VIDEO: લવલી પ્રોફેશનલ યુનિવર્સિટી/ 2 હજાર વિદ્યાર્થીઓનું પ્રદર્શન, તોડફોડ અને આગચંપી

જાલંધરની લવલી પ્રોફેશનલ યુનિવર્સિટી (LPU)માં શનિવારે મોડી રાત્રે એક અફવાએ ભારે હોબાળો મચાવ્યો હતો. સોશિયલ મીડિયા પર એક વિદ્યાર્થીની સાથે કથિત બળાત્કાર અને ત્યારબાદ તેના આપઘાતના દાવા વાયરલ થયા હતા. જોકે, પોલીસના જણાવ્યા મુજબ અત્યાર સુધી આ દાવાઓને સમર્થન આપતો કોઈ પુરાવો મળ્યો નથી અને આ અંગે કોઈ ફરિયાદ પણ નોંધાઈ નથી. અફવાને પગલે આશરે 2 હજાર વિદ્યાર્થીઓ કેમ્પસમાં એકત્ર થયા હતા અને ભારે વિરોધ કર્યો હતો. દરમિયાન યુનિવર્સિટીની સંપત્તિમાં તોડફોડ, કાચ તોડવા તેમજ કેટલાક સ્થળે આગચંપીની ઘટના બની હતી.

સોશિયલ મીડિયા પર વાયરલ થઈ અફવા

શનિવારે રાત્રે LPU કેમ્પસમાં વિદ્યાર્થીઓમાં અચાનક રોષ ફેલાયો હતો. સોશિયલ મીડિયા પર કેટલાક વીડિયો અને તસવીરો શેર થયા હતા. તેમાં ગર્લ્સ હોસ્ટેલ સાથે જોડાયેલા ગંભીર બનાવના દાવા કરવામાં આવ્યા હતા. કેટલીક પોસ્ટમાં એક વિદ્યાર્થીની સાથે કથિત બળાત્કાર અને ત્યારબાદ તેણે આપઘાત કર્યો હોવાનો દાવો કરવામાં આવ્યો હતો. જોકે, પોલીસ અથવા યુનિવર્સિટી પ્રશાસને આવા કોઈ બનાવની સત્તાવાર પુષ્ટિ કરી નથી.

કર્મચારી પર પણ લગાવાયો આરોપ

સોશિયલ મીડિયા પર વાયરલ થયેલી કેટલીક પોસ્ટમાં આ કથિત ઘટનાને લઈને યુનિવર્સિટીના એક કર્મચારી પર પણ આરોપ લગાવવામાં આવ્યા હતા. આ દાવાઓ વચ્ચે મોટી સંખ્યામાં વિદ્યાર્થીઓ કેમ્પસમાં એકત્ર થયા અને વિરોધ પ્રદર્શન શરૂ કર્યું હતું. જોકે, પોલીસના જણાવ્યા મુજબ અત્યાર સુધી આ આરોપોને સમર્થન આપતો કોઈ પુરાવો સામે આવ્યો નથી.

પોલીસને ન ફરિયાદ મળી, ન કોઈ પુરાવો

SSP ગૌરવ તૂરાએ જણાવ્યું હતું કે એક વાયરલ સંદેશા દ્વારા એક અપુષ્ટ ઘટનાની માહિતી સામે આવી હતી. કેટલાક વિદ્યાર્થીઓએ વિદ્યાર્થીનીના આપઘાતનો દાવો કર્યો હતો, જ્યારે અન્ય કેટલાકે બળાત્કારની વાત કરી હતી. જોકે, પોલીસને આ ઘટનાની પુષ્ટિ કરતો કોઈ પુરાવો મળ્યો નથી અને પોલીસ પાસે આ અંગે કોઈ ફરિયાદ પણ આવી નથી.

2 હજાર વિદ્યાર્થીઓનું વિરોધ પ્રદર્શન

પોલીસના જણાવ્યા અનુસાર, વિરોધ પ્રદર્શનમાં આશરે 2 હજાર વિદ્યાર્થીઓ જોડાયા હતા. પ્રદર્શનની શરૂઆત ગર્લ્સ હોસ્ટેલ નજીકથી થઈ હતી. ત્યારબાદ વિદ્યાર્થીઓ કેમ્પસના અન્ય વિસ્તારોમાં પહોંચ્યા હતા. સ્થિતિ વણસતાં યુનિવર્સિટી પરિસરમાં ભારે હોબાળો સર્જાયો હતો.

તોડફોડ બાદ ઇમારતોમાં આગચંપી

વિરોધ દરમિયાન વિદ્યાર્થીઓએ યુનિવર્સિટીની સંપત્તિને ભારે નુકસાન પહોંચાડ્યું હતું. કેટલાક સ્થળે બારીઓના કાચ તોડી નાખવામાં આવ્યા હતા. ઈંટો અને કૂંડા ફેંકવામાં આવ્યા હતા. કેમ્પસની કેટલીક ઇમારતોના ભાગોમાં આગ પણ લગાવવામાં આવી હતી. પોલીસે જણાવ્યું કે ઘટનામાં તોડફોડ અને રમખાણ જેવી સ્થિતિ સર્જાઈ હતી.

નેશનલ હાઈવે પણ ઘેરાયો

વિરોધ કરી રહેલા વિદ્યાર્થીઓએ નેશનલ હાઈવે પણ ઘેરી લીધો હતો, જેના કારણે થોડા સમય માટે વાહનવ્યવહારને અસર થઈ હતી. જોકે, પોલીસની કાર્યવાહી બાદ હાઈવે ફરી ખુલ્લો કરી દેવામાં આવ્યો હતો. પોલીસના જણાવ્યા મુજબ હાલ પરિસ્થિતિ નિયંત્રણમાં છે અને ઘટનાની તપાસ કરવામાં આવી રહી છે.

અગાઉ ચિતકારા યુનિવર્સિટીમાં પણ થયો હતો હોબાળો

આ ઘટનાના એક દિવસ પહેલાં પટિયાલા નજીક આવેલી ચિતકારા યુનિવર્સિટીમાં પણ અફવાને પગલે વિદ્યાર્થીઓ અને પોલીસ વચ્ચે ઘર્ષણ થયું હતું. ત્યાં પણ સોશિયલ મીડિયા પર ફેલાયેલી અફવાને પગલે વિદ્યાર્થીઓમાં રોષ જોવા મળ્યો હતો. LPUની ઘટનામાં જોકે, પોલીસનું કહેવું છે કે કથિત બળાત્કાર અને આપઘાત અંગે હજુ સુધી કોઈ પુષ્ટિ મળી નથી.