટા લોકો પાસે મદદ માંગે છે. નાના બાળકો પાસે ક્યારેય મદદ માંગવામાં આવતી નથી.

3- બાથરૂમ રૂલ

પબ્લિક બાથરૂમમાં બાળકને ક્યારેય એકલું ન છોડો. બાથરૂમની આસપાસ ક્યારેય કેમેરા હોતા નથી અને ન તો કોઈ જોનાર હોય છે. આવા સંજોગોમાં બાળકની સુરક્ષા જોખમમાં મુકાઈ શકે છે. ચાલાક લોકોને માત્ર એ જ થોડી સેકન્ડોની જરૂર હોય છે જ્યારે બાળકની આસપાસ કોઈ ન હોય અને કોઈ જોનાર ન હોય.

4- બૂમો પાડવાની સાચી રીત

બાળકને મદદ માંગવાની અને બૂમો પાડવાની સાચી રીત ચોક્કસ શીખવો. બાળકને ફક્ત 'હેલ્પ-હેલ્પ' કે 'બચાવો-બચાવો' બૂમો પાડતા ન શીખવો. તેને શીખવો કે, 'આ મારા મમ્મી-પપા નથી'. બાળક જ્યારે આ રીતે બૂમો પાડે છે, ત્યારે જ આસપાસના લોકો બબાલ જોવાને બદલે મદદ માટે આગળ આવે છે.

5- બાળકને બહાર જવાનો રસ્તો બતાવો

બાળક સાથે બહાર જતી વખતે કોઈ થિયેટર, મોલ કે મેળામાં જાઓ, ત્યારે તેને એક્ઝિટ (બહાર જવાનો) રસ્તો જરૂર બતાવો. અને તેને સમજાવો કે જો અમારી સાથે છૂટા પડી જવાય, તો એક્ઝિટ વાળી જગ્યાએ જઈને ઊભું રહી જવું. અને કોઈ એવી આન્ટી પાસે મદદ માંગવી જેની સાથે બાળકો હોય. તેને કહેવું કે હું મારા મમ્મી-પપ્પાથી છૂટો પડી ગયો છું. બાળકોવાળી માતા ક્યારેય બાળકને એકલું નહીં છોડે.