VIDEO: મહેસાણા જનસેવા કેન્દ્ર પર ભારે ભીડ, કાળઝાળ ગરમીમાં તંત્ર દ્વારા પૂરતી વ્યવસ્થા ન કરાતા અરજદારોમાં રોષ
છેલ્લું અપડેટ : 13 May 2026
મહેસાણા તાલુકા જનસેવા કેન્દ્રમાં અત્યારે અરજદારોની ભારે ભીડ અને લાંબી લાઈનોના દ્રશ્યો જોવા મળી રહ્યા હતા. વહેલી સવારથી જ આવકના દાખલા જાતિના પ્રમાણપત્રો નોન-ક્રિમીલેયર અને EWS સર્ટિફિકેટ મેળવવા માટે લોકો ઉમટી પડ્યા હતા.
બપોરની કાળઝાળ ગરમી શરૂ થવા છતાં લાઈનો યથાવત રહેતા અરજદારોની હાલત કફોડી બની હતી. કલાકો સુધી તડકામાં શેકાઈને લોકો પોતાના જરૂરી દસ્તાવેજો મેળવવા મજબૂર બન્યા છે. વહીવટી તંત્ર દ્વારા ભીડને નિયંત્રિત કરવા કે ગરમી સામે રક્ષણ આપવા માટે કોઈ ખાસ વ્યવસ્થા ન હોવાથી સામાન્ય જનતામાં ભારે રોષ જોવા મળી રહ્યો હતો. જરૂરી કાગળો માટે ગરીબ અને મધ્યમ વર્ગના લોકો આકરી ગરમીમાં હાલાકી ભોગવી રહ્યા હતા.
હીટવેવ દરમિયાન શું સાવચેતી રાખવી
• દિવસ દરમિયાન તરસ ન લાગે તો પણ દર 20-30 મિનિટે પુષ્કળ પ્રમાણમાં પાણી પીતા રહો. પાણી ઉપરાંત છાશ, નારિયેળ પાણી અથવા લીંબુ અને વરીયાળીના શરબત જેવા કુદરતી પીણા લેતા રહો, જે શરીરમાં ઇલેક્ટ્રોલાઇટ્સ જાળવી રાખશે.
• હળવા રંગના, સુતરાઉ અને ઢીલા કપડાં પહેરો
• તાજો અને પચવામાં હળવો ખોરાક જ આહાર તરીકે લો. વધુ પડતા પ્રોટીનયુક્ત, મસાલેદાર, તળેલા કે વાસી ખોરાકથી બચો. કાચી ડુંગળી અને કાકડી તરબૂચ, ટેટી જેવા પાણીથી ભરપૂર ફળોનું સેવન કરો.
• શક્ય હોય ત્યાં સુધી બપોરે 12થી 4 કલાક દરમિયાન સીધા સૂર્યપ્રકાશમાં બહાર જવાનું ટાળો. જો નીકળવું જ પડે, તો માથું અને કાન રૂમાલથી ઢાંકેલા હોવા જોઈએ.
• જ્યારે તાપમાન પારો 45°C ને પાર કરે અથવા અત્યંત ગંભીર સ્થિતિ હોય ત્યારે, અત્યંત જરૂરી કામ વગર ઘરની બહાર ન નીકળો.
• દિવસમાં બે વાર ઠંડા પાણીથી સ્નાન કરો. ઘરની બારીઓ પર પડદા રાખો અને ઘરને ઠંડુ રાખો.
• ORSનું દ્રાવણ ઘરે વસાવો. ડીહાઈડ્રેશનના લક્ષણો જણાય તો તુરંત તેનો ઉપયોગ શરૂ કરો.
વિવિધ વયજૂથ માટે વિશેષ સૂચનાઓ
• બાળકો અને નવજાતને સીધા તડકાથી બચાવો. વારંવાર પાણી કે પ્રવાહી આપતા રહો. તેમને ક્યારેય બંધ પાર્ક કરેલી ગાડીમાં એકલા ન છોડો.
• જે પણ વૃદ્ધ અને બીમાર વ્યક્તિને બીપી, ડાયાબિટીસ કે હૃદયની બીમારી છે, તેમને ઠંડકવાળા વાતાવરણમાં જ રાખવા. તબિયતમાં થોડો પણ ફેરફાર જણાય તો તાત્કાલિક ધોરણે નજીકના ડૉક્ટરનો સંપર્ક કરવો.
• કામદારો અથવા શ્રમિકોએ બપોરના સમયે ભારે શારીરિક શ્રમ ટાળવો. કામના સ્થળે શેડ અને પીવાના પાણીની વ્યવસ્થા રાખવી.
• મુસાફરોએ લાંબી મુસાફરી દરમિયાન પોતાની સાથે પાણીની બોટલ અને પ્રાથમિક સારવારની કીટ અવશ્ય સાથે રાખવી.
હીટ સ્ટ્રોક અથવા લૂ લાગવાના લક્ષણો
• ખૂબ ઊંચો તાવ આવવો.
• માથામાં અસહ્ય દુખાવો અને ચક્કર આવવા.
• ઊબકા કે ઉલટી થવી.
• ત્વચા લાલ, ગરમ અને સૂકી થઈ જવી.
હીટ સ્ટ્રોક અથવા લૂ લાગ્યા બાદનો પ્રાથમિક ઉપચાર
• અસરગ્રસ્ત વ્યક્તિને તાત્કાલિક છાંયડામાં અથવા ઠંડી જગ્યાએ લઈ જવો.
• શરીર પર ઠંડા પાણીના પોતાં મૂકવા.
• જો વ્યક્તિ ભાનમાં હોય, તો તેને ધીમે-ધીમે પાણી અથવા ORS પીવડાવવું.
• તાત્કાલિક 108 એમ્બ્યુલન્સની મદદ લેવી અથવા વ્યક્તિને નજીકના દવાખાને ખસેડવો.
ઘરને કેવી રીતે રાખશો ઠંડુ?
• દિવસના સમયે બારી-બારણાં બંધ રાખીને ઘેરા રંગના પડદા લગાવો જેથી ગરમી અંદર ન આવે.
• સાંજે અને રાત્રે બારીઓ ખુલ્લી રાખો જેથી ઠંડી હવા અંદર આવી શકે.
• ધાબા પર સફેદ ચૂનો અથવા હીટ રિફ્લેક્ટિવ પેઇન્ટ લગાવવાથી પણ ઘરના તાપમાનમાં ઘટાડો કરી શકાય છે.
સામાજિક જવાબદારી
• તમારા ઘરની બહાર પક્ષીઓ માટે કુંડા અને પ્રાણીઓ માટે પાણીની વ્યવસ્થા કરવી.
• જો રસ્તા પર કોઈ વ્યક્તિ ગરમીથી બેભાન અવસ્થામાં જણાય, તો માનવતાના ધોરણે તેમને મદદ કરવી.
• ગામડામાં રહેતા લોકોએ પશુઓને સુરક્ષિત અને ઠંડી જગ્યાએ રાખવા તથા તેમના માટે પાણીની પૂરતી વ્યવસ્થા રાખવી. શક્ય હોય તો ગાય-ભેંસો માટે પંખાની પણ વ્યવસ્થા કરવી.
