'રામ મંદિરે ક્યારેય નહીં જાઉં', TMC સાંસદ કીર્તિ આઝાદના નિવેદનથી વિવાદ

તૃણમૂલ કોંગ્રેસ (TMC)ના સાંસદ કીર્તિ આઝાદે દિવાળીના અવસરે રામ મંદિરને લઈને આપેલા નિવેદનથી રાજકીય વિવાદ ઊભો થયો છે. તેમણે ભારતીય જનતા પાર્ટી (BJP) પર આકરા પ્રહાર કરતાં સ્પષ્ટ કહ્યું છે કે તેઓ અયોધ્યાના રામ મંદિરમાં ક્યારેય ગયા નથી અને ભવિષ્યમાં પણ ત્યાં જવાનો કોઈ ઇરાદો નથી. આઝાદે માતા સીતાની અગ્નિપરીક્ષા અને ત્યારબાદ ભગવાન રામ દ્વારા તેમના ત્યાગના પ્રસંગનો ઉલ્લેખ કરીને પણ સવાલો ઉઠાવ્યા હતા.

'કામાખ્યા દેવીની પૂજા કરું છું, તો શું હિંદુ નથી?'

કીર્તિ આઝાદે ભાજપ પર ધાર્મિક મુદ્દાઓનો રાજકીય લાભ માટે ઉપયોગ કરવાનો આરોપ લગાવ્યો હતો. તેમણે કહ્યું કે ભાજપ વારંવાર રામ મંદિરનો મુદ્દો ઉઠાવે છે, જ્યારે તેની સામે વસૂલી અને દાનની ચોરી જેવા આરોપો છે. આઝાદે વધુમાં કહ્યું હતું કે તેઓ કામાખ્યા દેવીની પૂજા કરે છે અને કામાખ્યા મંદિર સહિત ત્રિપુરા સુંદરી મંદિરે પણ જાય છે. તેમણે સવાલ કર્યો હતો કે જો કોઈ વ્યક્તિ કામાખ્યા દેવીની પૂજા કરે અને રામ મંદિરે ન જાય તો શું તેને હિંદુ ન ગણવો જોઈએ?

માતા સીતાની અગ્નિપરીક્ષાનો કર્યો ઉલ્લેખ

પોતાને માતા સીતાની જન્મભૂમિ સાથે જોડાયેલા ગણાવતાં આઝાદે રામાયણના પ્રસંગનો ઉલ્લેખ કર્યો હતો. તેમણે કહ્યું કે માતા સીતાએ અગ્નિપરીક્ષા આપી હતી અને તેમાં સફળ થયા હોવા છતાં તેમને ત્યજી દેવામાં આવ્યાં હતાં. આઝાદે સવાલ કર્યો હતો કે કોઈ વ્યક્તિ પોતાની પત્ની સાથે આવું વર્તન કેવી રીતે કરી શકે? પહેલાં અગ્નિપરીક્ષા લેવામાં આવે અને તેમાં સફળ થયા બાદ પણ પત્નીનો ત્યાગ કરવામાં આવે તે કેટલું યોગ્ય છે? તેમના આ નિવેદનથી ધાર્મિક અને રાજકીય ચર્ચા શરૂ થઈ છે.

'રામ મંદિરે નહીં, મથુરા જઈશ'

રામ મંદિર અંગે પોતાનું વલણ સ્પષ્ટ કરતાં કીર્તિ આઝાદે કહ્યું હતું કે તેઓ અયોધ્યાના રામ મંદિરે ક્યારેય નહીં જાય, પરંતુ મથુરા જશે. તેમણે ભાજપ પર દેશમાં રામરાજ્ય સ્થાપિત કરવામાં નિષ્ફળ રહેવાનો આરોપ લગાવ્યો હતો. આઝાદે ભાજપના શાસનને રાવણરાજ્ય ગણાવતાં કહ્યું હતું કે પાર્ટી પાસે રામ મંદિરના મુદ્દા સિવાય અન્ય કોઈ મુદ્દો નથી. નોંધનીય છે કે આ નિવેદન એવા સમયે આવ્યું છે જ્યારે સમાજવાદી પાર્ટીના પ્રમુખ અને ઉત્તર પ્રદેશના પૂર્વ મુખ્યમંત્રી અખિલેશ યાદવની 12 ડિસેમ્બરે અયોધ્યામાં રામ મંદિર અને હનુમાનગઢીની મુલાકાત લેવાની પ્રસ્તાવિત યોજના છે. ભાજપે અખિલેશ યાદવની આ મુલાકાતને ચૂંટણી પહેલાંનો રાજકીય પ્રયાસ ગણાવ્યો છે. કીર્તિ આઝાદના નિવેદનથી રામ મંદિર અને ધાર્મિક મુદ્દાઓને લઈને રાજકીય ચર્ચા વધુ તેજ બની છે.