VIDEO: BJPના આ નેતાની દીકરીએ નવા શિક્ષણ મંત્રીની નિમણૂકને ગણાવી 'મજાક', CJP પ્રદર્શનને આપ્યું સમર્થન
છેલ્લું અપડેટ : 31 Jul 2026
NEET 2026 પરીક્ષા વિવાદ વચ્ચે ઉત્તર પ્રદેશના ભાજપ (BJP) નેતાની પુત્રી યશસ્વિની રાજે સિંહે પોતાની જ સરકાર સામે મોરચો ખોલ્યો છે. કોકરોચ જનતા પાર્ટી (Cockroach Janata Party - CJP) ના બેનર હેઠળ દિલ્હીના જંતર-મંતર ખાતે યોજાયેલા વિરોધ પ્રદર્શનમાં સામેલ થઈને તેમણે નવા શિક્ષણ મંત્રી પ્રહલાદ જોશી (Pralhad Joshi) ની નિમણૂકને એક 'ક્રૂર મજાક' (Sick Joke) ગણાવી છે.
જંતર-મંતર પર વિરોધ પ્રદર્શન અને સરકાર સામે આકરા પ્રહાર
યશસ્વિની રાજે સિંહ ઉત્તર પ્રદેશની ફતેહપુર સદર સીટના પૂર્વ ભાજપ ધારાસભ્ય વિક્રમ સિંહની પુત્રી છે. પ્રોફેશનલ કન્ટેન્ટ ક્રિએટર (Content Creator) તરીકે કામ કરતી યશસ્વિનીએ આંતરરાષ્ટ્રીય મીડિયા સંસ્થા 'અલ જઝીરા' (Al Jazeera) ને આપેલા ઇન્ટરવ્યુમાં કેન્દ્ર સરકારના નિર્ણયો પર ગંભીર સવાલો ઉઠાવ્યા હતા. તેમણે કેન્દ્રીય શિક્ષણ મંત્રી તરીકે પ્રહલાદ જોશીની પસંદગી અંગે વિરોધ વ્યક્ત કર્યો હતો.
પૂર્વ શિક્ષણ મંત્રી ધર્મેન્દ્ર પ્રધાનના રાજીનામા પર સવાલ
NEET પરીક્ષામાં ગડબડીના મુદ્દે Gen-Z વિદ્યાર્થીઓનું આ આંદોલન ૨૦ જૂનથી શરૂ થઈને ૩૬ દિવસ સુધી ચાલ્યું હતું. ૨૫ જુલાઈના રોજ સરકારે વિદ્યાર્થીઓની માંગણીઓ સ્વીકારી અને તત્કાલીન શિક્ષણ મંત્રી ધર્મેન્દ્ર પ્રધાને (Dharmendra Pradhan) રાજીનામું આપ્યું ત્યારે આ પ્રદર્શન સમાપ્ત થયું હતું.
યશસ્વિનીએ ધર્મેન્દ્ર પ્રધાનના રાજીનામાના પત્રની ભાષાની આલોચના કરતા જણાવ્યું હતું કે, "પત્રની ભાષામાં કોઈ પસ્તાવો કે જવાબદારીનો સ્વીકાર દેખાતો નહોતો, પરંતુ તે કોઈ 'શહીદ' (Martyr) જેવી ભાષા હતી."
CJP નું સોશિયલ મીડિયા કેમ્પેઇન અને યુવાનોનું સમર્થન
યશસ્વિનીએ CJP ના આંદોલનની પ્રશંસા કરતા જણાવ્યું હતું કે તેમણે પોતાના મેસેજ પહોંચાડવા માટે મીમ્સ (Memes) અને ઇન્સ્ટાગ્રામ (Instagram) નો શ્રેષ્ઠ ઉપયોગ કર્યો હતો. આ નવીન પદ્ધતિને કારણે રાજકારણથી દૂર રહેતા હજારો યુવાનો અને વિદ્યાર્થીઓ આ વિરોધ પ્રદર્શન સાથે જોડાયા હતા, જેને વિપક્ષી દળોનું પણ સમર્થન મળ્યું હતું.
પિતાની રાજનીતિથી રાખે છે અંતર
પોતાની કૌટુંબિક પૃષ્ઠભૂમિ અંગે વાત કરતા યશસ્વિનીએ સ્પષ્ટ કર્યું હતું કે તેઓ છેલ્લા સાડા ત્રણ વર્ષથી પોતાના પરિવારથી અલગ એકલા રહે છે અને પિતા સાથે રાજકારણ અંગે કોઈ ચર્ચા કરતી નથી. આ વૈચારિક અંતરને કારણે જ તે કોઈ પણ સંકોચ વગર સ્વતંત્ર રીતે પોતાના વિચારો રજૂ કરી શકે છે.