VIDEO: Ahmedabadના એસ.જી. હાઈવે સહિતના વિસ્તારોમાં ભારે પવન સાથે ખાબક્યો કમોસમી વરસાદ
છેલ્લું અપડેટ : 05 May 2026
અમદાવાદમાં ભારે પવન સાથે કમોસમી વરસાદ ખાબક્યો છે. અમદાવાદના સેટેલાઈટ, એસ.જી. હાઈવે, બોડકદેવ, બોપલ, સિંધુભવન સહિતના વિસ્તારોમાં ગાજવીજ સાથે વરસાદ પડતા અનેક સ્થળોએ વૃક્ષો પડવાની ઘટના પણ સામે આવી છે. વરસાદને કારણે રસ્તાઓ પર પાણી ભરાતા વાહનચાલકોને હાલાકીનો સામનો કરવો પડ્યો હતો.
ગુજરાતમાં કાળઝાળ ગરમીના માહોલ વચ્ચે સૌરાષ્ટ્ર અને ઉત્તર ગુજરાતના કેટલાક વિસ્તારોમાં કમોસમી વરસાદ થયો છે. સાયક્લોનિક સર્ક્યુલેશન અને વેસ્ટર્ન ડિસ્ટર્બન્સ જેવી સિસ્ટમ સક્રિય થતાં રાજ્યના વાતાવરણમાં ફેરફાર જોવા મળી રહ્યો છે. આજે(5 મે) રાજ્યના 9 જિલ્લામાં ગાજવીજ સાથે માવઠાની આગાહી કરવામાં આવી હતી. આ દરમિયાન IMDએ બપોરે 4 વાગ્યે ત્રણ કલાકનું નાઉકાસ્ટ જાહેર કર્યું છે. જેમાં 13 જિલ્લામાં 40 કિ.મી.ની ઝડપે પવન ફૂંકાવવાની સાથે હળવા કમોસમી વરસાદનું યલો ઍલર્ટ જાહેર કર્યું હતું.
13 જિલ્લામાં ભારે પવન-વીજળી સાથે કમોસમી વરસાદનું યલો ઍલર્ટ
હવામાન વિભાગના Nowcast મુજબ, મંગળવારે(5 મે) બપોરે 4 વાગ્યાથી સાંજે 7 વાગ્યા સુધીમાં કચ્છ, નર્મદા, તાપી, ડાંગ, નવસારી, વલસાડ, રાજકોટ, બોટાદ, ભાવનગર, અમરેલી, ગીર સોમનાથ, બનાસકાંઠા, સાબરકાંઠા જિલ્લાના છૂટાછવાયા સ્થળોએ ગાજવીજ સાથે હળવા કમોસમી વરસાદની આગાહી કરી હતી. તેમજ 40 કિ.મી.ની ઝપડે પવન ફૂંકાવવાની શક્યતા છે.
9 જિલ્લામાં માવઠાની આગાહી
રાજ્યમાં ભર ઉનાળે કચ્છ-સૌરાષ્ટ્ર અને ઉત્તર ગુજરાત સહિતના જિલ્લામાં માવઠું થઈ રહ્યુ છે, ત્યારે આજે(5 મે) અરવલ્લી, મહીસાગર, દાહોદ, પંચમહાલ, છોટા ઉદેપુર, રાજકોટ, બોટાદ, અમરેલી, ભાવનગર જિલ્લાના છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી કરાઈ હતી.
