VIDEO: 'કોકરોચ જેટલું અસરકારક ન રહ્યું કોંગ્રેસનું પ્રદર્શન...'; શશિ થરૂરે ફરી પોતાની જ પાર્ટીના પ્રદર્શન સામે ઉઠાવ્યા સવાલો
છેલ્લું અપડેટ : 08 Aug 2026
મુંબઈ: કોંગ્રેસના વરિષ્ઠ નેતા અને સાંસદ શશિ થરૂરે (Shashi Tharoor) ફરી એકવાર પોતાની જ પાર્ટીના પ્રચાર અને રણનીતિ સામે ગંભીર સવાલો ઊભા કર્યા છે. શુક્રવારે મુંબઈમાં યોજાયેલા એક કાર્યક્રમ દરમિયાન તેમણે સ્વીકાર્યું હતું કે, કોકરોચ જનતા પાર્ટી (CJP) ના તાજેતરના વિદ્યાર્થી આંદોલનમાં જે મુદ્દાઓ ઉઠાવવામાં આવ્યા હતા, તે જ મુદ્દાઓ કોંગ્રેસના 'છાત્રો કી ગૂંજ' (Chhatron Ki Goonj) કાર્યક્રમનો પણ ભાગ હતા. પરંતુ કોંગ્રેસનો આ પ્રચાર યુવાનો અને 'Gen Z' (નવી પેઢી) ના દિલ સુધી પહોંચવામાં નિષ્ફળ રહ્યો.
મુંબઈમાં 'ઈન્ડિયાઝ ઈન્ટરનેશનલ મુવમેન્ટ ટુ યુનાઈટ નેશન્સ' (IIMUN) ની 15મી વર્ષગાંઠ નિમિત્તે આયોજિત સંવાદ કાર્યક્રમમાં શશિ થરૂરે પાર્ટીને આત્મમંથન (Self-introspection) કરવાની સલાહ આપી હતી.
"શું આપણે Gen-Z ની નાડી પારખવામાં ચૂક કરી ગયા?"
જંતર-મંતર (Jantar Mantar) ખાતે થયેલા CJP ના વિરોધ પ્રદર્શનનો ઉલ્લેખ કરતા તિરૂવનંતપુરમના કોંગ્રેસ સાંસદ શશિ થરૂરે જણાવ્યું હતું કે: "CJP એ જંતર-મંતર ખાતે જે પણ મુદ્દાઓ ઉઠાવ્યા હતા, તે મુદ્દાઓ આપણે તેનાથી પણ પહેલાં જ ઉઠાવી ચૂક્યા હતા. આપણો 'છાત્રો કી ગૂંજ' કાર્યક્રમ ચાલી રહ્યો હતો, જેમાં રાહુલ ગાંધી પોતે પેપર લીકના (Paper Leak Issue) મુદ્દે વિદ્યાર્થીઓને સંબોધિત કરી રહ્યા હતા. પરંતુ આપણે પોતાને જ આ સવાલ પૂછવો પડશે - આપણાથી ભૂલ ક્યાં થઈ? શું આપણે વિદ્યાર્થીઓનો અવાજ યોગ્ય રીતે સાંભળી ન શક્યા? શું Gen Z ની નાડી પરથી આપણી પકડ ઢીલી થઈ ગઈ હતી?"
NEET-UG 2026 વિવાદ અને યુવાનોનું આંદોલન
NEET-UG 2026 ની પરીક્ષામાં કથિત ગેરરીતિ અને પેપર લીકની ઘટનાઓ બાદ CJP એ 20 જૂનથી દિલ્હીના જંતર-મંતર પર મોટું આંદોલન શરૂ કર્યું હતું. વિદ્યાર્થીઓએ કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માગ કરી હતી.
આ આંદોલન ત્યારે વધુ ઉગ્ર બન્યું જ્યારે પર્યાવરણવાદી અને શિક્ષણવિદ સોનમ વાંગચુક (Sonam Wangchuk) વિદ્યાર્થીઓના સમર્થનમાં અનિશ્ચિત મુદતની ભૂખ હડતાળ (Hunger Strike) પર બેસી ગયા હતા.
CJP એ 20 જુલાઈના રોજ 'સંસદ માર્ચ' (Samsad March) નું આહ્વાન કર્યું હતું. આ માર્ચના થોડા દિવસો પહેલાં સોનમ વાંગચુકને પ્રદર્શન સ્થળ પરથી હટાવી દેવામાં આવ્યા હતા અને 20 જુલાઈએ પ્રદર્શનકારી વિદ્યાર્થીઓ પર પોલીસે બળપ્રયોગ કર્યો હતો, જેને લઈને વિપક્ષે સંસદમાં ભારે હંગામો કર્યો હતો.
કોંગ્રેસનો 'છાત્રો કી ગૂંજ' પ્રચાર
પેપર લીકના મુદ્દા પર અવાજ ઉઠાવવામાં કોંગ્રેસની વિદ્યાર્થી પાંખ NSUI (National Students' Union of India) પણ આગળ હતી. મે 2026 માં પરીક્ષા રદ થયા બાદ NSUI એ દિલ્હીમાં મોટું પ્રદર્શન કર્યું હતું.
ત્યારબાદ લોકસભામાં વિપક્ષના નેતા રાહુલ ગાંધીએ (Rahul Gandhi) 17 જૂને રાજસ્થાનના કોટા (Kota) થી 'છાત્રો કી ગૂંજ' અભિયાનની શરૂઆત કરી હતી:
કોટા: રાહુલ ગાંધીએ કોચિંગ હબમાં વિદ્યાર્થીઓના સપનાના શોષણને ઉજાગર કર્યું.
દહેરાદૂન: ઉત્તરાખંડમાં ગેરરીતિ અને પેપર લીકની સિસ્ટમ સામે સવાલો ઉઠાવ્યા.
પ્રયાગરાજ: ઉત્તર પ્રદેશના પ્રયાગરાજમાં યુવાનો સામે ઊભી થયેલી બેરોજગારીની (Unemployment) સમસ્યા પર ભાર મૂક્યો.
રાહુલ ગાંધીએ દાવો કર્યો હતો કે દેશનો યુવાન આ સિસ્ટમ સામે ઊભો થયો છે અને કોંગ્રેસ તેમનો અવાજ બનીને આગળ વધશે. આમ છતાં, શશિ થરૂરના આ તાજેતરના નિવેદને દેશના રાજકારણમાં એવી ચર્ચા જગાવી છે કે મુખ્ય વિપક્ષી દળ યુવાનો અને આધુનિક યુગના પ્રદર્શનકારીઓ સાથે જોડાવાની આક્રમક રણનીતિ શોધવામાં ક્યાંક પાછળ રહી ગયું છે.