Rajkot news: ગોંડલમાં ઉત્તરાયણના પર્વે માતમ: પતંગ ચગાવવા બાબતે લોહિયાળ જંગ, 1 યુવાનનું મોત, 4 ઈજાગ્રસ્ત
છેલ્લું અપડેટ : 14 Jan 2026
Rajkot news: રાજકોટ જિલ્લાના ગોંડલ શહેરમાં મકરસંક્રાંતિના પવિત્ર તહેવારના દિવસે જ એક હૃદયદ્રાવક ઘટના સામે આવી છે. શહેરના ભગવતપરા ગેઈટ વાળી શેરીમાં પતંગ ચગાવવા જેવી સામાન્ય બાબતે બે પરિવારો વચ્ચે થયેલી માથાકૂટ લોહિયાળ જંગમાં ફેરવાઈ ગઈ હતી. આ હિંસક અથડામણમાં એક 30 વર્ષીય યુવાનનું મોત નીપજતા સમગ્ર પંથકમાં અરેરાટી વ્યાપી ગઈ છે.
અગાસી પર પતંગના પેચ લડાવતા જામી લોહિયાળ લડાઈ
મળતી માહિતી મુજબ, ઉત્તરાયણનો તહેવાર હોવાથી ગોંડલના ભગવતપરા વિસ્તારમાં એક જ સમાજનાં બે પરિવારો પોતપોતાની અગાસી પર પતંગ ચગાવી રહ્યા હતા. પતંગ ચગાવવા દરમિયાન કોઈ અગમ્ય કારણોસર બંને પક્ષો વચ્ચે બોલાચાલી થઈ હતી. જોતજોતામાં આ વિવાદ એટલો વકર્યો કે બંને પરિવારો આમને-સામને આવી ગયા હતા અને તીક્ષ્ણ હથિયારો ઉડ્યા હતા.
તીક્ષ્ણ હથિયારોથી હુમલો: 4 લોકો ઘાયલ
આ હિંસક મારામારીમાં બંને પક્ષના કુલ 4 વ્યક્તિઓને ગંભીર ઈજાઓ પહોંચી હતી. લોહીલુહાણ હાલતમાં તમામ ઈજાગ્રસ્તોને તાત્કાલિક ગોંડલ સિવિલ હોસ્પિટલ ખાતે ખસેડવામાં આવ્યા હતા. જોકે, ઈજાઓ ગંભીર હોવાથી પ્રાથમિક સારવાર બાદ તેમને વધુ સારવાર માટે રાજકોટ સિવિલ હોસ્પિટલ રિફર કરવામાં આવ્યા હતા.
સારવાર મળે તે પહેલા જ યુવાનનું મોત
ઈજાગ્રસ્તો પૈકી અનિલભાઈ પૂંજાભાઈ લુણસિયા (ઉંમર વર્ષ 30) નામના યુવાનની હાલત અત્યંત નાજુક હતી. રાજકોટ હોસ્પિટલ પહોંચે તે પહેલા જ રસ્તામાં અનિલભાઈએ દમ તોડી દીધો હતો. યુવાનના મોત સાથે જ આ મારામારીનો બનાવ હવે હત્યાના ગુનામાં પલટાયો છે. મૃતક યુવાનના મૃતદેહને ફૉરેન્સિક પોસ્ટમોર્ટમ (PM) માટે રાજકોટ સિવિલ હોસ્પિટલના ડેડ હાઉસમાં રાખવામાં આવ્યો છે.
પોલીસ કાફલો ઘટનાસ્થળે: તપાસ તેજ
બનાવની જાણ થતા જ ગોંડલ પોલીસનો કાફલો તાત્કાલિક હોસ્પિટલ અને ઘટનાસ્થળે દોડી આવ્યો હતો. પોલીસે હોસ્પિટલ ખાતે ચુસ્ત બંદોબસ્ત ગોઠવી દીધો છે અને આ મામલે ફરિયાદ નોંધવાની તજવીજ હાથ ધરી છે. સામાન્ય પતંગના ઝઘડામાં યુવાનની હત્યા થતા ભગવતપરા વિસ્તારમાં ચુસ્ત પોલીસ પહેરો તૈનાત કરવામાં આવ્યો છે.
