Dabhoi: મોતીપુરા ગામે પૂંઠા બનાવતી ફેક્ટરીમાં ભીષણ આગ, સરસામાન બળીને ખાખ
છેલ્લું અપડેટ : 09 Aug 2025
ડભોઇ તાલુકાના મોતીપુરા ગામે આવેલી પૂંઠા બનાવતી ફેક્ટરીમાં ભીષણ આગ લાગી હતી. ટૂંક સમયમાં જ આગે વિકરાળ સ્વરૂપ ધારણ કરી લેતાં ફેક્ટરીમાં રહેલો સરસામાન ભડભડ સળગી ઉઠ્યો હતો. આગની ઘટનાને પગલે આસપાસના વિસ્તારમાં અફરાતફરીનો માહોલ સર્જાયો હતો.
ઘટનાની વિગતો
આજે વહેલી સવારે મોતીપુરા ગામે પૂંઠા બનાવતી ગારનેટ કંપનીમાં એકાએક આગ લાગી હતી. આગ એટલી ઝડપથી ફેલાઈ કે કંપનીમાં રહેલા પૂંઠા અને અન્ય સરસામાન ઝપટમાં આવી ગયા.
ફાયર બ્રિગેડની તાત્કાલિક કાર્યવાહી
આગની જાણ થતાં જ ડભોઇ, વડોદરા અને બોડેલીની ફાયર બ્રિગેડની ટીમો ઘટનાસ્થળે દોડી આવી. ફાયર બ્રિગેડે તાત્કાલિક પાણીનો મારો ચલાવી આગને કાબૂમાં લેવાના પ્રયાસો શરૂ કર્યા.
આગનું કારણ અકબંધ
આગ લાગવાનું ચોક્કસ કારણ હજુ સુધી જાણી શકાયું નથી. પ્રાથમિક તપાસમાં શોર્ટ સર્કિટ કે અન્ય કોઈ તકનીકી ખામીની શક્યતા વ્યક્ત કરવામાં આવી રહી છે, પરંતુ સ્પષ્ટ કારણ જાણવા માટે વધુ તપાસ હાથ ધરવામાં આવશે. સ્થાનિક પોલીસે પણ ઘટનાસ્થળે પહોંચીને તપાસ શરૂ કરી છે અને કંપનીના સંચાલકો પાસેથી માહિતી મેળવવામાં આવી રહી છે.
