Surendranagar/ ટોકરાળાના પાટિયા પાસે Hit and Runની ઘટના, અજાણ્યા વાહનની ટક્કરે યુવકનું મોત
છેલ્લું અપડેટ : 10 Jan 2026
સુરેન્દ્રનગર જિલ્લામાં એક તરફ વહીવટી તંત્ર દ્વારા 'માર્ગ સલામતી સપ્તાહ'ની ઉજવણી કરવામાં આવી રહી છે અને લોકોને ટ્રાફિક નિયમો પ્રત્યે જાગૃત કરવાના કાર્યક્રમો યોજાઈ રહ્યા છે, ત્યારે બીજી તરફ જિલ્લાના માર્ગો પર અકસ્માતોનો સિલસિલો યથાવત છે. સુરેન્દ્રનગરના ટોકરાળાના પાટિયા પાસે સર્જાયેલા એક ભયાનક અકસ્માતમાં એક યુવકનું કરુણ મોત નીપજ્યું છે.
હિટ એન્ડ રનની ઘટના
મળતી માહિતી મુજબ, ટોકરાળાના પાટિયા નજીક એક અજાણ્યા વાહન ચાલકે યુવકને જોરદાર ટક્કર મારી હતી. આ ટક્કર એટલી ભયાનક હતી કે યુવકનું ઘટના સ્થળે જ કમકમાટીભર્યું મોત નીપજ્યું હતું. અકસ્માત સર્જ્યા બાદ માનવતા નેવે મૂકીને અજાણ્યો વાહન ચાલક પોતાનું વાહન લઈને ઘટનાસ્થળેથી ફરાર થઈ ગયો હતો.
તંત્રની કામગીરી સામે સવાલો
વિરોધાભાસ એ વાતનો છે કે અત્યારે સમગ્ર જિલ્લામાં માર્ગ સલામતી અંગે જાગૃતિ લાવવાના પ્રયાસો થઈ રહ્યા છે, છતાં બેફામ દોડતા વાહનો પર લગામ રાખવામાં તંત્ર નિષ્ફળ સાબિત થઈ રહ્યું હોય તેવું જણાય છે. એક નિર્દોષ યુવકે પોતાનો જીવ ગુમાવતા પરિવારમાં શોકનું મોજું ફરી વળ્યું છે.
પોલીસ તપાસ શરૂ
ઘટનાની જાણ થતા જ સ્થાનિક પોલીસનો કાફલો ઘટનાસ્થળે દોડી ગયો હતો. પોલીસે યુવકના મૃતદેહને પોસ્ટમોર્ટમ માટે ખસેડી અજાણ્યા વાહન ચાલક વિરુદ્ધ ગુનો નોંધવાની તજવીજ હાથ ધરી છે. આસપાસના સીસીટીવી ફૂટેજ તપાસીને ફરાર વાહન ચાલકને પકડવા માટે ચક્રો ગતિમાન કર્યા છે.
