VIDEO: Ahmedabadના વટવામાં 20 ફૂટ ઊંડા ખાડામાંથી નીકળ્યા મહિલા કંકાલના અવશેષો, 'ભૂતિયા' ઘરના રહસ્ય પરથી પોલીસે ઊંચક્યો પડદો
છેલ્લું અપડેટ : 30 Apr 2026
અમદાવાદ ક્રાઇમ બ્રાન્ચે 34 વર્ષ જૂની મર્ડર મિસ્ત્રીનો ભેદ ઉકેલ્યો છે. દેહવ્યાપાર ન છોડતી મહિલાના પતિએ તેણીની કરપીણ હત્યા કરી મૃતદેહ દાટી દીધો હતો, પણ આ મામલે ક્રાઈમ બ્રાન્ચને મળેલી એક સચોટ બાતમીના આધારે તપાસનો ધમધમાટ શરુ થયો અને પીઆઇ એ.પી.જેબલિયાની ટીમે 20 ફુટ ઊંડો ખાડો ખોદ્યો હતો, જે બાદ માનવ કંકાલના અવશેષો મળતા પોલીસ, સ્થાનિક સહિત સૌ કોઈ ચોંકી ઉઠ્યા છે. આ મામલે પોલીસે વધુ તપાસ હાથ ધરી છે.
અમદાવાદના વટવા વિસ્તારની એ સાંકડી ગલીઓમાં એક મકાન એવું હતું, જેની સામે જોતા પણ લોકો ખચકાતા. જે મકાનને લોકો 'ભૂતિયા બંગલા' તરીકે ઓળખતા હતા, તેના પાયામાં એક એવી સ્ત્રીની ચીસો દટાયેલી હતી, જેનો ન્યાય મેળવવામાં ત્રણ દાયકાથી વધુનો સમય વીતી ગયો.
ભૂતકાળના અંધારામાં છુપાયેલું પાત્ર: ફરઝાના
34 વર્ષ પહેલા ધોળકાની રહેવાસી ફરઝાનાના લગ્ન સુરતમાં થયા હતા, પણ કિસ્મતને કંઈક અલગ જ મંજૂર હતું. લગ્નના એક જ વર્ષમાં છૂટાછેડા થતા ફરઝાના પાછી ધોળકા આવી. બદનામી અને આર્થિક તંગીને કારણે તેણે દેહવ્યાપારનો રસ્તો પકડ્યો. વધુ કમાણીની લાલચે તે અમદાવાદ આવી, જ્યાં તેની મુલાકાત સમસુદ્દીન સાથે થઈ હતી. સમસુદ્દીન ફરઝાનાના પ્રેમમાં પાગલ હતો. તેણે ફરઝાનાના ભૂતકાળને સ્વીકારી તેની સાથે નિકાહ કર્યા, પણ આ પ્રેમ લાંબો સમય ટક્યો નહીં.
સમસુદ્દીન પતિમાંથી કાતિલ બની ગયો
લગ્ન પછી પણ ફરઝાનાએ પોતાનો જૂનો વ્યવસાય ચાલુ રાખ્યો. સમસુદ્દીને ઘણી કોશિશ કરી કે ફરઝાના સુધરી જાય, પણ ફરઝાનાના અનેક પુરુષો સાથેના સંબંધોએ સમસુદ્દીનના મનમાં વેરની અગ્નિ ભડકાવી. તેને લાગ્યું કે પત્નીની આ હરકતો તેની સામાજિક આબરૂના ધજાગરા ઉડાવી રહી છે. બસ, એ જ પળે એક પ્રેમીમાંથી તે એક કાતિલ બની ગયો.
સમસુદ્દીને એકલો હત્યાને અંજામ આપી શકે તેમ નહોતો. તેણે પોતાના ભાઈ ઈકબાલ અને ખાસ મિત્ર અબ્દુલ કરીમને સાથે લીધા. અબ્દુલ કરીમે મર્ડર માટે વટવામાં એકલી રહેતી સાદિયા બીબીનું ઘર પસંદ કર્યું.
ષડયંત્રનો માસ્ટરપ્લાન
સાદિયા બીબીના ઘરના આંગણામાં પહેલાથી જ એક ઊંડો ખાડો ખોદવામાં આવ્યો. સમસુદ્દીન 'ગેસ્ટ' બનીને પત્ની ફરઝાનાને લઈને સાદિયા બીબીના ઘરે રાત રોકવા ગયો. મધરાતે જ્યારે આખું શહેર ઊંઘતું હતું, ત્યારે ચારેય જણાએ ફરઝાના પર હુમલો કર્યો. ફરઝાના કંઈ સમજે એ પહેલા જ તેનું ગળું દબાવી દેવામાં આવ્યું. હત્યા બાદ લાશને ઠેકાણે પાડવા માટે અગાઉથી તૈયાર રખાયેલા ખાડામાં ફરઝાનાને ફેંકી દેવામાં આવી. પુરાવા ભૂંસવા માટે હત્યારાઓએ અત્યંત ક્રૂરતા દાખવી અને ખાડામાં લાશ નાખ્યા બાદ તેના પર પાકું સિમેન્ટનું ચણતર કરી દીધું હતું.
ખાડો ખોદ્યા બાદ માનવ કંકાલના અવશેષો મળ્યા
આ બધું થઈ રહ્યું હતું ત્યારે સાદિયા બીબીનો એક સંબંધી અચાનક ત્યાં આવી ચડ્યો. તેણે લોહીલુહાણ દ્રશ્ય જોયું, પણ મોતની ધમકીએ તેને 34 વર્ષ સુધી મૌન રહેવા મજબૂર કરી દીધો. વર્ષો વીતતા ગયા. સાદિયા બીબીનું એ મકાન રહસ્યમય બની ગયું. જે કોઈ ત્યાં રહેવા આવતું તેને અજીબ અનુભવો થતા. લોકો કહેતા કે આ મકાન 'ભારે' છે. મકાન બંધ થઈ ગયું, પણ પાપ છૂપું ન રહ્યું. ક્રાઈમ બ્રાન્ચને મળેલી એક સચોટ બાતમીએ આખી તપાસનો મોરચો ખોલ્યો. પોલીસે જ્યારે જેસીબી મશીન અને મજૂરો સાથે 20 ફૂટ ઊંડો ખાડો ખોદ્યો, ત્યારે અંદરથી જે મળ્યું તે જોઈને પોલીસ અધિકારીઓ પણ સ્તબ્ધ થઈ ગયા. ખાડો ખોદ્યા બાદ ફરઝાનાના હાડપિંજરના અવશેષો મળ્યા હતા.
વર્ષોથી લોકોમાં ફાળ પાડી રહેલા 'ભૂતિયા ઘર'ના રહસ્યનો પર્દાફાશ
ફરઝાનાનો ભાઈ આજે પણ જીવિત છે. તેના DNA અને ખાડામાંથી મળેલા અવશેષોના મેચિંગ દ્વારા હવે સત્તાવાર રીતે સાબિત થશે કે આ લાશ ફરઝાનાની જ હતી. આ કિસ્સો સાબિત કરે છે કે તમે ભલે ગમે તેટલા ઊંડા ખાડામાં સત્યને દાટી દો, પણ એક દિવસ એ જમીન ચીરીને બહાર આવે જ છે. જે મકાનને લોકો ભૂતિયા ગણીને ડરતા હતા, ત્યાં ખરેખર એક અન્યાયી હત્યાનું રહસ્ય દટાયેલું હતું.