VIDEO: PM મોદીનો ઈન્સ્ટાગ્રામ પર વધુ એક વીડિયો સંદેશ, નાગરિકોને કરી આ અપીલ
છેલ્લું અપડેટ : 06 Aug 2026
વડાપ્રધાન નરેન્દ્ર મોદીએ 7 ઓગસ્ટ એટલે કે 'રાષ્ટ્રીય હાથવણાટ દિવસ'ના અવસર પર ઈન્સ્ટાગ્રામ એકાઉન્ટ પરથી એક ખાસ વીડિયો મેસેજ જારી કર્યો છે. પીએમ મોદીએ દેશના ઈતિહાસ, સ્વતંત્રતા સંગ્રામ અને સ્વદેશી આંદોલનની પાયાની વાતો યાદ અપાવતા ભારતના પરંપરાગત વણકર સમુદાયને આર્થિક રીતે વધુ સશક્ત બનાવવાનું આહ્વાન કર્યું છે.
સ્વદેશી આંદોલન અને ઈતિહાસના મહત્વપૂર્ણ પ્રકરણની યાદ
વડાપ્રધાન નરેન્દ્ર મોદીએ પોતાના વીડિયો સંદેશની શરૂઆત ઈતિહાસના એક અત્યંત મહત્વપૂર્ણ પ્રકરણને યાદ અપાવીને કરી હતી. પીએમે કહ્યું, 'સાથીઓ, 1905નો 7 ઓગસ્ટ… આપણે ભૂલવાનો નથી. 7 ઓગસ્ટ 1905ના રોજ દેશની આઝાદી માટે સ્વદેશી આંદોલનનો પ્રારંભ થયો હતો અને આત્મનિર્ભર ભારતની પાયો નંખાયો હતો. અંગ્રેજો સામે દેશવાસીઓએ એક ખૂબ મોટી લડાઈ લડી હતી અને જન-જન આની સાથે જોડાઈ ગયો હતો.'
'જેમ ફ્રેન્ડશિપ ડે ઉજવ્યો, તેમ જ ઉત્સાહથી ઉજવો હેન્ડલૂમ ડે'
યુવાનો અને દેશવાસીઓ સાથે સીધા જોડાઈને પીએમ મોદીએ કહ્યું કે, 'જેમ હાલમાં જ સૌએ પૂરા ઉત્સાહ સાથે 'ફ્રેન્ડશિપ ડે' ઉજવ્યો છે, તેવી જ રીતે 7 ઓગસ્ટના રોજ 'હેન્ડલૂમ ડે' પણ ઉમંગ સાથે ઉજવાવો જોઈએ.' તેમણે વધુમાં ઉમેર્યું કે, હેન્ડલૂમ ડે ઉજવવાનો સાચો મતલબ દેશના એ ગરીબ વણકર પરિવારો સાથે ઊભા રહેવાનો છે, જેઓ પોતાના ઘરોમાં હાથવણાટના સાધનો પર પોતાના હાથથી સુંદર અને વિવિધતાથી ભરેલા કપડાં તૈયાર કરે છે.
'હેન્ડલૂમ પ્રોડક્ટ ખરીદો અને વીડિયો શેર કરો'
ગરીબ વણકર ભાઈઓ-બહેનોને આર્થિક રીતે સમૃદ્ધ બનાવવા અને 'આત્મનિર્ભર ભારત'ના સ્વપ્નને સાકાર કરવા માટે વડાપ્રધાને દેશવાસીઓને એક ખાસ ડિજિટલ પ્રવૃત્તિમાં ભાગ લેવા પ્રેરિત કર્યા હતા. તેમણે અપીલ કરી કે દરેક નાગરિક પોતે હાથવણાટથી બનેલી કોઈને કોઈ પ્રોડક્ટ કે કપડું ચોક્કસપણે ખરીદે. તે હાથવણાટની વેરાયટી સાથે એક નાનો વીડિયો કે રીલ બનાવીને તેને દુનિયા સામે સોશિયલ મીડિયા પર મૂકે. આ ઝુંબેશ દ્વારા ભારતીય વણકરોના હુનર, સામર્થ્ય અને મહેનતનો પરિચય આખી દુનિયાને કરાવી શકાશે. પીએમ મોદીએ અંતમાં તમામ દેશવાસીઓને 7 ઓગસ્ટ 'રાષ્ટ્રીય હાથવણાટ દિવસ' ની હાર્દિક શુભકામનાઓ પાઠવી હતી.
