VIDEO: પૂરવઠા ખેંચ અને ભાવ વધારો..., દેશમાં LPG ગ્રાહકોની સંખ્યામાં 62 લાખનો ઘટાડો
છેલ્લું અપડેટ : 27 Sept 2026
પશ્ચિમ એશિયામાં ચાલી રહેલા યુદ્ધની અસર હવે ભારતમાં LPG ક્ષેત્ર પર પણ જોવા મળી રહી છે. દેશમાં LPGના સપ્લાયમાં વિક્ષેપ અને ભાવમાં થયેલા વધારાને કારણે એપ્રિલથી ઓગસ્ટ દરમિયાન LPG ગ્રાહકોની સંખ્યામાં 62 લાખનો ઘટાડો નોંધાયો છે. એક દાયકાથી વધુ સમય બાદ પ્રથમ વખત LPG ગ્રાહકોની સંખ્યામાં આ પ્રકારનો ઘટાડો જોવા મળ્યો છે. સપ્ટેમ્બરની શરૂઆતમાં દેશમાં LPG ગ્રાહકોની સંખ્યા 32.77 કરોડ રહી હતી, જે એપ્રિલ પહેલાં 33.39 કરોડ હતી.
એક દાયકા બાદ LPG ગ્રાહકોની સંખ્યામાં ઘટાડો
દેશમાં છેલ્લા ઘણા વર્ષોથી LPG ગ્રાહકોની સંખ્યામાં સતત વધારો થઈ રહ્યો હતો. જોકે, પશ્ચિમ એશિયાના યુદ્ધને કારણે પુરવઠાની સ્થિતિ ખોરવાતા હવે આ વૃદ્ધિમાં પીછેહઠ જોવા મળી છે. એપ્રિલથી ઓગસ્ટ દરમિયાન કુલ LPG ગ્રાહકોની સંખ્યામાં 62 લાખનો ઘટાડો નોંધાયો છે.
આ ઘટાડો એક દાયકાથી પણ વધુ સમય બાદ પ્રથમ વખત જોવા મળ્યો છે. સપ્ટેમ્બરની શરૂઆતમાં LPG ગ્રાહકોની સંખ્યા ઘટીને 32.77 કરોડ થઈ હતી, જ્યારે એપ્રિલ પહેલાં આ સંખ્યા 33.39 કરોડ હતી.
યુદ્ધથી સપ્લાયમાં વિક્ષેપ, નવા જોડાણો પર અસર
પશ્ચિમ એશિયામાં યુદ્ધની સ્થિતિને કારણે LPGના આયાત અને પુરવઠા પર અસર પડી હતી. સપ્લાયમાં વિક્ષેપ સર્જાતા ઓઇલ કંપનીઓને નવા LPG કનેક્શન આપવાની પ્રક્રિયા પણ અટકાવવાની ફરજ પડી હતી. તેની સાથે LPGના ભાવમાં વધારો થવાનું દબાણ પણ સર્જાયું હતું.
સરકારી સૂત્રોના જણાવ્યા અનુસાર, યુદ્ધ પહેલાં ભારતની LPG આયાતમાં અખાતી વિસ્તારનો હિસ્સો લગભગ 90 ટકા હતો. ઈરાન સાથેના યુદ્ધને કારણે આ વિસ્તારમાંથી LPGના પુરવઠાને અસર થઈ હોવાનું જણાવાયું છે.
વર્ષોથી વધી રહેલા ગ્રાહકો હવે ઘટ્યા
છેલ્લા અનેક વર્ષોથી દેશમાં LPG ગ્રાહકોની સંખ્યામાં સતત વધારો નોંધાતો રહ્યો છે. નાણાકીય વર્ષ 2015-16ની શરૂઆતમાં દેશમાં LPG ગ્રાહકોની સંખ્યા 14.86 કરોડ હતી. ત્યારબાદ તેમાં સતત વધારો થતો રહ્યો અને વર્તમાન નાણાકીય વર્ષની શરૂઆતમાં આ આંકડો વધીને 33.39 કરોડ થયો હતો.
એટલે એક દાયકાના ગાળામાં LPG ગ્રાહકોની સંખ્યા બમણાથી પણ વધુ થઈ હતી. જોકે, પશ્ચિમ એશિયાની કટોકટી, પુરવઠામાં વિક્ષેપ અને ભાવવધારાની અસર વચ્ચે હવે પ્રથમ વખત ગ્રાહકોની સંખ્યામાં ઘટાડો નોંધાયો છે.
