VIDEO: બે મિનિટના કામ માટે વિપક્ષના નેતાએ બેસવું પડ્યું સાડા સાત કલાક! પેલેટ ગન કેસમાં FIR નોંધાતા કોંગ્રેસનો આક્રોશ!
છેલ્લું અપડેટ : 21 Aug 2026
જંતર-મંતર ખાતે વિદ્યાર્થીઓના વિરોધ પ્રદર્શન દરમિયાન પેલેટ ગનથી ગંભીર રીતે ઈજાગ્રસ્ત થયેલા સાહિલ લોચબની ફરિયાદના આધારે આખરે દિલ્હી પોલીસે ઔપચારિક FIR નોંધી છે. લોકસભામાં વિપક્ષના નેતા રાહુલ ગાંધીના ભારે વિરોધ અને પોલીસ સ્ટેશનમાં સતત સાડા સાત કલાક સુધી ચાલેલા ધરણાં બાદ પોલીસે આ કાર્યવાહી હાથ ધરી હતી. આ ઘટના પર પ્રતિક્રિયા આપતાં કોંગ્રેસના વરિષ્ઠ નેતા કિશોરી લાલ શર્માએ પોલીસ પ્રશાસન અને દેશની લોકશાહી વ્યવસ્થા સામે ગંભીર સવાલો ખડા કર્યા છે.
"સામાન્ય માણસના અધિકાર માટે લડી રહ્યા છે રાહુલ ગાંધી"
કોંગ્રેસ નેતા કિશોરી લાલ શર્માએ જણાવ્યું હતું કે રાહુલ ગાંધી સામાન્ય નાગરિકોના હક અને ન્યાય માટે અડગ લડત લડી રહ્યા છે. તેમણે રોષ વ્યક્ત કરતાં કહ્યું કે, પોલીસ સ્ટેશનમાં માત્ર બે જ મિનિટમાં થઈ શકે તેવી એક સામાન્ય FIR નોંધાવવા માટે દેશના વિપક્ષના નેતાને સતત ૭.૫ કલાક સુધી પોલીસ સ્ટેશનમાં બેસી રહેવું પડ્યું. જો એક સાંસદ અને વિપક્ષના નેતાને સામાન્ય ફરિયાદ નોંધાવવા માટે આટલો મોટો સંઘર્ષ કરવો પડતો હોય, તો દેશમાં લોકશાહી ખરેખર જીવંત છે કે નહીં તે વિચારવા જેવો પ્રશ્ન બની જાય છે.
ન્યાય માટે ઉઠાવ્યો અવાજ
કિશોરી લાલ શર્માએ સ્પષ્ટ કર્યું કે આ ઘટના દર્શાવે છે કે સામાન્ય નાગરિકો માટે ન્યાય મેળવવો કેટલો મુશ્કેલ બની ગયો છે. પેલેટ ગનના ઉપયોગથી ગંભીર રીતે ઘાયલ થયેલા યુવાનને ન્યાય અપાવવા માટે કોંગ્રેસ પક્ષ સતત લડતો રહેશે અને બંધારણીય અધિકારોના રક્ષણ માટે ક્યારેય પાછીપાની કરશે નહીં.
