Video/ પુણેમાં 4 વર્ષની બાળકી પર 65 વર્ષના નરાધમેં આચર્યું દુષ્કર્મ, હત્યા કરી છાણના ઢગલામાં મૃતદેહ સંતાડ્યો
છેલ્લું અપડેટ : 02 May 2026
Pune Crime News : મહારાષ્ટ્રના પુણે જિલ્લાના ભોર તાલુકામાંથી એક કમકમાટીભરી ઘટના સામે આવી છે. અહીં વેકેશન માણવા પોતાની નાનીના ઘરે આવેલી ચાર વર્ષની માસૂમ બાળકી પર એક 65 વર્ષીય વૃદ્ધે દુષ્કર્મ ગુજાર્યા બાદ તેની પથ્થરથી કચડીને હત્યા કરી નાખી છે. આ ઘટનાને પગલે સમગ્ર વિસ્તારમાં ભારે રોષ અને તણાવની સ્થિતિ સર્જાઈ છે.
શું છે સમગ્ર ઘટના?
બાળકી ઉનાળાના વેકેશનમાં પોતાની નાનીના ઘરે આવી હતી. શનિવારે તે ઘરની બહાર રમી રહી હતી ત્યારે આરોપી ભીમરાવ કાંબલે (65 વર્ષ) તેને ફોસલાવીને પોતાના ઘરની સામે આવેલા પશુઓના તબેલામાં લઈ ગયો હતો. આરોપ છે કે ત્યાં તેણે બાળકી સાથે દુષ્કર્મ આચર્યું અને ત્યારબાદ પથ્થરથી કચડીને તેની હત્યા કરી નાખી. પુરાવાનો નાશ કરવા માટે આરોપીએ બાળકીના મૃતદેહને તબેલામાં રહેલા છાણના ઢગલા નીચે છુપાવી દીધો હતો.
સીસીટીવી ફૂટેજથી ઝડપાયો આરોપી
જ્યારે બાળકી લાંબા સમય સુધી ઘરે ન પરતી ત્યારે પરિવારે શોધખોળ શરૂ કરી હતી. તપાસ દરમિયાન તબેલામાંથી બાળકીનો મૃતદેહ મળી આવતા પરિવાર પર આભ તૂટી પડ્યું હતું. પોલીસે ઘટનાસ્થળની મુલાકાત લઈ આસપાસના સીસીટીવી કેમેરા ચેક કર્યા, જેમાં આરોપી બાળકીને તબેલા તરફ લઈ જતો જોવા મળ્યો હતો. આ પુરાવાના આધારે પોલીસે ભીમરાવ કાંબલેને કસ્ટડીમાં લઈ પૂછપરછ શરૂ કરી છે.
ગ્રામજનોનો આક્રોશ અને હાઈવે પર ચક્કાજામ
આ ઘટના બાદ સેંકડો ગ્રામજનો રસ્તા પર ઉતરી આવ્યા હતા અને આરોપીને કડક સજાની માંગણી કરી હતી. રોષે ભરાયેલા લોકોએ મુંબઈ-બેંગલુરુ હાઈવે પર ચક્કાજામ કર્યો હતો, જેના કારણે વાહનોની લાંબી લાઈનો લાગી ગઈ હતી. સ્થિતિ વણસતા મોટો પોલીસ કાફલો તૈનાત કરવામાં આવ્યો છે. પુણે ગ્રામીણ પોલીસ અધિક્ષક સંદીપસિંહ ગિલે લોકોને ખાતરી આપી છે કે આ મામલે 15 દિવસમાં ચાર્જશીટ દાખલ કરી દેવામાં આવશે.
ફોરેન્સિક નિષ્ણાતોની ટીમ ઘટનાસ્થળે પહોંચી
મહારાષ્ટ્રના પુણેમાં બનેલી શરમજનક રેપની ઘટનાને પગલે સમગ્ર રાજ્યમાં ભારે રોષ ફાટી નીકળ્યો છે. આ ચકચારી કેસમાં નક્કર વૈજ્ઞાનિક પુરાવા એકત્ર કરવા માટે આજે ફોરેન્સિક નિષ્ણાતોની ટીમ ઘટનાસ્થળે પહોંચી હતી. તપાસ ટીમે ગુનાવાળી જગ્યાને કોર્ડન કરી ઝીણવટભરી તપાસ શરૂ કરી દીધી છે.
પોલીસ પ્રશાસન દ્વારા આરોપીઓ સુધી પહોંચવા માટે આસપાસના સીસીટીવી ફૂટેજ પણ ખંગાળવામાં આવી રહ્યા છે. ફોરેન્સિક તપાસ દ્વારા મળેલા નમૂનાઓ આ કેસમાં આરોપીઓને કડક સજા અપાવવામાં મહત્વની કડી સાબિત થશે. તંત્રએ ખાતરી આપી છે કે આ કેસની તપાસ ઝડપથી પૂર્ણ કરી પીડિતાને ન્યાય અપાવવામાં આવશે. જોકે, આ ઘટનાએ ફરી એકવાર મહિલા સુરક્ષા સામે ગંભીર સવાલો ઊભા કર્યા છે.
