Dwarka/ ભાણવડમાં સૂર્ય કાચબાની તસ્કરીનું નેટવર્ક ઝડપાયું, 1ની ધરપકડ
છેલ્લું અપડેટ : 23 Jan 2026
દેવભૂમિ દ્વારકા: દ્વારકા જિલ્લાના ભાણવડ પંથકમાં પ્રતિબંધિત વન્ય જીવોના વેચાણના નેટવર્કનો પર્દાફાશ થયો છે. દેવભૂમિ દ્વારકા SOG (Special Operations Group) ને મળેલી બાતમીના આધારે ભાણવડના એક કારખાનામાં દરોડા પાડીને ગેરકાયદેસર રીતે રાખવામાં આવેલા 12 સૂર્ય કાચબાઓને મુક્ત કરાવી મોટી સફળતા મેળવી છે.
અંધશ્રદ્ધાના નામે લાખોનો વેપાર
તપાસમાં બહાર આવેલી વિગતો અનુસાર, આ 'સૂર્ય કાચબા' (Star Tortoises) ને લઈને બજારમાં ભારે અંધશ્રદ્ધા પ્રવર્તે છે. એવું માનવામાં આવે છે કે આ કાચબા ઘરમાં રાખવાથી સમૃદ્ધિ આવે છે, જેના કારણે એક-એક કાચબાનું 5 થી 7 લાખ રૂપિયામાં વેચાણ થતું હતું. તસ્કરીનું આ નેટવર્ક ભાણવડના એક કારખાનામાંથી સંચાલિત થઈ રહ્યું હતું.
SOGની કાર્યવાહી અને ધરપકડ
SOGની ટીમે ચોક્કસ ઓપરેશન હાથ ધરીને અર્જુન વિજય ભગાણી નામના ઈસમની ધરપકડ કરી છે. કાર્યવાહી દરમિયાન કારખાનામાંથી 12 પ્રતિબંધિત સૂર્ય કાચબાઓ મળી આવ્યા. તમામ કાચબાઓનું સુરક્ષિત રીતે રેસ્ક્યુ કરી તેમને નવું જીવન આપવામાં આવ્યું છે. આરોપી વિરુદ્ધ વન્ય પ્રાણી સંરક્ષણ અધિનિયમ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.
વધુ તપાસનો ધમધમાટ
પકડાયેલા આરોપી અર્જુન પાસેથી પોલીસને અન્ય કેટલીક મહત્ત્વની કડીઓ મળવાની પૂરેપૂરી શક્યતા છે. આ કાચબા ક્યાંથી લાવવામાં આવ્યા હતા અને તેના ગ્રાહકો કોણ હતા, તે દિશામાં SOG એ તપાસ તેજ કરી છે. આ રેકેટમાં હજુ પણ અન્ય મોટા માથાઓ સામેલ હોવાની આશંકા સેવાઈ રહી છે.