Ahmedabad news: "ધોલેરાના પીપળીમાં ખનીજ માફિયાઓનો પર્દાફાશ! હિટાચી-ડમ્પર સીઝ
છેલ્લું અપડેટ : 31 Dec 2025
VIDEO: અમદાવાદ ગ્રામ્ય વિસ્તારોમાં લાંબા સમયથી ચાલી રહેલા ગેરકાયદેસર ખનન પ્રવૃત્તિઓ સામે ખાણ ખનીજ વિભાગે લાલ આંખ કરી છે. ધોલેરા તાલુકાના પીપળી ગામે ગુપ્ત બાતમીના આધારે દરોડા પાડીને ગેરકાયદેસર માટી ખનનનું મોટું કૌભાંડ ઝડપી પાડવામાં આવ્યું છે. આ કાર્યવાહીથી ભૂમાફિયાઓમાં ફફડાટ વ્યાપી ગયો છે.
2 કરોડના વાહનો અને મશીનરી જપ્ત
દરોડા દરમિયાન ખનીજ વિભાગની ટીમે સ્થળ પરથી ગેરકાયદેસર માટી ખોદકામ કરતા ૧ હિટાચી મશીન અને ૩ ડમ્પર મળી કુલ ૨ કરોડ રૂપિયા જેવો માતબર મુદ્દામાલ જપ્ત કર્યો છે. આ તમામ વાહનોને સીઝ કરીને કાયદેસરની કાર્યવાહી માટે ધોલેરા પોલીસ સ્ટેશન ખાતે સોંપવામાં આવ્યા છે.
દંડનીય કાર્યવાહીની તૈયારી
ખનીજ વિભાગના અધિકારીઓના જણાવ્યા મુજબ, માત્ર વાહનો સીઝ કરવાથી કાર્યવાહી અટકશે નહીં. હવે ટેકનિકલ ટીમ દ્વારા ખોદકામ કરવામાં આવેલા સ્થળની ચોક્કસ માપણી કરવામાં આવશે. કેટલી માટી ગેરકાયદેસર રીતે ઉલેચવામાં આવી છે તેના આધારે ભૂમાફિયાઓને લાખો રૂપિયાનો મસમોટો દંડ ફટકારવામાં આવશે.
ગ્રામ્ય વિસ્તારોમાં ખનનનું હબ: તંત્ર સામે સવાલ?
અમદાવાદ ગ્રામ્યના બાવળા, ધોળકા, સાણંદ, ધોલેરા અને દસકોઈ તાલુકાઓમાં મોટા પાયે ગેરકાયદેસર રેતી અને માટી ખનન થઈ રહ્યું હોવાની ફરિયાદો ઉઠી રહી છે. જોકે, ખનીજ વિભાગ તો કાર્યવાહી કરે છે, પરંતુ સૌથી મોટો સવાલ એ ઉભો થાય છે કે સ્થાનિક પોલીસની નાક નીચે આટલા મોટા પાયે મશીનો ચાલે છે છતાં પોલીસ કેમ અજાણ છે? શું સ્થાનિક પોલીસ અને ભૂમાફિયાઓ વચ્ચે કોઈ છુપી મિલીભગત છે? આ પ્રશ્ન હાલ ચર્ચાનું કેન્દ્ર બન્યો છે.
