VIDEO: Chhota Udaipur / દીપડાના હુમલાથી માસૂમ બાળકીનું મોત; ગણતરીની કલાકોમાં જ પાંજરે પૂરાયો
છેલ્લું અપડેટ : 30 Jul 2026
છોટા ઉદેપુર જિલ્લાના બોડેલી તાલુકાના મોટા વાજપુર ગામે એક હૃદયદ્રાવક ઘટના સામે આવી છે. ઘર આંગણે રમી રહેલી માસૂમ બાળકી પર દીપડાએ હુમલો કરી દેતાં તેનું મોત નીપજ્યું હતું. આ ઘટનાને પગલે સમગ્ર મોટા વાજપુર અને આસપાસના ગ્રામ્ય પંથકમાં અરેરાટી સાથે ભારે ભયનો માહોલ વ્યાપી ગયો છે.
ઘર આંગણે રમતી બાળકી પર કર્યો ત્રાટક
મળતી માહિતી મુજબ, મોટા વાજપુર ગામે ઘર આંગણે 4 વર્ષીય ભવ્યા રાઠવા રમી રહી હતી. આ દરમિયાન અચાનક ધસી આવેલા દીપડાએ બાળકી પર હુમલો કરી દીધો હતો. દીપડાના પંજા અને દાંત વાગવાથી બાળકીને ગંભીર ઇજાઓ પહોંચી હતી. ઘટના બાદ પરિવારજનો અને ગ્રામજનો એકઠા થઈ ગયા હતા અને લોહીલુહાણ હાલતમાં ગંભીર રીતે ઘવાયેલી બાળકીને તાત્કાલિક સારવાર અર્થે જાંબુઘોડા સામૂહિક આરોગ્ય કેન્દ્ર (CHC) ખાતે ખસેડવામાં આવી હતી. જ્યાં ફરજ પરના તબીબોએ બાળકીને તપાસીને મૃત જાહેર કરી હતી. આ સમાચાર મળતાં જ બાળકીના પરિવાર પર દુઃખનો પહાડ તૂટી પડ્યો હતો.
વન વિભાગે પાંજરું ગોઠવી દીપડાને પાંજરે પૂર્યો
ઘટનાની જાણ થતાં જ વન વિભાગની ટીમ તાત્કાલિક ઘટનાસ્થળે દોડી આવી હતી. ગ્રામજનોમાં વ્યાપેલી દહેશતને દૂર કરવા અને હિંસક દીપડાને પકડવા માટે વન વિભાગ દ્વારા તાબડતોબ વિસ્તારમાં પાંજરા ગોઠવવામાં આવ્યા હતા. વન વિભાગની ત્વરિત કામગીરીને પગલે કલાકોની ગણતરીમાં જ હુમલાખોર દીપડો પાંજરે પૂરાઈ ગયો હતો, જેનાથી સ્થાનિકોએ રાહતનો શ્વાસ લીધો છે.
