Video/ Anandમાં ખનન માફિયાઓનું ‘ડિજિટલ નેટવર્ક’: રેડ પડે તે પહેલા જ થઈ જાય છે ખેલ ખતમ!
છેલ્લું અપડેટ : 21 Dec 2025
ગુજરાતના આણંદ જિલ્લામાં ખનીજ માફિયાઓ જાણે કાયદાથી બે ડગલાં આગળ હોય તેવી સ્થિતિ સર્જાઈ છે. હાલમાં સોશિયલ મીડિયામાં વાયરલ થયેલા એક ઓડિયોએ ખળભળાટ મચાવ્યો છે, જેમાં દાવો કરવામાં આવ્યો છે કે ખનન માફિયાઓ પાસે ખાણ-ખનીજ વિભાગ અને વિજિલન્સ ટીમની હલચલની પળેપળની વિગતો પહોંચી રહી છે.
વહીવટી તંત્ર પર માફિયાઓની ‘વોચ’
વાયરલ ઓડિયો પરથી એવું પ્રસ્થાપિત થઈ રહ્યું છે કે માફિયાઓએ સોશિયલ મીડિયામાં એવા ગ્રુપ બનાવ્યા છે, જેમના દ્વારા સરકારી અધિકારીઓ ક્યારે ઓફિસથી નીકળે છે અને કયા રૂટ પર જઈ રહ્યા છે તેની માહિતી સતત અપડેટ કરવામાં આવે છે. આ જ કારણ છે કે મોટાભાગના કિસ્સાઓમાં વિજિલન્સની ટીમ ઘટનાસ્થળે પહોંચે તે પહેલા જ ખનન પ્રવૃત્તિ બંધ થઈ જાય છે અને માફિયાઓ ફરાર થઈ જાય છે.
ઓડિયોમાં તપાસની સચોટ વિગતોનો ઈશારો
વાયરલ ઓડિયોમાં સાંભળવા મળે છે કે માફિયાઓ પાસે કઈ ટીમ રેડ માટે આવવાની છે અને કયા વિસ્તારમાં તપાસ થવાની છે તેની સંપૂર્ણ જાણકારી હોય છે. GSTV આ વાયરલ ઓડિયોની સત્યતા કે અધિકૃતતાની પુષ્ટિ કરતું નથી.
માહિતી લીક કોણ કરે છે? સિસ્ટમ સામે સવાલ
આ ઘટનાએ અનેક વેધક પ્રશ્નો ઊભા કર્યા છે. શું સિસ્ટમની અંદરથી જ કોઈ માફિયાઓને માહિતી પૂરી પાડે છે? કાયદાની આંખ સામે જ કાયદાને ચકમો આપનાર આ માફિયાઓનું નેટવર્ક કોણ તોડશે? શું માહિતી લીક કરનારાઓ સામે પ્રશાસન કોઈ કડક પગલાં લેશે? આણંદ જિલ્લામાં ખનિજ ચોરીને રોકવા માટે હવે સિસ્ટમે માત્ર જમીન પર જ નહીં, પણ આવા 'ડિજિટલ નેટવર્ક' સામે પણ લાલ આંખ કરવી પડશે.
