VIDEO: ભારતથી જ ટ્રમ્પને ઈરાનનો સીધો પડકાર, હોર્મુઝ ખાડી પર પણ આપ્યા મોટા સંકેત
છેલ્લું અપડેટ : 14 Sept 2026
નવી દિલ્હી: અમેરિકા સાથેના વધતા તણાવ વચ્ચે ઈરાનના રાષ્ટ્રપતિ મસૂદ પેઝેસ્કિયાન બ્રિક્સ સમિટ (BRICS Summit)માં ભાગ લેવા ભારત પહોંચ્યા હતા. ભારતની ધરતી પરથી તેમણે અમેરિકાના રાષ્ટ્રપતિ ડોનાલ્ડ ટ્રમ્પ પર નિશાન સાધ્યું હતું. સાથે જ તેમણે બ્રિક્સ દેશોને ડોલર પરની નિર્ભરતા ઘટાડીને રાષ્ટ્રીય ચલણ (National Currency)માં વેપાર વધારવાનું આહ્વાન કર્યું હતું. આ ઉપરાંત હોર્મુઝ ખાડી (Strait of Hormuz)ને લઈને પણ તેમણે મહત્વના સંકેતો આપ્યા હતા.
પશ્ચિમી પ્રતિબંધો પર ઈરાનના રાષ્ટ્રપતિનો પ્રહાર
ઈરાનના રાષ્ટ્રપતિ મસૂદ પેઝેસ્કિયાને રવિવારે બ્રિક્સ સમિટ દરમિયાન પોતાના સંબોધનમાં પશ્ચિમી દેશો દ્વારા લાદવામાં આવતા પ્રતિબંધો (Sanctions)ની આકરી ટીકા કરી હતી. તેમણે કહ્યું હતું કે આવા પ્રતિબંધોની વૈશ્વિક ખાદ્ય સુરક્ષા (Global Food Security) અને લોકોની સુખાકારી પર ગંભીર અસર પડી રહી છે.
ઈરાન પર તાજેતરમાં અમેરિકાએ અનેક કડક પ્રતિબંધો લાદ્યા છે. બીજી તરફ ઈરાનના ક્રૂડ ઓઈલ (Crude Oil)ની હોર્મુઝ ખાડી મારફતે અન્ય દેશોમાં થતી હેરફેરને રોકવા માટે અમેરિકાએ આ વિસ્તારમાં પોતાનું સૈન્ય તૈનાત કર્યું છે. આવી સ્થિતિ વચ્ચે ઈરાનના રાષ્ટ્રપતિએ બ્રિક્સના મંચ પરથી અમેરિકાની નીતિઓ પર આકરો પ્રહાર કર્યો હતો.
અમેરિકા અને ઈઝરાયેલના હુમલાનો મુદ્દો ઉઠાવ્યો
ઈરાનના રાષ્ટ્રપતિએ અમેરિકા અને ઈઝરાયેલના હુમલાનો ઉલ્લેખ કરતાં કહ્યું હતું કે ઈરાને વર્ષો દરમિયાન તૈયાર કરેલું માળખું (Infrastructure) નષ્ટ કરી દેવામાં આવ્યું છે. આ સમગ્ર સંઘર્ષની ભારે કિંમત ઈરાનના સામાન્ય નાગરિકોએ ચૂકવવી પડી રહી છે.
તેમણે કહ્યું હતું કે નાગરિકો પરના હુમલા રોકવા અને તેમની સુરક્ષા સુનિશ્ચિત કરવા માટે યોગ્ય પગલાં લેવાની જવાબદારી આંતરરાષ્ટ્રીય સમુદાય (International Community)ની છે.
ભારત અને PM મોદીની પ્રશંસા
બ્રિક્સ સમિટનું આયોજન કરવા બદલ ઈરાનના રાષ્ટ્રપતિએ ભારત અને વડાપ્રધાન નરેન્દ્ર મોદીનો આભાર પણ વ્યક્ત કર્યો હતો. તેમણે ભારતની યજમાનીની પ્રશંસા કરી હતી અને બ્રિક્સ દેશો વચ્ચે સહયોગ વધુ મજબૂત કરવાની જરૂરિયાત પર ભાર મૂક્યો હતો.
આ સાથે જ હોર્મુઝ ખાડી અંગે પણ ઈરાન તરફથી મહત્વના સંકેતો મળ્યા છે. વૈશ્વિક ક્રૂડ ઓઈલ સપ્લાય માટે અત્યંત મહત્વપૂર્ણ ગણાતી આ ખાડી અંગે ઈરાનનું વલણ સમગ્ર વિશ્વ માટે મહત્વપૂર્ણ માનવામાં આવી રહ્યું છે. અમેરિકા સાથેના તણાવ વચ્ચે પેઝેસ્કિયાનના નિવેદનથી હવે હોર્મુઝને લઈને આગળ શું નિર્ણય લેવાય છે તેના પર સૌની નજર રહેશે.