Morbi/ નશામાં ધૂત 112 જન રક્ષક વાનના ચાલકે મચાવ્યો આતંક, રિક્ષા અને ઈકોને ઠોકરે લેતા 5 યુવતીઓ ઇજાગ્રસ્ત
છેલ્લું અપડેટ : 14 Jan 2026
જેમના પર જનતાની રક્ષાની જવાબદારી છે, તે જ જ્યારે જોખમ બની જાય ત્યારે સ્થિતિ કેટલી ગંભીર હોય તેનું ઉદાહરણ મોરબીમાં જોવા મળ્યું છે. મોરબીના ધરમપુર પાસે 112 જન રક્ષક વાનના ચાલકે નશાની હાલતમાં બેફામ ગાડી ચલાવી રિક્ષા અને ઈકો કારને અડફેટે લેતા મોટી દુર્ઘટના સર્જાઈ છે. આ અકસ્માતમાં કારખાનેથી પરત ફરી રહેલી 5 યુવતીઓ ગંભીર રીતે ઈજાગ્રસ્ત થઈ છે.
કારખાનેથી પરત ઘરે જતી વેળાએ સર્જાયો કાળમુખો અકસ્માત
મળતી માહિતી મુજબ, મોરબીના ધરમપુર વિસ્તારમાં કારખાનામાં કામ પતાવીને યુવતીઓ રિક્ષામાં બેસીને પોતાના ઘરે પરત ફરી રહી હતી. આ દરમિયાન સામેથી પૂરપાટ ઝડપે આવી રહેલી 112 નંબરની જન રક્ષક વાને રિક્ષા અને માર્ગમાં રહેલી ઈકો કારને જોરદાર ટક્કર મારી હતી. અકસ્માત એટલો ભયાનક હતો કે રિક્ષામાં સવાર 5 યુવતીઓને ગંભીર ઈજાઓ પહોંચી હતી.
ચાલક નશામાં હોવાનો ગંભીર આરોપ
આ અકસ્માત સર્જનાર જન રક્ષક વાનનો ચાલક નશાની હાલતમાં હોવાનો ચોંકાવનારો આરોપ લાગ્યો છે. રિક્ષા ચાલક જગદીશભાઈ અગેચાણિયાએ આ મામલે મોરબી તાલુકા પોલીસ મથકે ફરિયાદ નોંધાવી છે. લોકોમાં ભારે રોષ જોવા મળી રહ્યો છે કે સરકારી વાહન અને તે પણ ઇમરજન્સી સેવા માટેની ગાડીનો ચાલક પીધેલી હાલતમાં કેવી રીતે હોઈ શકે?
ઈજાગ્રસ્તોને સિવિલ હોસ્પિટલ ખસેડાયા
અકસ્માતમાં ઘાયલ થયેલી પાંચેય યુવતીઓને તાત્કાલિક અસરથી મોરબીની સિવિલ હોસ્પિટલ ખાતે સારવાર માટે ખસેડવામાં આવી છે. ઘટનાની જાણ થતા જ હોસ્પિટલ અને પોલીસ મથકે લોકોના ટોળા ઉમટી પડ્યા હતા.
પોલીસે નોંધ્યો ગુનો
રિક્ષા ચાલકની ફરિયાદના આધારે મોરબી તાલુકા પોલીસે જન રક્ષક વાનના ચાલક વિરુદ્ધ ગુનો દાખલ કરી કાયદેસરની કાર્યવાહી હાથ ધરી છે. પોલીસ હવે એ દિશામાં તપાસ કરી રહી છે કે શું ચાલક ખરેખર નશામાં હતો અને કયા સંજોગોમાં તેણે અકસ્માત સર્જ્યો.