VIDEO: "ભાજપના રાજમાં મરવું જ સામાન્ય માણસનું નસીબ બની ગયું છે!" સત્ય નિકેતન બિલ્ડિંગ દુર્ઘટના પર AAP સાંસદ સંજય સિંહનો પ્રહાર!
છેલ્લું અપડેટ : 07 Sept 2026
દિલ્હી યુનિવર્સિટીના સાઉથ કેમ્પસ નજીક આવેલા સત્ય નિકેતન વિસ્તારમાં એક બહુમાળી ઇમારત ધરાશાયી થવાની ગંભીર ઘટનાને પગલે આમ આદમી પાર્ટીના રાજ્યસભા સાંસદ સંજય સિંહે આક્રોશ વ્યક્ત કર્યો છે. તેમણે ઉત્તર પ્રદેશના સુલતાનપુર ખાતેથી આ દુર્ઘટના અંગે ભાજપ અને સ્થાનિક વહીવટીતંત્ર પર બેદરકારી તેમજ ભ્રષ્ટાચારના ગંભીર આક્ષેપો કર્યા હતા.
https://x.com/ANI/status/2096900350133629365
"વિદ્યાર્થીઓ માટે હોસ્ટેલની સુવિધા ન હોવાથી PGમાં રહેવાની મજબૂરી"
આ દુર્ઘટના મુદ્દે સંજય સિંહે કહ્યું કે, “સૌથી મોટો મુદ્દો દિલ્હી યુનિવર્સિટીના સાઉથ કેમ્પસ નજીક વિદ્યાર્થીઓ માટે પૂરતી હોસ્ટેલ સુવિધાઓનો અભાવ છે. એટલા માટે જ બહારથી આવતા વિદ્યાર્થીઓએ PGમાં રહેવા મજબૂર થવું પડે છે. આટલી જર્જરિત અને સંપૂર્ણપણે અસુરક્ષિત ઇમારતોમાં આવા પીજી ચલાવવાની મંજૂરી આખરે કોણ અને કેવી રીતે આપે છે?”
"ભાજપના નેતાઓ માત્ર પોકળ નિવેદનો આપે છે"
શાસક પક્ષ પર આકરા પ્રહારો કરતા સંજય સિંહે કહ્યું કે ભાજપના નેતાઓ તરફથી માત્ર ખોટા અને પોકળ નિવેદનો સાંભળવા મળે છે. દુર્ઘટના રોકવા કે અસુરક્ષિત ઇમારતો સામે કોઈ નક્કર પગલાં લેવા માટે તેમની પાસે કોઈ સ્પષ્ટ રોડમેપ કે પ્લાન નથી. માત્ર લોકોને દેખાડવા ખાતર નામ પૂરતી ઔપચારિક કાર્યવાહી કરવામાં આવશે. તેમણે આક્રોશ સાથે ઉમેર્યું કે, “એવું લાગે છે કે ભાજપના શાસનમાં મરવું એ જ સામાન્ય માણસનું નસીબ બની ગયું છે.”
ઉપરથી નીચે સુધી મિલીભગત અને ભ્રષ્ટાચારનો આરોપ
આ પ્રકારની ઘટનાઓ પાછળ ઊંડા મૂળિયાં ધરાવતા ભ્રષ્ટાચારને જવાબદાર ઠેરવતા તેમણે કહ્યું કે આ બધું અધિકારીઓ અને તંત્રની મિલીભગતના કારણે ચાલે છે, જેમાં ઉપરથી લઈને નીચે સુધીના તમામ લોકો ભ્રષ્ટાચારમાં સામેલ હોય છે.