Ahmedabad: ઉસ્માનપુરા નજીક મોડી રાત્રે સર્જાયેલા કાર અકસ્માતે સર્જ્યો મોટો વિવાદ,...છતાં પોલીસ કેમ રહી અજાણ?
છેલ્લું અપડેટ : 18 May 2026
Ahmedabad Usmanpura Accident: અમદાવાદના આશ્રમ રોડ પર ઉસ્માનપુરા નજીક મોડી રાત્રે સર્જાયેલા એક કાર અકસ્માતે મોટો વિવાદ જગાવ્યો છે. અકસ્માત બાદ ઈજાગ્રસ્ત યુવકોએ પોલીસને ગુમરાહ કરી હોવાનો અને પોલીસે પણ આ મામલે સેટલમેન્ટ કરીને કેસ રફેદફે કરવાનો પ્રયાસ કર્યો હોવાના આક્ષેપો ઉઠ્યા છે. જોકે, અકસ્માતનો વીડિયો વાયરલ થતાં જ સમગ્ર કૌભાંડનો ભાંડો ફૂટી ગયો છે. વાયરલ વીડિયોમાં કારની અંદર દારૂની બોટલ અને અન્ય એક ક્રેટા કારની સંડોવણી સામે આવતાં હવે પોલીસે તમામ યુવકોના નવેસરથી નિવેદન નોંધી તપાસ તેજ કરી છે.
અકસ્માતની રાત્રે શું ઘટી ઘટના?
અકસ્માત કરનાર કારચાલક તમીમ સાથે ગાડીમાં હાજર અયાનખાન નજીરખાન પઠાણે નોધાવેલી ફરિયાદ અનુસાર, ગત રાત્રે આશરે 3 વાગ્યે અયાનખાન તેના મિત્રો આફતાફ, વકાર, સાહીલ અને તમીમ સાથે હેરિયર કારમાં નાસ્તો કરવા નીકળ્યા હતા. કાર તમીમ ચલાવી રહ્યો હતો. આશ્રમ રોડ પર ઉસ્માનપુરા ચાર રસ્તાથી વાડજ તરફ જતા બેન્ક સામે તમીમે કાર ફૂલ સ્પીડમાં ચલાવી સ્ટેયરિંગ પરથી કાબૂ ગુમાવી દીધો હતો. જેના કારણે કાર ડિવાઈડર પર ચડીને સીધી ઝાડ સાથે અથડાઈ ગઈ હતી.
અકસ્માત સર્જ્યા બાદ ડ્રાઈવર તમીમ તેના ઈજાગ્રસ્ત મિત્રોને ઘટનાસ્થળે જ લોહીલુહાણ હાલતમાં છોડીને ફરાર થઈ ગયો હતો. આ અકસ્માતમાં અયાનખાનને ગાલ પર, સાહીલને માથામાં અને આફતાફને હાથમાં ગંભીર ઈજાઓ પહોંચતા 108 મારફતે તેમને SVP હોસ્પિટલ ખસેડાયા હતા.
વાયરલ વીડિયોએ વધારી પોલીસની મુશ્કેલી
ઘટનાસ્થળના વાયરલ થયેલા વીડિયોમાં પોલીસ જવાન કારની અંદર તપાસ કરતો સ્પષ્ટ દેખાય છે અને કારમાં દારૂની બોટલ પણ નજરે પડે છે. તેમ છતાં, પોલીસે શરૂઆતમાં નોંધેલી ફરિયાદમાં પ્રોહિબિશન (દારૂ)ની કલમ કેમ ન ઉમેરી? તેને લઈને પોલીસની કામગીરી સામે ગંભીર સવાલો ઊભા થયા છે.
નવરંગપુરા પોલીસ સ્ટેશનમાં અલગ ગુનો
ટ્રાફિક પોલીસના જણાવ્યાનુસાર, કારના વીડિયોમાં દારૂની બોટલ મળી આવતા હવે આ મામલે કાયદેસરની કાર્યવાહી કરવા માટે નવરંગપુરા પોલીસ સ્ટેશનમાં અલગથી ગુનો દાખલ કરવાની કામગીરી શરૂ કરવામાં આવી છે. તેમજ વીડિયોમાં દેખાતો પોલીસકર્મી ERV-112ની ટીમનો છે, તેણે દારૂની બોટલ અંગે ટ્રાફિક પોલીસને કેમ જાણ ન કરી તેની પણ તપાસ કરાશે.
બી ટ્રાફિક પોલીસે શું કર્યો ઘટસ્ફોટ?
બી ટ્રાફિક પોલીસના પીઆઈ (PI) એ આ મામલે વિગતો આપતા જણાવ્યું કે, અકસ્માતનો ભોગ બનેલા યુવકોએ પોલીસને શરૂઆતથી જ ગુમરાહ કરી હતી. અકસ્માત બાદ આ યુવકોએ હોસ્પિટલમાં જઈને એવું ખોટું નિવેદન આપ્યું હતું કે તેઓ બાઇક પરથી પડી જતાં ઈજાગ્રસ્ત થયા છે. જ્યારે પોલીસને 112ની વર્ધી મળી અને ટીમ બનાવના બે કલાક પછી સ્થળ પર પહોંચી, ત્યારે ત્યાં માત્ર અકસ્માતગ્રસ્ત કાર જ પડી હતી, કોઈ માણસ હાજર નહોતો.
હોસ્પિટલમાં તપાસ દરમિયાન છોકરાઓ પીધેલી હાલતમાં નહોતા જણાયા. રાત્રે તપાસમાં પોલીસને કંઈ મળ્યું નહોતું, જેથી શક્યતા છે કે અકસ્માતના બે-અઢી કલાકના ગાળામાં જ કોઈએ અંદરથી દારૂની બોટલ સગેવગે કરી દીધી હોય. યુવકોએ ફરિયાદમાં માત્ર અકસ્માતનો જ ઉલ્લેખ કર્યો હતો, પરંતુ વીડિયો સામે આવ્યા બાદ ખબર પડી કે આ રેસિંગ કે અકસ્માતમાં એક ક્રેટા કાર પણ સામેલ હતી.
પોલીસની ચેતવણી
ટ્રાફિક પોલીસે સ્પષ્ટ કર્યું છે કે અન્ય એક કારના નંબરના આધારે તેની વિગતો કઢાવવામાં આવી રહી છે. ફરિયાદ નોંધાવનાર અયાનખાનના આધારે અકસ્માત સમયે હાજર તમામ યુવકોને ફરીથી પોલીસ સ્ટેશન બોલાવીને તેમના નવેસરથી કડક નિવેદન લેવામાં આવશે. વીડિયો ફૂટેજના આધારે અકસ્માત સમયે ગાડી કોણ ચલાવતું હતું અને કઈ કઈ કાનૂની કલમોનો ભંગ થયો છે તેની ઊંડાણપૂર્વક તપાસ કરીને તમામ દોષિતો સામે કડક કાયદેસરના પગલાં લેવાશે.
