Rajkot/ ઉત્કર્ષ સ્કૂલના ત્રીજા માળેથી છાત્ર નીચે પટકાયો, મેનેજમેન્ટની શંકાસ્પદ ચુપકીદી
છેલ્લું અપડેટ : 28 Jan 2026
રાજકોટ શહેરમાંથી એક અત્યંત ચોકાવનારી અને ચકચારી ઘટના સામે આવી છે. શહેરની જાણીતી ઉત્કર્ષ સ્કૂલમાં ત્રીજા માળેથી એક વિદ્યાર્થી નીચે પટકાતા ચકચાર મચી ગઈ છે. આ ઘટનાને પગલે અનેક સવાલો ઊભા થયા છે, જ્યારે સ્કૂલ પ્રશાસન આ મામલે મૌન સેવી રહ્યું છે.
ઘટનાની વિગતો
મળતી માહિતી મુજબ, ઉત્કર્ષ સ્કૂલના કેમ્પસમાં જ સાંજના સમયે ટ્યુશન ક્લાસીસ ચાલે છે. ધોરણ 9 માં અભ્યાસ કરતો ખંજન દેસાણી નામનો વિદ્યાર્થી સાંજે 5 થી 8 ના ટ્યુશનમાં આવ્યો હતો. આ દરમિયાન તે અચાનક સ્કૂલના ત્રીજા માળેથી નીચે પટકાયો હતો.
અકસ્માત કે કાવતરું?
આ ઘટના બાદ સ્થાનિક સ્તરે અનેક ચર્ચાઓએ જોર પકડ્યું છે. પ્રાથમિક રીતે આ અકસ્માત હોવાનું જણાઈ રહ્યું છે, પરંતુ બીજી તરફ એવી પણ ગંભીર આશંકાઓ વ્યક્ત કરવામાં આવી રહી છે કે, શું કોઈ શિક્ષક અથવા અન્ય વિદ્યાર્થી દ્વારા તેને ધક્કો મારવામાં આવ્યો હતો?
સ્કૂલ મેનેજમેન્ટ અને પોલીસની ભૂમિકા
સૌથી વધુ આશ્ચર્યની વાત એ છે કે આટલી મોટી ઘટના બની હોવા છતાં સ્કૂલ મેનેજમેન્ટે આ મામલે મીડિયા સામે કંઈ પણ બોલવાનો સ્પષ્ટ ઈન્કાર કરી દીધો છે. વિદ્યાર્થી ગંભીર રીતે ઈજાગ્રસ્ત થયો હોવા છતાં, સ્કૂલ સત્તાધીશો દ્વારા પોલીસને આ અંગે કોઈ પણ પ્રકારની જાણ કરવામાં આવી નથી, જે અનેક શંકાઓ જન્માવે છે.
ઈજાગ્રસ્ત વિદ્યાર્થી ખંજન દેસાણીને તાત્કાલિક સારવાર અર્થે શહેરની એક ખાનગી હોસ્પિટલમાં ખસેડવામાં આવ્યો છે, જ્યાં તેની સારવાર ચાલી રહી છે. હાલમાં વિદ્યાર્થીની હાલત અને ઘટના પાછળનું સાચું કારણ તપાસનો વિષય બન્યું છે.
