VIDEO: દીવો પ્રગટાવ્યો, બર્થડે સોંગ ગાઈ અભિજીત દીપકે એ મનાવ્યો PM મોદીનો જન્મદિવસ, આપી ખાસ ભેટ
છેલ્લું અપડેટ : 18 Sept 2026
પ્રધાનમંત્રી નરેન્દ્ર મોદીના (PM Narendra Modi) જન્મદિવસના એક દિવસ બાદ કોકરોચ જનતા પાર્ટી (Cockroach Janata Party-CJP)ના ફાઉન્ડર અભિજીત દીપકેએ સોશિયલ મીડિયા પર એક વીડિયો શેર કર્યો છે. વીડિયોમાં તેમણે PM મોદીને જન્મદિવસની શુભેચ્છા પાઠવવાની સાથે દીવો પ્રગટાવ્યો અને ત્યારબાદ એક સરકારી સ્કૂલની જર્જરિત સ્થિતિ દર્શાવીને તેને ‘ગિફ્ટ’ તરીકે રજૂ કરી હતી.
દીવો પ્રગટાવી PM મોદીને શુભેચ્છા
વીડિયોમાં અભિજીત દીપકે એક સરકારી સ્કૂલના પરિસરમાં જોવા મળે છે. શરૂઆતમાં તેઓ દીવો પ્રગટાવે છે. તેમની આસપાસ કેટલાક લોકો પણ એકઠા થયેલા જોવા મળે છે અને તેઓ PM મોદીને જન્મદિવસની શુભેચ્છા આપતા ગીત ગાતા જોવા મળે છે.
દીવો પ્રગટાવ્યા બાદ દીપકે PM મોદીને સંબોધીને કહ્યું કે તેમના જન્મદિવસ પર દીવા પ્રગટાવવાની વાત કરવામાં આવી હતી, તેથી તેમણે એક સરકારી સ્કૂલમાં દીવો પ્રગટાવ્યો છે.
જર્જરિત સ્કૂલને ‘ગિફ્ટ’ ગણાવી
વીડિયોના આગળના ભાગમાં અભિજીત દીપકે સ્કૂલની ઇમારતની સ્થિતિ બતાવી હતી. તેમણે કટાક્ષભર્યા અંદાજમાં આ સરકારી સ્કૂલની બિલ્ડિંગને PM મોદીને ‘ગિફ્ટ’ તરીકે આપવાની વાત કરી હતી.
તેમણે સોશિયલ મીડિયા પોસ્ટમાં પણ લખ્યું હતું કે મોડેથી જન્મદિવસની શુભેચ્છા સાથે તેઓ PM મોદીને ગિફ્ટમાં એક સરકારી સ્કૂલ આપી રહ્યા છે. વીડિયોમાં સ્કૂલની જર્જરિત ઇમારત અને તેની સ્થિતિ દર્શાવવામાં આવી છે.
‘સ્કૂલ ઠીક કરો’ અભિયાન સાથે જોડાયેલું કન્ટેન્ટ
અભિજીત દીપકે છેલ્લા કેટલાક સમયથી સરકારી અને આદિવાસી સ્કૂલોની સ્થિતિને લઈને ‘સ્કૂલ ઠીક કરો’ (School Theek Karo) અભિયાન ચલાવ્યું છે. આ અભિયાન હેઠળ વિવિધ રાજ્યોની સરકારી સ્કૂલોની મુલાકાત લઈને ત્યાંની સુવિધાઓ અને ખામીઓ અંગે વીડિયો તથા સોશિયલ મીડિયા પોસ્ટ શેર કરવામાં આવી રહી છે.
લાઈવ હિન્દુસ્તાનના અગાઉના અહેવાલ મુજબ, આ અભિયાનની શરૂઆત મહારાષ્ટ્રથી થઈ હતી અને ત્યારબાદ ટીમે અન્ય રાજ્યોમાં પણ સ્કૂલોની મુલાકાત લીધી હતી. કેટલીક જગ્યાએ જર્જરિત ઇમારત, શૌચાલય અને અન્ય પાયાની સુવિધાઓ અંગે મુદ્દા ઉઠાવવામાં આવ્યા હતા, જ્યારે કેટલાક સ્કૂલોમાં સારી સુવિધાઓ પણ જોવા મળી હતી.
સોશિયલ મીડિયા પર વીડિયો ચર્ચામાં
PM મોદીના જન્મદિવસ સાથે જોડાયેલા આ વીડિયોમાં એક તરફ દીવો પ્રગટાવી શુભેચ્છા પાઠવવામાં આવી છે, જ્યારે બીજી તરફ સરકારી સ્કૂલની સ્થિતિને લઈને કટાક્ષ કરવામાં આવ્યો છે. જેના કારણે અભિજીત દીપકે શેર કરેલો વીડિયો સોશિયલ મીડિયા પર ચર્ચામાં આવ્યો છે.
અભિજીત દીપકે અગાઉ પણ સરકારી સ્કૂલોની સ્થિતિને લઈને પોતાના અભિયાન દ્વારા વિવિધ મુદ્દાઓ ઉઠાવ્યા છે. હવે PM મોદીના જન્મદિવસના સંદર્ભમાં શેર કરાયેલા આ વીડિયોમાં પણ તેમણે સરકારી શિક્ષણ વ્યવસ્થા (Government Education System) અને સ્કૂલ ઈન્ફ્રાસ્ટ્રક્ચર (School Infrastructure) તરફ ધ્યાન દોરવાનો પ્રયાસ કર્યો છે.
