VIDEO: "રાહુલ ગાંધી ભારતીય લોકશાહી પર કલંક છે!": રાષ્ટ્રપતિ ભવન વિવાદ પર કેન્દ્રીય મંત્રી પીયૂષ ગોયલનો હુમલો!
છેલ્લું અપડેટ : 10 Oct 2026
નવી દિલ્હી ખાતે રાષ્ટ્રપતિ સાથેની મુલાકાત બાદ લોકસભાના વિપક્ષી નેતા (LoP) રાહુલ ગાંધી દ્વારા કરવામાં આવેલા નિવેદનો પર કેન્દ્રીય મંત્રી પીયૂષ ગોયલે અત્યંત આકરા તેવર અપનાવ્યા છે. તેમણે રાહુલ ગાંધી અને વિપક્ષી નેતાઓના વલણની આકરી ટીકા કરતા આરોપ લગાવ્યો કે તેઓ સર્વોચ્ચ બંધારણીય પદ અને દેશના સુરક્ષા દળોનું ઘોર અપમાન કરી રહ્યા છે.
પીયૂષ ગોયલે જણાવ્યું કે, "રાહુલ ગાંધી તે બેઠકમાંથી બહાર આવ્યા અને કઈ સમજણના આધારે તેઓ એવો દાવો કરી રહ્યા છે કે રાષ્ટ્રપતિએ તેમના આરોપો સ્વીકારી લીધા છે તે સમજાતું નથી. જ્યારે રાષ્ટ્રપતિએ પુરાવા માંગ્યા, ત્યારે તેમણે અત્યંત વાંધાજનક ભાષામાં તેમની ટીકા કરી—જાણે તેઓ જે કંઈ કહે તે જ અંતિમ સત્ય હોય! દેશના સર્વોચ્ચ બંધારણીય હોદ્દા પ્રત્યે રાહુલ ગાંધી અને તેમની સાથે ગયેલા વિપક્ષી નેતાઓએ દર્શાવેલા ગેરવર્તન, ઘમંડ અને અસભ્યતાની હું સખત શબ્દોમાં નિંદા કરું છું."
રાષ્ટ્રપતિના બંધારણીય હોદ્દાનું મહત્વ સમજાવતા તેમણે ઉમેર્યું કે, "રાષ્ટ્રપતિ આપણા સશસ્ત્ર દળોના સર્વોચ્ચ સેનાપતિ (કમાન્ડર-ઇન-ચીફ) છે. તેમનું અપમાન કરીને રાહુલ ગાંધીએ દેશના દરેક સૈનિક અને સુરક્ષા દળોનું અપમાન કર્યું છે. રાહુલ ગાંધીએ આ દેશના રાષ્ટ્રપતિની, સશસ્ત્ર દળોના દરેક જવાનની અને ૧૪૦ કરોડ ભારતીયોની બિનશરતી માફી માંગવી જોઈએ. તેઓ વિદેશી શક્તિઓના એજન્ડાને આગળ ધપાવી રહ્યા છે અને દેશના ઉજ્જવળ ભવિષ્ય માટે નિષ્ઠાપૂર્વક કામ કરતી બંધારણીય સંસ્થાઓનું અપમાન કરી રહ્યા છે."
રાહુલ ગાંધી પર સીધો પ્રહાર કરતાં પીયૂષ ગોયલે અંતમાં કહ્યું કે, "હું માનું છું કે રાહુલ ગાંધી ભારતીય લોકશાહી પર કલંક સમાન છે અને તેમણે ભારતના બંધારણનું સંપૂર્ણ અનાદર કર્યું છે. માત્ર હાથમાં બંધારણ લઈને ફરવાથી તેનું સન્માન નથી થઈ જતું; તમારું વર્તન અને કાર્યો દર્શાવે છે કે તમે બંધારણનું કેટલું સન્માન કરો છો."
