VIDEO: "પોરબંદરની શાન હવે અંકલેશ્વરના આંગણે: ભાવપરાના કલાકારોએ મણિયારા રાસની અદભુત રમઝટ બોલાવી"
છેલ્લું અપડેટ : 31 Dec 2025
VIDEO: ભરૂચ જિલ્લાના ઔદ્યોગિક હબ અંકલેશ્વરમાં સૌરાષ્ટ્રની સાંસ્કૃતિક વિરાસતનો અનોખો સંગમ જોવા મળ્યો હતો. અંકલેશ્વરના જીઆઇડીસી સ્થિત નવજીવન ગરબા ગ્રાઉન્ડ ખાતે નવદુર્ગા મિત્ર મંડળ અને ભરૂચ જિલ્લા મહેર સમાજ દ્વારા પોરબંદરના સુપ્રસિદ્ધ 'મણિયારા રાસ'નું ભવ્ય આયોજન કરવામાં આવ્યું હતું.
પરંપરાગત વેશભૂષા અને સંસ્કૃતિનું દર્શન
પોરબંદર જિલ્લાના ભાવપરા ગામના 'શ્રી આવડ રાસ મંડળ' દ્વારા પ્રસ્તુત આ કાર્યક્રમમાં કલાકારોએ મહેર સમાજની આગવી ઓળખ સમાન પરંપરાગત વેશભૂષા ધારણ કરી હતી. ઢોલના તાલે અને મણિયારાના છંદો સાથે કલાકારોએ જે રીતે સમૂહ નૃત્ય રજૂ કર્યું, તેણે ઉપસ્થિત તમામ લોકોને મંત્રમુગ્ધ કરી દીધા હતા. આ રાસ દ્વારા મહેર સમાજની શૌર્યગાથા અને સમૃદ્ધ સાંસ્કૃતિક ધરોહરને જીવંત કરવામાં આવી હતી.
નવી પેઢીને સંસ્કાર સિંચનનો હેતુ
કાર્યક્રમનો મુખ્ય ઉદ્દેશ્ય મહેર સમાજનો ઇતિહાસ, પરંપરા અને સંસ્કૃતિને નવી પેઢી સુધી પહોંચાડવાનો હતો. ઉદ્યોગ જગતના અગ્રણીઓની હાજરીમાં યોજાયેલા આ કાર્યક્રમમાં સંસ્કૃતિ અને આધુનિકતાનો સમન્વય જોવા મળ્યો હતો.
મહાનુભાવોની પ્રેરક ઉપસ્થિતિ
આ સાંસ્કૃતિક સંધ્યામાં અંકલેશ્વર ઉદ્યોગ મંડળ (AIA)ના પ્રમુખ વિમલ જેઠવા, સેક્રેટરી નિલેશ પટેલ, નોટીફાઇડ એરિયા ઓથોરિટીના ચેરમેન પ્રબોધ પટેલ સહિત અનેક ઉદ્યોગપતિઓ અને સામાજિક અગ્રણીઓ ઉપસ્થિત રહ્યા હતા. નવદુર્ગા મિત્ર મંડળના સુરેશ પટેલ અને વાલમજી દેસાઈ જેવા આગેવાનોએ આ કાર્યક્રમને સફળ બનાવવા જહેમત ઉઠાવી હતી.