VIDEO: સ્થાનિક સ્વરાજ્યની ચૂંટણીનો જંગ! ભુજની ગલીઓમાં ગુંજ્યા નારા, હર્ષ સંઘવીએ રોડ શો યોજી કાર્યકરોમાં ફૂંક્યો પ્રાણ
છેલ્લું અપડેટ : 22 Apr 2026
VIDEO: સ્થાનિક સ્વરાજ્યની આગામી ચૂંટણીઓના પડઘમ વચ્ચે કચ્છના પાટનગર ભુજમાં રાજકીય ગરમાવો જોવા મળ્યો હતો. ગુજરાતના લોકપ્રિય નેતા અને ગૃહરાજ્ય મંત્રી હર્ષ સંઘવીએ ભુજમાં એક ભવ્ય રોડ શો યોજીને ભાજપના શક્તિ પ્રદર્શનની ઝલક આપી હતી. આ રોડ શોમાં જે પ્રકારનો લોકપ્રતિસાદ મળ્યો છે, તે જોતા ચૂંટણી પહેલા જ વાતાવરણ કેસરીયા રંગે રંગાયું હોય તેવું સ્પષ્ટ દેખાઈ રહ્યું છે.
ઐતિહાસિક રૂટ પર જનમેદનીનું ઘોડાપૂર
ભુજના ઐતિહાસિક જ્યુબિલી સર્કલ ખાતે આવેલી ભાજપ કાર્યાલયથી આ રોડ શોનો ભવ્ય પ્રારંભ થયો હતો. રોડ શો શહેરના મુખ્ય માર્ગો પરથી પસાર થયો ત્યારે હર્ષ સંઘવીને નિહાળવા અને તેમનું સ્વાગત કરવા માટે લોકો રસ્તાની બંને બાજુએ મોટી સંખ્યામાં ઉમટી પડ્યા હતા. શહેરના હાર્દ સમાન વિસ્તારોમાંથી પસાર થઈને આ રેલી છઠ્ઠી બારી સુધી પહોંચી હતી. સમગ્ર માર્ગ પર ફટાકડા ફોડીને અને ફૂલોની વર્ષા કરીને ગૃહરાજ્ય મંત્રીનું ભવ્ય સ્વાગત કરવામાં આવ્યું હતું.
ભગવો માહોલ અને નારાબાજી
આ રોડ શો દરમિયાન સમગ્ર ભુજ શહેરમાં ભગવો માહોલ જોવા મળ્યો હતો. કાર્યકરો હાથમાં કેસરીયા ધ્વજ અને પાર્ટીના પ્રતીકો સાથે મોટી સંખ્યામાં જોડાયા હતા. "ભારત માતા કી જય" અને પક્ષના સમર્થનમાં થતી નારાબાજીથી વાતાવરણ ગુંજી ઉઠ્યું હતું. હર્ષ સંઘવીએ પણ ખુલ્લી જીપમાં સવાર થઈને ભુજવાસીઓનું અભિવાદન ઝીલ્યું હતું અને લોકો સાથે સીધો સંવાદ સાધીને ચૂંટણી માટેનો ઉત્સાહ વધાર્યો હતો.
