કોંગ્રેસના નેતાઓએ પોતાની જ પાર્ટી સામે ખોલ્યો મોરચો, દિલ્હીમાં ધરણાની તૈયારી
છેલ્લું અપડેટ : 29 Aug 2026
બિહાર વિધાનસભા ચૂંટણી (Bihar Assembly Election)માં કોંગ્રેસના નબળા પ્રદર્શન બાદ હવે પાર્ટીની અંદરની નારાજગી ખુલ્લેઆમ સામે આવી રહી છે. બિહાર કોંગ્રેસના કેટલાક નેતાઓ અને કાર્યકરોએ હવે પોતાની જ પાર્ટીના નેતૃત્વ સામે વિરોધ કરવાનો નિર્ણય લીધો છે. આ નેતાઓ આગામી 8 સપ્ટેમ્બરે દિલ્હીમાં કોંગ્રેસના રાષ્ટ્રીય મુખ્યાલય ‘ઈન્દિરા ભવન’ની બહાર શાંતિપૂર્ણ ધરણા અને વિરોધ પ્રદર્શન (Protest) કરશે.
નારાજ નેતાઓનો મુખ્ય આક્ષેપ બિહાર કોંગ્રેસના પ્રભારી કૃષ્ણા અલ્લાવરુ અને પ્રદેશ અધ્યક્ષ રાજેશ કુમાર રામ સામે છે. કાર્યકરોનું કહેવું છે કે ચૂંટણીમાં પાર્ટીના ખરાબ પ્રદર્શન માટે સંગઠનના વરિષ્ઠ હોદ્દેદારોની જવાબદારી નક્કી થવી જોઈએ.
2025ની ચૂંટણીમાં કોંગ્રેસનું ખરાબ પ્રદર્શન
2025ની બિહાર વિધાનસભા ચૂંટણીમાં કોંગ્રેસનું પ્રદર્શન અત્યંત નિરાશાજનક રહ્યું હતું. પાર્ટી માત્ર 6 બેઠકો જીતી શકી હતી, જ્યારે 2020ની ચૂંટણીમાં કોંગ્રેસને 19 બેઠકો મળી હતી. એટલું જ નહીં, બિહાર કોંગ્રેસના પ્રદેશ અધ્યક્ષ રાજેશ કુમાર પણ પોતાની બેઠક પરથી ચૂંટણી હારી ગયા હતા.
આ પરિણામ બાદ પાર્ટીની અંદર સંગઠન (Organization), નેતૃત્વ અને ચૂંટણીની વ્યૂહરચના (Strategy) અંગે સવાલો ઉઠી રહ્યા છે.
રાહુલ ગાંધીને મળવાનો સમય ન મળતા નારાજગી
કોંગ્રેસના વરિષ્ઠ નેતા આનંદ માધવે જણાવ્યું કે બિહારના કેટલાક નેતાઓ લાંબા સમયથી પાર્ટીના કેન્દ્રીય નેતૃત્વ સાથે મુલાકાત કરવા પ્રયાસ કરી રહ્યા છે. તેમનો દાવો છે કે નવેમ્બર 2025થી તેઓ લોકસભામાં વિપક્ષના નેતા રાહુલ ગાંધી સાથે મુલાકાત માટે સમય માંગી રહ્યા છે, પરંતુ હજુ સુધી સમય મળ્યો નથી.
તેમણે જણાવ્યું કે 3 નવેમ્બર 2025ના રોજ તેમણે મલ્લિકાર્જુન ખડગે, કે.સી. વેણુગોપાલ અને અશોક ગેહલોત સાથે મુલાકાત કરી હતી. તે સમયે તેમની ફરિયાદો પર ધ્યાન આપવાનું આશ્વાસન આપવામાં આવ્યું હતું, પરંતુ ત્યારબાદ કોઈ ખાસ કાર્યવાહી ન થતાં નેતાઓમાં અસંતોષ વધ્યો છે.
અનેક વરિષ્ઠ નેતાઓ ધરણામાં જોડાશે
દિલ્હીમાં યોજાનારા આ વિરોધ પ્રદર્શનમાં બિહાર કોંગ્રેસના અનેક પૂર્વ અને વર્તમાન નેતાઓ સામેલ થવાની શક્યતા છે. તેમાં પૂર્વ ઉપાધ્યક્ષ જમાલ અહમદ અને રાજકુમાર રાજન, AICC સભ્ય નાગેન્દ્ર પાસવાન, પૂર્વ ધારાસભ્ય છત્રપતિ યાદવ, પૂર્વ સચિવ બી. અખ્તર અને પૂર્વ ધારાસભ્ય અનિલ કુમાર સિંહનો સમાવેશ થાય છે.
વરિષ્ઠ નેતા કિશોર કુમાર ઝાએ પણ નારાજ નેતાઓને સમર્થન આપ્યું છે. તેમણે કહ્યું કે આ કાર્યકરો લાંબા સમયથી પાર્ટી માટે કામ કરી રહ્યા છે અને હાઈકમાન્ડે તેમની ફરિયાદો સાંભળવી જોઈએ.
હવે 8 સપ્ટેમ્બરના પ્રસ્તાવિત ધરણા બાદ કોંગ્રેસ હાઈકમાન્ડ (High Command) આ આંતરિક અસંતોષને કેવી રીતે સંભાળે છે તેના પર સૌની નજર રહેશે.