'Joy of Giving': અમેરિકાના FIA ગ્રુપ દ્વારા અમદાવાદના દિવ્યાંગ બાળકોને 100 વ્હીલચેરનું વિતરણ
છેલ્લું અપડેટ : 30 Dec 2025
અમેરિકાના પૂર્વ કિનારાના આઠ રાજ્યોમાં ભારતીય સમુદાયનું પ્રતિનિધિત્વ કરતી સૌથી મોટી બિન-નફાકારક સંસ્થા, ફેડરેશન ઓફ ઈન્ડિયન એસોસિએશન (FIA NY-NJ-CT-NE) દ્વારા સોમવારે અમદાવાદમાં એક માનવતાવાદી પહેલ કરવામાં આવી હતી. ‘જોય ઓફ ગિવિંગ’ અભિયાન અંતર્ગત અમદાવાદના અપંગ માનવ મંડળ ખાતે દિવ્યાંગ બાળકોને વ્હીલચેરનું વિતરણ કરવામાં આવ્યું હતું.
સમગ્ર ભારતમાં 500 વ્હીલચેર આપવાનો લક્ષ્યાંક
આ કાર્યક્રમમાં અમદાવાદના જરૂરિયાતમંદ બાળકોને 100 વ્હીલચેર અર્પણ કરવામાં આવી હતી. આ FIAની ભારતભરમાં કુલ 500 વ્હીલચેર દાન કરવાની મોટી યોજનાનો એક ભાગ છે. બાકીની 400 વ્હીલચેર આગામી સમયમાં ભારતના અન્ય રાજ્યોમાં વિતરીત કરવામાં આવશે, જેથી દિવ્યાંગ બાળકોની ગતિશીલતા અને આત્મનિર્ભરતામાં વધારો કરી શકાય.
રૂપિયા 20 લાખનો સેવાકીય પ્રોજેક્ટ
આશરે રૂપિયા 20 લાખના ખર્ચે શરૂ કરાયેલ આ ‘જોય ઓફ ગિવિંગ’ પહેલ FIAના હોદ્દેદારો અને દાતાઓના સહયોગથી શક્ય બની છે. જેમાં FIA 2026ના પ્રમુખ શ્રીકાંત અક્કાપલ્લી, વૈદ્ય પરિવાર, બોર્ડ મેમ્બર કેની દેસાઈ, અનિલ બંસલ, વાઈસ પ્રેસિડેન્ટ પ્રીતિ રે પટેલ અને FIA 2025ના પ્રમુખ સૌરિન પરીખનું વિશેષ યોગદાન રહ્યું છે.
સંદેશ: ‘દરેક બાળકને આગળ વધવાનો અધિકાર છે’
કાર્યક્રમ દરમિયાન FIAના ચેરમેન અંકુર વૈદ્યએ જણાવ્યું હતું કે, “અપંગ માનવ મંડળની આ મુલાકાત અમારા માટે પ્રેરણાદાયી રહી છે. અહીંના વિદ્યાર્થીઓની હિંમત અને ખંત જોઈને ઘણું શીખવા મળ્યું છે. FIA ભવિષ્યમાં પણ આવા માનવતાવાદી કાર્યો ચાલુ રાખશે અને એક સમાવેશી સમાજના નિર્માણમાં ભાગીદાર બનશે.”
અપંગ માનવ મંડળના મેનેજિંગ ટ્રસ્ટી અને પ્રમુખ ક્ષિતિશ મદનમોહને FIA અને દાતાઓનો આભાર માનતા કહ્યું કે, આ ઉમદા કાર્યથી બાળકોના જીવનમાં મોટું પરિવર્તન આવશે. જનરલ સેક્રેટરી ડો. કમલ સી. શાહે આભારવિધિ કરી હતી.
FIA વિશે ટૂંકમાં
1970માં સ્થપાયેલ FIA અમેરિકામાં ભારતીય સંસ્કૃતિના જતન અને સામાજિક સેવા માટે જાણીતું છે. સંસ્થાને ભારત સરકાર દ્વારા ‘પ્રવાસી ભારતીય સન્માન’ એનાયત થયેલ છે અને તેની પાસે બે ગિનીસ વર્લ્ડ રેકોર્ડ પણ છે. વર્ષ 2026 માટે સંસ્થાની થીમ ‘હાર્મની ઈન હેરિટેજ’ રાખવામાં આવી છે.
