Kheda news: નડિયાદમાં પોલીસના ત્રાસથી ઘરકામ કરતી મહિલાનો ઝેર ગટગટાવીને આપઘાનો પ્રયાસ, મહિલાની સ્થિતિ નાજુક
છેલ્લું અપડેટ : 18 May 2025
Kheda news: ખેડા જિલ્લામાં આવેલા નડિયાદ શહેરમાં ગરીબ અને ઘરકામ કરી જીવન પસાર કરતી મહિલા પર મકાનમાલિકે ચોરીનો આરોપ મૂકયો હતો. જેના પગલે નડિયાદ રૂરલ પોલીસે વર્દીનો ડર બતાવી મહિલાને ચોરી કબૂલ કરવા ઢોરમાર માર્યાનો આરોપ મૂક્યો હતો. જે બાદ આઘાતમાં આવેલા મહિલાએ ઝેરી દવા પી આપઘાતનો પ્રયાસ કર્યો હતો. જે બાદ આ પીડિત મહિલાને નડિયાદની ખાનગી હોસ્પિટલમાં સારવાર માટે ખસેડવામાં આવી હતી. જ્યાં મહિલાની સ્થિતિ નાજુક જણાવવામાં આવી છે. મહિલાના પુત્રએ એસપી કચેરીમાં તપાસની અરજી આપી છે.
મળતી માહિતી અનુસાર, નડિયાદ ગ્રામ્ય પોલીસ સ્ટેશનના હદ વિસ્તારમાં પોલીસની સત્તાનો દુરુપયોગ અને દાદાગીરીના આરોપો લાગ્યા છે. ઘરકામ કરતી એક ગરીબ મહિલા પર મકાનમાલિકે ચોરીનો આરોપ મૂક્યો હતો. જે બાદ મકાનમાલિકની ફરિયાદના આધારે નડિયાદ રૂરલ પોલીસે અધૂરી તપાસ કરી અને મહિલાને વર્દીની ડર બતાવી ઢોરમાર માર્યો હોવાનો આરોપ છે. પોલીસે ચોરી કબૂલ કરવા માટે મહિલા પર દબાણ કર્યું હતું. જેના કારણે આઘાતમાં આવેલી મહિલાએ ઝેરી દવા પીને આપઘાતનો પ્રયાસ કર્યો છે.
આ ઘટનાની જાણ થતાં મહિલાને તાત્કાલિક નડિયાદની સરકારી સિવિલ હોસ્પિટલ બાદ ખાનગી એવી શ્રદ્ધા હોસ્પિટલમાં આઈસીયુમાં સારવાર માટે ખસેડવામાં આવી હતી. જ્યાં આ ગરીબ મહિલાની હાલત સ્થિર પરંતુ નાજુક જણાવવામાં આવી રહી છે. મહિલાના પુત્રએ નડિયાદ એસપી કચેરીમાં અરજી આપી, ઉચ્ચ સ્તરે તપાસ અને નડિયાદ રૂરલ પોલીસ પર કાયદેસર કાર્યવાહીની માંગ સાથે ન્યાયની માગણી કરી છે.
