VIDEO: સંસદ કૂચ પહેલાં CJP નો મોટો દાવો: 'સરકાર અમારી સાથે વાત કરવા આવી', જંતર-મંતર પર ચુસ્ત બંદોબસ્ત
છેલ્લું અપડેટ : 20 Jul 2026
નવી દિલ્હી: દિલ્હીના જંતર-મંતરથી સંસદ સુધી કોકરોચ જનતા પાર્ટી (Cockroach Janta Party અથવા CJP) પગપાળા માર્ચ યોજવા જઈ રહી છે. આ 'ચલો સંસદ' માર્ચને લઈને પોલીસે વિસ્તારમાં સુરક્ષા વ્યવસ્થા અત્યંત કડક કરી દીધી છે. આ હંગામા વચ્ચે CJPએ એક મોટો દાવો કર્યો છે કે કેન્દ્ર સરકારે પહેલીવાર તેમની સાથે વાતચીત કરવાનો પ્રયાસ કર્યો છે.
CJP સોમવારે સંસદ સુધી માર્ચ કાઢવાની તૈયારીમાં છે. એક અહેવાલ મુજબ, પાર્ટીના પ્રવક્તાએ દાવો કર્યો છે કે કેન્દ્ર સરકારે પહેલીવાર સત્તાવાર રીતે વાતચીતની પહેલ કરી છે. જોકે, હજુ સુધી એ સ્પષ્ટ નથી થયું કે કયા મંત્રી કે અધિકારી તરફથી આ અપીલ કરવામાં આવી છે. 'પેપર લીક' (Paper Leak) જેવા ગંભીર મુદ્દાઓને લઈને CJP સતત કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ કરી રહી છે. સરકારે આ મામલે હજુ કોઈ સત્તાવાર નિવેદન કે પ્રતિક્રિયા આપી નથી.
સોનમ વાંગચુકની ઉપવાસ છોડવાની શરતો
સફદરજંગ હોસ્પિટલ (Safdarjung Hospital)માં દાખલ પર્યાવરણ કાર્યકર્તા સોનમ વાંગચુકે સ્પષ્ટ કર્યું છે કે જો કેટલીક શરતો સંતોષાશે તો તેઓ ૨૦ જુલાઈએ પોતાની ભૂખ હડતાળ ખતમ કરી શકે છે. તેમની મુખ્ય શરતો નીચે મુજબ છે:
સરકારની જવાબદારી: શિક્ષણ વ્યવસ્થામાં થયેલી 'પેપર લીક' જેવી નિષ્ફળતાઓ અંગે સરકાર સ્પીકર સમક્ષ પોતાની જવાબદારી સ્વીકારે.
સંસદમાં આશ્વાસન: જો વાંગચુક અને CJP નેતૃત્વ સંસદના દ્વાર સુધી પહોંચે, તો સાંસદો અને વિવિધ પક્ષોના નેતાઓ તેમને ખાતરી આપે કે ચોમાસુ સત્ર (Monsoon Session)માં આ મુદ્દો ઉઠાવવામાં આવશે.
હોસ્પિટલમાં મુલાકાત: જો ખરાબ સ્વાસ્થ્ય કે અન્ય કારણોસર તેઓ માર્ચમાં સામેલ ન થઈ શકે, તો સાંસદો અને નેતાઓ હોસ્પિટલ આવીને તેમને આશ્વાસન આપે.
આંદોલનની તૈયારી અને લોકશાહી બચાવવાની હાકલ
કોકરોચ જનતા પાર્ટીના સ્થાપક અધ્યક્ષ અભિજીત દિપકેએ (Abhijeet Dipke) આ માર્ચ અંગે હુંકાર કરતા કહ્યું, "આ ભારતના ઇતિહાસની સૌથી મોટી માર્ચ થવા જઈ રહી છે. છેલ્લા ૧૦-૧૨ વર્ષથી દેશમાં લોકશાહી (Democracy) ખતમ કરવાના પ્રયાસો થઈ રહ્યા છે. જંતર-મંતર પર એક મહિના સુધી બેસીને તમે લોકોએ લોકશાહીને ફરી જીવંત કરી છે."
તેમણે વધુમાં ઉમેર્યું કે, "જ્યારે હું અમેરિકામાં હતો, ત્યારે લોકો કહેતા હતા કે કોઈ રસ્તા પર નહીં ઉતરે, આ માત્ર સોશિયલ મીડિયા ટ્રેન્ડ બનીને રહી જશે. પરંતુ આજે જંતર-મંતર તરફ જતા તમામ રસ્તાઓ ભરાઈ ગયા છે. હવે અમને સંસદ જતા કોઈ રોકી શકશે નહીં."
કડક સુરક્ષા વ્યવસ્થા અને કલમ ૧૬૩ લાગુ
CJPના આ મહાવિરોધ પ્રદર્શન પહેલા દિલ્હી પોલીસ અત્યંત સતર્ક (High Alert) છે: જંતર-મંતર, સંસદ અને અન્ય મુખ્ય સ્થળોની આસપાસ મોટી સંખ્યામાં પોલીસ દળ અને અર્ધલશ્કરી દળો તૈનાત કરવામાં આવ્યા છે. સત્તાવાળાઓએ નવી દિલ્હી જિલ્લામાં ભારતીય નાગરિક સુરક્ષા સંહિતા (BNSS) ની કલમ ૧૬૩ (અગાઉની કલમ ૧૪૪) હેઠળ નિષેધાજ્ઞા લાગુ કરી દીધી છે.
ડેપ્યુટી કમિશનર ઓફ પોલીસ (DCP) સચિન શર્માએ રવિવારે જારી કરેલી એડવાઈઝરીમાં સ્પષ્ટતા કરી છે કે આ પ્રકારની કોઈપણ વિરોધ માર્ચ કે સરઘસ માટે કોઈ પરવાનગી (Permission) માંગવામાં આવી નથી કે પોલીસ દ્વારા આપવામાં પણ આવી નથી.
