VIDEO : સોમનાથ અમૃતપર્વ 2026: પીએમ મોદીએ 11 પવિત્ર તીર્થોના જળથી કર્યો કુંભાભિષેક, ખાસ ટપાલ ટિકિટ અને સિક્કાનું વિમોચન
છેલ્લું અપડેટ : 11 May 2026
વડાપ્રધાન નરેન્દ્ર મોદી સોમનાથ દાદાના સાનિધ્યમાં પધાર્યા હતા, જ્યાં સોમનાથ અમૃતપર્વ 2026 ઉત્સવના અવસરે સમગ્ર દેવભૂમિ પર ભારે ઉત્સાહ વર્તાયો હતો. આ ઐતિહાસિક મુલાકાત દરમિયાન પુનઃનિર્મિત સોમનાથ મંદિરના ઇતિહાસમાં પ્રથમવાર શિખર પર 11 પવિત્ર તીર્થોના જળથી કુંભાભિષેક કરવામાં આવ્યો હતો. આ વિધિ માટે 90 મીટર ઊંચી ક્રેનનો ઉપયોગ કરીને વિશાળ કુંભને શિખર સુધી પહોંચાડવામાં આવ્યો હતો, જેની પૂર્વતૈયારી મુખ્યમંત્રી ભૂપેન્દ્ર પટેલ અને હર્ષ સંઘવીની ઉપસ્થિતિમાં થઈ હતી.
સામાન્ય રીતે દક્ષિણ ભારતમાં પ્રચલિત એવી શુદ્ધિકરણની આ પરંપરાનો સોમનાથ પ્રથમવાર સાક્ષી બન્યું હતું. વડાપ્રધાને મંદિરમાં શાસ્ત્રોક્ત મંત્રોચ્ચાર સાથે મહાપૂજા, કુંભાભિષેક અને ધ્વજારોહણ જેવી મંગલ વિધિઓ સંપન્ન કરી હતી. આ ક્ષણને યાદગાર બનાવવા માટે તેમણે સોમનાથના આધ્યાત્મિક મહત્વને દર્શાવતી ખાસ ટપાલ ટિકિટ અને સ્મરણાત્મક સિક્કો પણ બહાર પાડ્યા હતા. આમ, પરંપરા અને આધુનિકતાના સમન્વય સાથે સોમનાથના આંગણે અનેક નવા ઇતિહાસો રચાયા હતા.
