Budget 2026: મધ્યમ વર્ગના ખિસ્સા પર કેટલી અસર થશે? જાણો ટેક્સમાં રાહત મળી કે બોજ વધ્યો
છેલ્લું અપડેટ : 01 Feb 2026
સંસદમાં આજે નાણામંત્રી નિર્મલા સીતારમણે બજેટ 2026 રજૂ કર્યું. ભાષણમાં નાણામંત્રીએ પગારદાર અને મધ્યમ વર્ગના લોકોને રાહત આપવા માટે ઘણી જાહેરાતો કરી હતી. નિર્મલા સીતારમણની આ જાહેરાતો ત્યારે વધુ મહત્ત્વની બની જાય છે, જ્યારે આગામી નાણાકીય વર્ષો માટે ઇન્કમ ટેક્સ સ્લેબ અને સ્ટાન્ડર્ડ ડિડક્શનમાં કોઈ ફેરફાર કરવામાં આવ્યો નથી. તો ચાલો જાણીએ એવા પ્રસ્તાવો વિશે જે તમારા અંગત જીવન પર અસર કરી શકે છે.
નવો ઇન્કમ ટેક્સ એક્ટ
બજેટ ભાષણ મુજબ, નવો ઇન્કમ ટેક્સ એક્ટ 1 એપ્રિલ, 2026થી લાગુ થશે. સરળ ઇન્કમ ટેક્સ નિયમો અને ફોર્મ વિશે ટૂંક સમયમાં જણાવવામાં આવશે. ફોર્મને એવી રીતે ફરીથી તૈયાર કરવામાં આવ્યા છે કે સામાન્ય નાગરિકો કોઈપણ મુશ્કેલી વગર તેને સમજી અને અનુસરી શકે.
NIL ડિડક્શન સર્ટિફિકેટ મેળવવાની ઓટોમેટેડ પ્રક્રિયા
નાના ટેક્સપેયર્સ માટે એક નવી સ્કીમનો પ્રસ્તાવ મૂકવામાં આવ્યો છે, જેમાં તેઓ નિયમ આધારિત પ્રોસેસ હેઠળ ઓટોમેટિક રીતે ઓછું અથવા ઝીરો ડિડક્શન સર્ટિફિકેટ મેળવી શકે છે. આનાથી હવે એસેસમેન્ટ ઓફિસર પાસે અરજી કરવાની પ્રક્રિયા પૂરી થઈ જશે.
મોટર એક્સિડન્ટ ક્લેમ પર કોઈ ઇન્કમ ટેક્સ નહીં
નાણામંત્રીએ પ્રસ્તાવ મૂક્યો છે કે મોટર અકસ્માત ક્લેમ ટ્રિબ્યુનલ દ્વારા કોઈપણ વ્યક્તિને આપવામાં આવેલા વ્યાજ પર ઇન્કમ ટેક્સમાંથી મુક્તિ મળશે અને કોઈ TDS લાગુ થશે નહીં.
TCS દરોનું સરળીકરણ
બજેટ 2026 ના ભાષણમાં બે મોટી જાહેરાતો કરવામાં આવી છે.
1. ઓવરસીઝ પેકેજ પ્રોગ્રામ: TCS ને હાલના 5% અને 20% થી ઘટાડીને કોઈપણ શરત વગર 2% કરવામાં આવ્યું છે.
2. LRS સ્કીમ: શિક્ષણ અને તબીબી હેતુઓ માટે TDS ને 5% થી ઘટાડીને 2% કરી દેવામાં આવ્યો છે.
મેનપાવર સપ્લાય પર TDS
અસ્પષ્ટતા ટાળવા માટે, મેનપાવર સેવાઓના સપ્લાય પરના TDS ને કોન્ટ્રાક્ટરોના પેમેન્ટના દાયરામાં લાવવામાં આવ્યો છે. તેથી આ સેવાઓ પર TDS હવે માત્ર 1% અથવા 2%ના દરે લાગશે.
રિવાઈઝ્ડ ITR ફાઈલ કરવાની ડેડલાઈનમાં વધારો
સુધારેલા ITR ફાઈલ કરવાની સમયમર્યાદા 31 ડિસેમ્બરથી વધારીને 31 માર્ચ કરવાનો પ્રસ્તાવ છે, જેના માટે મામૂલી ફી ચૂકવવી પડશે.
ડિપોઝિટરીઝ ફોર્મ 15G/ફોર્મ 15H સ્વીકારશે
જે ટેક્સપેયર્સ પાસે ઘણી કંપનીઓમાં સિક્યોરિટીઝ છે, તેઓ ડિપોઝિટરીને ઇન્વેસ્ટર પાસેથી ફોર્મ 15G અથવા 15H લેવા અને તેને સીધું જ અલગ-અલગ સંબંધિત કંપનીઓને આપવા માટે કહી શકશે.
ITR ફાઈલ કરવાની ડેડલાઈનમાં કોઈ ફેરફાર નહીં
નાણામંત્રીએ ITR 1 અને ITR 2 રિટર્ન ભરનારા વ્યક્તિઓ માટે ટેક્સ રિટર્ન ફાઈલ કરવાની છેલ્લી તારીખમાં કોઈ ફેરફાર કર્યો નથી, તેઓ 31 જુલાઈ સુધી ફાઈલ કરી શકશે. જોકે, નોન-ઓડિટ બિઝનેસ અથવા ટ્રસ્ટ માટે 31 ઓગસ્ટ સુધીનો સમય આપવાનો પ્રસ્તાવ છે.
NRI મિલકત વેચતી વખતે PANનો ઉપયોગ કરી શકશે
બિન-નિવાસી (NRI) દ્વારા અચલ સંપત્તિના વેચાણ પર TDS ને TAN ની જરૂરિયાતને બદલે રહેવાસી ખરીદનારના PAN આધારિત ચલણ દ્વારા કાપવા અને જમા કરવાનો પ્રસ્તાવ છે.
વિદેશી સંપત્તિ જાહેરાત યોજના (Foreign Asset Disclosure Scheme)
વિદ્યાર્થીઓ, યુવા પ્રોફેશનલ્સ, ટેક કર્મચારીઓ અને NRI માટે એક વખતની 6 મહિનાની વિદેશી સંપત્તિ જાહેરાત યોજના લાવવામાં આવી છે, જેમાં નિશ્ચિત મર્યાદાથી ઓછી આવક કે સંપત્તિનો ખુલાસો કરી શકાશે.
અંગત સામાન પર કસ્ટમ ડ્યુટી અડધી કરાઈ
વ્યક્તિગત વપરાશ માટે આયાત (Import) કરવામાં આવતા સામાન માટે કસ્ટમ ડ્યુટીના ટેરિફ રેટને 20% થી ઘટાડીને 10% કરવાનો પ્રસ્તાવ મૂકવામાં આવ્યો છે.
