Surendranagar: ખનિજ માફિયા સામે મોટી કાર્યવાહી: જામવાળીમાં કાર્બોસેલની ખાણો સીઝ
છેલ્લું અપડેટ : 19 Jul 2025
સુરેન્દ્રનગર જિલ્લાના જામવાળી વિસ્તારમાં કાર્બોસેલની ખાણોમાં ગેરકાયદેસર ખનનની પ્રવૃત્તિઓ સામે પ્રાંત અધિકારીની ટીમે મોટી કાર્યવાહી હાથ ધરી છે. કાયદેસર લીઝ ધરાવતી દર્શાવવામાં આવેલી આ ખાણોમાં ખનિજ માફિયાઓ દ્વારા વર્ષોથી ગેરકાયદેસર રીતે કાર્બોસેલનું ખનન કરીને કરોડો રૂપિયાની કમાણી કરવામાં આવતી હોવાનું બહાર આવ્યું છે. આ દરોડામાં ખનિજ માફિયા વિઠલ જાગાની ખાણો સીઝ કરવામાં આવી છે, અને લગભગ 80 લાખ રૂપિયાનો મુદ્દામાલ જપ્ત કરીને કાર્યવાહી શરૂ કરવામાં આવી છે.
ગેરકાયદેસર ખનન
જામવાળીમાં આવેલી કાર્બોસેલની ખાણો પર દરોડા પાડીને ચોંકાવનારી હકીકતો બહાર લાવી છે. આ ખાણો કાયદેસર લીઝ ધરાવતી હોવાનું દર્શાવવામાં આવતું હતું, પરંતુ તપાસમાં જાણવા મળ્યું કે ખનિજ માફિયાઓ સરકારી નિયમોની ધજાગરા કરીને ગેરકાયદેસર રીતે ખનન કરી રહ્યા હતા. વિઠલ જાગા નામના ખનિજ માફિયાની આ ખાણોમાં 13 સરકારી નિયમોનું ઉલ્લંઘન કરવામાં આવતું હોવાનું બહાર આવ્યું છે, જેના કારણે આ ખાણોને સીઝ કરવાનો નિર્ણય લેવામાં આવ્યો.
પાણી ભરાયેલું હોવા છતાં 400 ટન કાર્બોસેલનો જથ્થો ખનન થયેલો દેખાડવામાં આવ્યો
આ ખાણોમાં વરસાદી પાણી ભરાયેલું હોવા છતાં 400 ટન કાર્બોસેલનો જથ્થો ખનન થયેલો દેખાડવામાં આવ્યો હતો. વાસ્તવમાં, વરસાદી પાણીને કારણે ખાણોમાંથી કાર્બોસેલ નીકળવું શક્ય ન હતું, પરંતુ ખનિજ માફિયાઓએ ખોટા આંકડા રજૂ કરીને સરકારની આંખોમાં ધૂળ નાખવાનો પ્રયાસ કર્યો હતો. આ ગેરરીતિ દ્વારા માફિયાઓએ કરોડો રૂપિયાની ગેરકાયદેસર કમાણી કરી હોવાનું અનુમાન છે.
આ દરોડામાં લગભગ 80 લાખ રૂપિયાનો ગેરકાયદેસર કાર્બોસેલનો જથ્થો જપ્ત કર્યો છે. આ ઉપરાંત, ખાણોમાં વપરાતા સાધનો અને મશીનરી પણ જપ્ત કરવામાં આવી છે.
