Chhota Udaipur / પાવી જેતપુર પાસે ટ્રક-ટ્રેલરે બાઇકને અડફેટે લેતા 2 યુવકોના મોત, પાવગઢ દર્શન કરવા ગયા હતા
છેલ્લું અપડેટ : 27 Apr 2026
છોટા ઉદેપુર જિલ્લાના પાવી જેતપુર તાલુકાના વંકુટિર ગામ પાસે એક ભીષણ અકસ્માત સર્જાયો હતો. પાવાગઢ ખાતે માતાજીના દર્શન કરીને બાઈક પર પરત ફરી રહેલા મધ્ય પ્રદેશના બે યુવકોને કાળમુખા ટ્રક-ટ્રેલરે અડફેટે લેતા બંનેના ઘટનાસ્થળે જ કરુણ મોત નિપજ્યાં હતા. આ અકસ્માતને પગલે હાઈવે પર લોકોના ટોળેટોળા ઉમટી પડ્યા હતા.
મળતી માહિતી અનુસાર, મધ્ય પ્રદેશના અલીરાજપુર જિલ્લાના મંડાર ગામના બે મિત્રો શૈતાન મેહડા અને રાયમલ મેહડા બાઈક લઈને પાવાગઢ દર્શન કરવા આવ્યા હતા. માતાજીના દર્શન કરીને પરત ફરી રહ્યા હતા ત્યારે પાવી જેતપુરના વંકુટિર પાસે પૂરપાટ ઝડપે આવી રહેલા એક ટ્રેલરે તેમની બાઈકને જોરદાર ટક્કર મારી હતી. ટક્કર એટલી ભીષણ હતી કે બંને યુવકો રોડ પર પટકાયા હતા અને ગંભીર ઈજાઓ થવાને કારણે સ્થળ પર જ દમ તોડ્યો હતો.
અકસ્માતની જાણ થતા જ પાવી જેતપુર પોલીસનો કાફલો ઘટનાસ્થળે દોડી આવ્યો હતો. પોલીસે બંને મૃતદેહોને પોસ્ટમોર્ટમ અર્થે સરકારી હોસ્પિટલમાં ખસેડવાની તજવીજ હાથ ધરી હતી અને અકસ્માત સર્જી ફરાર થઈ ગયેલા ટ્રેલર ચાલક વિરુદ્ધ ગુનો નોંધી તેને ઝડપી પાડવા ચક્રો ગતિમાન કર્યા છે.
