VIDEO: ગુજરાત યુનિવર્સિટીમાં રૂ. 34 કરોડનું 'બાંધકામ કૌભાંડ'? ABVP મેદાને, સિન્ડિકેટ બેઠકમાં ભારે હોબાળો
છેલ્લું અપડેટ : 13 Apr 2026
VIDEO: રાજ્યની સૌથી મોટી અને પ્રતિષ્ઠિત ગુજરાત યુનિવર્સિટી હાલમાં વિવાદોના કેન્દ્રમાં આવી છે. યુનિવર્સિટીમાં છેલ્લા ત્રણ વર્ષ દરમિયાન થયેલા બાંધકામોમાં કરોડો રૂપિયાનો ભ્રષ્ટાચાર થયો હોવાના ગંભીર આક્ષેપો સાથે ABVP અને સિન્ડિકેટ સભ્યોએ મોરચો માંડ્યો છે. સમગ્ર મામલો હવે રાજ્ય સરકારના દરબાર સુધી પહોંચ્યો છે.
શું છે સમગ્ર વિવાદ?
મળતી માહિતી મુજબ, બે દિવસ પહેલા યોજાયેલી ગુજરાત યુનિવર્સિટીની સિન્ડિકેટ બેઠકમાં બાંધકામ કમિટી દ્વારા એક ચોંકાવનારો પ્રસ્તાવ રજૂ કરવામાં આવ્યો હતો. યુનિવર્સિટીમાં થયેલા વિવિધ બાંધકામો માટે જે મૂળ ટેન્ડર બહાર પાડવામાં આવ્યા હતા, તેના કરતા રૂપિયા 34 કરોડનો વધારાનો ખર્ચ મંજૂર કરવા માટે વિનંતી કરવામાં આવી હતી. કામ પૂર્ણ થયા બાદ આટલી મોટી રકમનો વધારાનો ખર્ચ બતાવવામાં આવતા સિન્ડિકેટ સભ્યો ચોંકી ઉઠ્યા હતા.
સિન્ડિકેટ સભ્યોનો આક્રમક અભિગમ
યુનિવર્સિટીના વહીવટમાં પારદર્શિતાના અભાવ અને ભ્રષ્ટાચારની આશંકાને જોતા સિન્ડિકેટ સભ્યોએ આ 34 કરોડના વધારાના બિલને નામંજૂર કરી દીધું છે. સભ્યોએ આક્ષેપ કર્યો છે કે બાંધકામના જે ભાવ અગાઉ નક્કી થયા હતા, તેના કરતા આટલો મોટો તફાવત કેવી રીતે હોઈ શકે? આ મામલે સિન્ડિકેટ સભ્યોએ કુલપતિ અને રજિસ્ટ્રાર પાસે લેખિતમાં ખુલાસો માંગ્યો છે.
ABVPનો વિરોધ અને સરકારમાં રજૂઆત
આ ઘટના બાદ ABVP (અખિલ ભારતીય વિદ્યાર્થી પરિષદ) દ્વારા પણ યુનિવર્સિટી કેમ્પસમાં ઉગ્ર વિરોધ પ્રદર્શન કરવામાં આવ્યું છે. વિદ્યાર્થી પાંખનો આરોપ છે કે વિદ્યાર્થીઓના ફીના નાણાંનો દુરુપયોગ કરવામાં આવી રહ્યો છે. છેલ્લા ત્રણ વર્ષના તમામ બાંધકામોની તપાસ કરવાની માંગ ઉઠી છે. આ ગંભીર ગેરરીતિની ગંધ આવતા હવે મામલો શિક્ષણ વિભાગ અને રાજ્ય સરકાર સુધી પહોંચ્યો છે, જેના કારણે આગામી દિવસોમાં મોટા ખુલાસા થવાની શક્યતા છે.
