VIDEO: સાયબર સેલના મંચ પર જ સમય રૈનાએ પોલીસને કરી રોસ્ટ, જાણો એવું શું બોલ્યો કે CM પણ ખડખડાટ હસી પડ્યા
છેલ્લું અપડેટ : 27 Aug 2026
પ્રખ્યાત સ્ટેન્ડઅપ કોમેડિયન અને યુટ્યુબર સમય રૈનાનો એક વિડીયો સોશિયલ મીડિયા પર ખુબ જ વાઇરલ થઈ રહ્યો છે. હાલમાં જ મુંબઈમાં મહારાષ્ટ્ર સાયબર સેલ દ્વારા આયોજિત સાયબર જાગૃતિ કાર્યક્રમ યોજાયો હતો. જેમાં મહારાષ્ટ્રના મુખ્યમંત્રી દેવેન્દ્ર ફડણવીસ મુખ્ય અતિથિ તરીકે ઉપસ્થિત રહ્યા હતા. આ કાર્યક્રમ દરમિયાન સાયબર ફ્રોડ અને ડિજિટલ અરેસ્ટ સામે જાગૃતિ લાવવા માટે એક શોર્ટ ફિલ્મ અને '1930 મહારાષ્ટ્ર સાયબર એન્થમ' પણ લોન્ચ કરવામાં આવ્યું હતું. મંચ પર જ્યારે મુખ્યમંત્રી ફડણવીસે સમય રૈનાનું સન્માન કર્યું, ત્યારે સમય રૈનાએ પોતાના ખાસ અંદાજમાં પ્લેટમાંથી બિસ્કિટ ઉપાડતાં કહ્યું હતું કે, "સર, બિસ્કિટ લઈ શકું છું?" તેમના આ રમૂજી અંદાજ પર ફડણવીસ સહિત ઉપસ્થિત તમામ લોકો ખડખડાટ હસી પડ્યા હતા.
મહારાષ્ટ્ર સાયબર સેલ પર સમય રૈનાએ કરી રમૂજી ટિપ્પણી
સન્માન સ્વીકાર્યા બાદ સમય રૈનાએ પોતાના જૂના અંદાજમાં મહારાષ્ટ્ર સાયબર સેલની જ ફિરકી લીધી હતી. તેમણે મંચ પરથી સંબોધન કરતા કહ્યું હતું કે, "મહારાષ્ટ્ર સાયબર અને મારો સંબંધ ખુબ જ જૂનો છે. 1930 એ એક સુંદર નંબર છે. મેં તો આ નંબર સેવ પણ કરી લીધો છે કારણ કે મને કેટલીય વાર ત્યાંથી જ ફોન આવે છે. મહારાષ્ટ્ર સાયબર એટલું એક્ટિવ છે કે તમે ભલે અમેરિકામાં હોવ કે ભારતમાં, તેઓ તમને શોધી જ લેશે." સમય રૈનાએ વધુમાં ઉમેર્યું કે, "આજે પહેલી વાર એવું બન્યું છે કે સાયબર સેલના ઓફિસર કોમેડિયનના ઘરે ગયા અને તેને ગર્વથી ઉપાડી લાવ્યા હોય, અને આ વખતે સન્માન મળ્યું છે! ખુબ ખુબ આભાર."
2025 નો 'ઈન્ડિયાઝ ગોટ લેટેન્ટ' વિવાદ અને સાયબર પૂછપરછ
સમય રૈનાનું આ વિધાન એટલા માટે પણ ચર્ચાસ્પદ અને રસપ્રદ બન્યું છે કારણ કે વર્ષ 2025 માં તેમના ચર્ચિત શો 'ઈન્ડિયાઝ ગોટ લેટેન્ટ' (India's Got Latent) સાથે જોડાયેલા એક વિવાદ બાદ મહારાષ્ટ્ર સાયબર સેલે તેમની સામે કાયદાકીય કાર્યવાહી કરીને પૂછપરછ કરી હતી. તે સમયે વિવાદ વધતાં સમય રૈનાને પોતાના શોના એપિસોડ ડિલીટ કરવા પડ્યા હતા અને તપાસ માટે મુંબઈ સાયબર સેલ સમક્ષ હાજર થવું પડ્યું હતું.
કાયદાકીય તપાસથી લઈને સ્ટેજ સન્માન સુધીનો રસપ્રદ મોડ
જે સાયબર સેલ સાથે સમય રૈનાનો સંબંધ એક સમયે કાયદાકીય કાર્યવાહી અને પૂછપરછના કારણે અખબારોની હેડલાઇન્સમાં રહ્યો હતો, તે જ સાયબર સેલના અધિકૃત કાર્યક્રમમાં રાજ્યના મુખ્યમંત્રીના હસ્તે તેમનું સન્માન થવું એ એક અનોખો અને રસપ્રદ વળાંક માનવામાં આવી રહ્યો છે. સોશિયલ મીડિયા પર નેટિઝન્સ સમય રૈનાની આ રમૂજી શૈલી અને દેવેન્દ્ર ફડણવીસની સહજ રજૂઆતની ભારે પ્રશંસા કરી રહ્યા છે.
