VIDEO: પોલીસની ચાલ ખુલ્લી પડી? સીજેપી વિરોધ હુમલા કેસમાં સ્વતંત્ર ભારદ્વાજની ધરપકડ મુદ્દે વકીલનો સનસનીખેજ ખુલાસો!
છેલ્લું અપડેટ : 07 Sept 2026
સીજેપી (CJP) પ્રોટેસ્ટ દરમિયાન થયેલા કથિત હુમલાના કેસમાં ધરપકડ કરાયેલા સ્વતંત્ર ભારદ્વાજના કેસમાં હવે કાનૂની લડાઈ તેજ બની છે. સ્વતંત્ર ભારદ્વાજના પિતા વતી વકીલ ઉમેશ ચંદ્ર શર્માએ કોર્ટમાં હેબિયસ કોર્પસ પિટિશન દાખલ કરીને પોલીસ દ્વારા કરાયેલી અટકાયતને સંપૂર્ણપણે ગેરકાયદેસર ગણાવી છે અને તેમને તાત્કાલિક મુક્ત કરવાની માગ કરી છે.
ગેરકાયદેસર કસ્ટડી સામે હાઇકોર્ટમાં અરજી
વકીલ ઉમેશ ચંદ્ર શર્માએ જણાવ્યું કે, “અમે પોલીસ દ્વારા કરવામાં આવેલી ગેરકાયદેસર અટકાયત સામે હેબિયસ કોર્પસ અરજી દાખલ કરી છે અને એફઆઈઆર રદ કરવા માટે પણ દાદ માંગી છે. સ્વતંત્ર ભારદ્વાજને તાત્કાલિક મુક્ત કરવામાં આવે તેવી અમે કોર્ટ સમક્ષ માગણી કરી છે. આ પિટિશન તેમના પિતા દ્વારા એફિડેવિટ સાથે દાખલ કરવામાં આવી છે.”
જૂના કેસમાં અચાનક એટ્રોસિટી એક્ટ ઉમેરાયો
કાનૂની આધાર અંગે વિગત આપતાં વકીલે જણાવ્યું કે સ્વતંત્ર ભારદ્વાજની ધરપકડ ૨૩ જૂન ૨૦૧૬ના રોજ નોંધાયેલી જૂની FIR (નંબર ૬૨/૨૦૧૬) હેઠળ કરવામાં આવી છે. તેમને તપાસમાં જોડાવા માટે નોટિસ અપાઈ હતી અને તેઓ તપાસમાં હાજર પણ થયા હતા. જોકે, પોલીસે બાદમાં દાવો કર્યો કે ફરિયાદ કરનાર સંજય કુમારનું પૂરક નિવેદન લેવામાં આવ્યું છે, જેમાં જાતિસૂચક ટિપ્પણી કરવાનો આરોપ મુકાયો છે. આ આધારે પોલીસે SC/ST પ્રિવેન્શન ઓફ એટ્રોસિટીઝ એક્ટની કલમ ૩ ઉમેરી દીધી છે. વકીલના જણાવ્યા મુજબ, આ કડક જોગવાઈ હેઠળ સ્વતંત્રને લાંબા સમય સુધી કસ્ટડીમાં રાખવાનો પ્રયાસ થઈ રહ્યો છે.
બીજી બોગસ FIR દાખલ કરવાનો પોલીસ પર આક્ષેપ
વકીલ ઉમેશ ચંદ્ર શર્માએ પોલીસ પર મોટો આરોપ લગાવતાં કહ્યું કે, “4 સપ્ટેમ્બરના રોજ ખોટી ફરિયાદના આધારે POCSO હેઠળ બીજી FIR પણ નોંધી દેવામાં આવી છે. અમને પૂરી આશંકા છે કે જો તેઓ જૂની FIRમાંથી જામીન મેળવશે, તો પોલીસ તરત જ આ નવી પોક્સો એફઆઈઆર હેઠળ તેમની ધરપકડ કરી લેશે. પોલીસ તેને કોઈપણ હિસાબે કસ્ટડીમાં રાખવા મક્કમ જણાઈ રહી છે.” આ સમગ્ર મામલે હવે કોર્ટમાં ક્યારે સુનાવણી હાથ ધરાય છે અને અદાલત પોલીસની કાર્યવાહી તેમજ બચાવ પક્ષની દલીલો પર શું વલણ અપનાવે છે તેના પર સૌની નજર ટકેલી છે.
