VIDEO: અમદાવાદમાં 'ડબલ સિઝન'નો ડંખ: સોલા સિવિલમાં એક જ અઠવાડિયામાં 13,000થી વધુ દર્દીઓનો ધસારો
છેલ્લું અપડેટ : 03 Jan 2026
VIDEO: અમદાવાદ શહેરમાં છેલ્લા કેટલાક દિવસોથી અનુભવાતી બેવડી ઋતુ (સવારે ઠંડી અને બપોરે ગરમી)ની સીધી અસર નાગરિકોનાં આરોગ્ય પર જોવા મળી રહી છે. વાતાવરણમાં આવતા સતત ઉતાર-ચઢાવને કારણે વાયરલ ઈન્ફેક્શન અને મચ્છરજન્ય રોગોમાં નોંધપાત્ર વધારો થયો છે.
સોલા સિવિલમાં દર્દીઓનો ભારે ધસારો
શહેરની અગ્રણી સરકારી હોસ્પિટલ પૈકીની એક એવી સોલા સિવિલ હોસ્પિટલમાં છેલ્લા એક સપ્તાહમાં દર્દીઓની સંખ્યામાં મોટો ઉછાળો જોવા મળ્યો છે. મળતી માહિતી અનુસાર, માત્ર સાત દિવસમાં 13,446 દર્દીઓએ OPD (બહારના દર્દીઓનો વિભાગ)માં સારવાર લીધી છે. આ આંકડો સૂચવે છે કે શહેરમાં હાલમાં મોટા પાયે લોકો શરદી, ઉધરસ અને તાવ જેવી સમસ્યાઓનો સામનો કરી રહ્યા છે.
ડૅન્ગ્યૂ અને મલેરિયાના આંકડા
ઋતુ બદલાવાની સાથે મચ્છરજન્ય બીમારીઓ પણ માથું ઊંચકી રહી છે. સોલા સિવિલ હોસ્પિટલ દ્વારા લેવામાં આવેલા સેમ્પલ્સના રિપોર્ટ ચિંતાજનક છે:
ડૅન્ગ્યૂ: કુલ 72 સેમ્પલ ટેસ્ટ કરવામાં આવ્યા હતા, જેમાંથી 5 કેસ પોઝિટિવ નોંધાયા છે.
મેલેરિયા: કુલ 480 સેમ્પલના પરીક્ષણ કરવામાં આવ્યા હતા, જેમાંથી 6 દર્દીઓ મલેરિયા પોઝિટિવ મળી આવ્યા છે.
તબીબી નિષ્ણાતોનો અભિપ્રાય
આ અંગે સોલા સિવિલ હોસ્પિટલના એ.આર.એમ.ઓ. ડૉ. કિરણ ગોસ્વામીએ જણાવ્યું હતું કે, "વાતાવરણમાં આવતા ફેરફારને કારણે ઈન્ફેક્શન ફેલાય છે, જેના કારણે તાવ અને શરદીના કેસો વધતા હોય છે. જોકે, આમાં ગભરાવાની જરૂર નથી. જે લોકોની રોગપ્રતિકારક શક્તિ સારી હોય છે, તેઓ યોગ્ય દવા અને આરામથી ઝડપથી સ્વસ્થ થઈ જાય છે."
