VIDEO: ગુજરાતમાં ઉનાળાનો આકરો મિજાજ: આગામી 48 કલાકમાં તાપમાનમાં 2-3 ડિગ્રીનો વધારો થશે, જાણો ક્યારે આવશે હવામાનમાં મોટો ફેરફાર
છેલ્લું અપડેટ : 22 Mar 2026
VIDEO: ગુજરાતમાં માર્ચ મહિનામાં જ હવામાનમાં ઘણો ફેરફાર આવી ગયો છે. કયારેક આકરી ગરમી તો ક્યારેક માવઠું. ચૈત્રી નવરાત્રિમાં પણ કમોસમી વરસાદ ખાબક્યો હતો. અને હવે ઉનાળાએ પોતાનો અસલી મિજાજ બતાવવાનું શરૂ કરી દીધું છે.
હવામાન વિભાગની તાજી આગાહી મુજબ, આજથી રાજ્યના વિવિધ ભાગોમાં ગરમીના પારામાં ઉત્તરોત્તર વધારો જોવા મળશે. ખાસ કરીને અમદાવાદ સહિતના શહેરોમાં આગામી બે દિવસ દરમિયાન તાપમાનમાં 2થી 3 ડિગ્રીનો વધારો નોંધાઈ શકે છે.
અમદાવાદમાં ગરમીની સ્થિતિ
રાજ્યના પાટનગર ગણાતા અમદાવાદ શહેરમાં છેલ્લા 24 કલાકમાં 34.2 ડિગ્રી તાપમાન નોંધાયું હતું. જોકે, હવામાન વિભાગના મતે આજે તાપમાન વધીને 36 ડિગ્રી સુધી પહોંચવાની પૂરેપૂરી શક્યતા છે. આ સાથે જ સૌરાષ્ટ્રના કેશોદમાં 35 ડિગ્રી સાથે સૌથી વધુ તાપમાન નોંધાયું છે, જે દર્શાવે છે કે હવે બપોરના સમયે ઘરની બહાર નીકળવું આકરો અનુભવ સાબિત થશે.
હવામાનમાં ફેરફારના કારણો
હવામાન વિભાગના વૈજ્ઞાનિક પ્રદીપ શર્માના જણાવ્યા અનુસાર, હાલમાં પશ્ચિમ રાજસ્થાનમાં એક સાયકલોનિક સર્ક્યુલેશન સક્રિય થયું છે, જેના કારણે ગરમ પવનો ફૂંકાઈ રહ્યા છે. જોકે, રાહતની વાત એ છે કે એક નવું વેસ્ટર્ન ડિસ્ટર્બન્સ પણ સક્રિય થઈ રહ્યું છે. આ સિસ્ટમને કારણે આગામી સાત દિવસ બાદ રાજ્યના હવામાનમાં ફરી એકવાર પલટો આવવાની અને તાપમાનમાં ઘટાડો થવાની શક્યતા છે.
લોકોને સાવચેત રહેવા અપીલ
વધતી ગરમીને ધ્યાનમાં રાખીને આરોગ્ય વિભાગ દ્વારા પણ લોકોને બપોરના સમયે સીધા તડકામાં ન નીકળવા અને પૂરતા પ્રમાણમાં પાણી પીવા માટે સલાહ આપવામાં આવી છે. ખાસ કરીને ખેતીકામ કરતા શ્રમિકો અને બહાર કામ કરતા લોકોએ ગરમીથી બચવા યોગ્ય સાવચેતી રાખવી મહત્ત્વની છે.