Bihar News : ચૂંટણી મેદાનમાં ઉતરવાની તૈયારીમાં ભજન ગાયિકા મૈથિલી ઠાકુર, આ પાર્ટી માટે લડી શકે છે ચૂંટણી!
છેલ્લું અપડેટ : 07 Oct 2025
બિહાર વિધાનસભા ચૂંટણીમાં ભારતીય જનતા પાર્ટીની નજર ફિલ્મ સ્ટાર અને સિંગર પર છે. થોડા દિવસ અગાઉ ભોજપુરી સ્ટાર પવન સિંહની ભાજપમાં રિ-એન્ટ્રી થઈ. હવે જાણીતી ભજન ગાયિકા મૈથિલી ઠાકુર પણ ભાજપમાં જોડાય તેવી શક્યતા છે. મૈથિલી ઠાકુરે ભારતીય જનતા પાર્ટીની ટિકિટ પર ચૂંટણી લડવાની ઈચ્છા વ્યક્ત કરી છે.
ભાજપ મોકો આપે તો જરૂર ચૂંટણી લડીશ: મૈથિલી
મૈથિલી ઠાકુરે કહ્યું છે કે જો ભારતીય જનતા પાર્ટી તેમને મોકો આપે તો તે જરૂર ચૂંટણી લડશે. મૈથિલીએ કહ્યું છે, કે 'હું મારા ક્ષેત્રના લોકો માટે કામ કરવા માંગુ છું. દરભંગા અને મધુબની બંને મારા ઘર જેવા છે. જો ભાજપ મોકો આપે તો અલીનગર અથવા બેનીપટ્ટી વિધાનસભા બેઠકથી ચૂંટણી લડીશ. બિહારના વિકાસ માટે હવે યુવાનોએ જ આગળ આવવું જોઈએ.'
ભાજપના નેતાઓ સાથે કરી હતી બેઠક
ઉલ્લેખનીય છે કે ગઇકાલે જ મૈથિલી ઠાકુરે ભારતીય જનતા પાર્ટીના દિગ્ગજ નેતા નિત્યાનંદ રાય તથા ભાજપના પ્રભારી વિનોદ તાવડે સાથે બેઠક કરી હતી. જેની તસવીરો સોશિયલ મીડિયામાં ખૂબ વાઈરલ થઈ હતી. વિનોદ તાવડેએ કહ્યું હતું કે 1995માં લાલુ યાદવના શાસનમાં મૈથિલી ઠાકુરના પરિવારે બિહાર છોડવું પડ્યું હતું. હવે બદલાતા બિહારમાં તેમનો પરત ફરવાનો સમય આવી ગયો છે.
તમને જણાવી દઈએ કે મૈથિલી ઠાકુરની હજુ આ વર્ષે જ 25 વર્ષની થઈ છે. તે મિથિલા સંસ્કૃતિના લોકગીત માટે જાણીતી છે અને સોશિયલ મીડિયામાં મોટી ફેન ફોલોઈંગ ધરાવે છે.
