VIDEO: ANDARNI VAAT / પૂંચમાં કુદરતનો પ્રકોપ: સુરણકોટમાં ભારે તારાજી, કરોડોનું મટિરિયલ બરબાદ!
છેલ્લું અપડેટ : 20 Jul 2026
જમ્મુ-કાશ્મીરના પૂંચ જિલ્લાના સુરણકોટ સેક્ટરમાં આવેલા ડુંડક વિસ્તારમાં અચાનક ત્રાટકેલા ભયાનક પૂરે ભારે તબાહી મચાવી છે. અહીં ૩૫ કિલોમીટર લાંબા રાષ્ટ્રીય ધોરીમાર્ગ 144ના નિર્માણ કાર્યમાં રોકાયેલી એજી શ્રી ગિરિરાજ ઇન્ફ્રા પ્રાઇવેટ લિમિટેડ SGI કંપનીના વર્ક કેમ્પમાં પૂરના પાણી ઘૂસી જતાં અબજો રૂપિયાનું આર્થિક નુકસાન થયું છે. કંપનીના ક્વોલિટી મેનેજર સલિન્દર પ્રતાપ યાદવના જણાવ્યા અનુસાર, પૂરના પ્રચંડ પ્રવાહમાં કન્સ્ટ્રક્શન મટિરિયલ, મશીનરીના કિંમતી પાર્ટ્સ અને અંદાજે ૫૦૦૦ થી ૬૦૦૦ સિમેન્ટની બોરીઓ સંપૂર્ણપણે પાણીમાં ગરકાવ થઈને નાશ પામી છે. પ્રાથમિક અંદાજ મુજબ આ કુદરતી આફતમાં કંપનીને આશરે ૩ પોઈન્ટ ૫૪ કરોડનું મોટું આર્થિક નુકસાન વેઠવાનો વારો આવ્યો છે. હાલમાં પૂરના ધસમસતા પ્રવાહને ડાયવર્ટ કરવા અને કેમ્પના બાકી બચેલા હિસ્સાને વધુ નુકસાનથી બચાવવા માટે જેસીબી મશીનો દ્વારા યુદ્ધના ધોરણે કામગીરી ચાલી રહી છે.
કંપનીના વરિષ્ઠ કર્મચારી ગૌરવ કુમારે વિગતો આપતાં જણાવ્યું હતું કે, આ પૂર વહેલી સવારે ૪ વાગ્યે એટલી અચાનક આવ્યું હતું કે કેમ્પમાં હાજર કર્મચારીઓ અને શ્રમિકોને સંભળવાનો કે સામાન ખસેડવાનો સહેજ પણ સમય મળ્યો ન હતો. કંપની છેલ્લા ત્રણ વર્ષથી આ મહત્વકાંક્ષી રોડ પ્રોજેક્ટ પર કામ કરી રહી છે, પરંતુ આવી અણધારી આફતે કામગીરીને સંપૂર્ણપણે ખોરવી નાખી છે. હવામાન વિભાગ દ્વારા આગામી ૨૫ જુલાઈ સુધી વિસ્તારમાં ભારે વરસાદ અને પૂરની ગંભીર ચેતવણી જારી કરવામાં આવી છે, જેને ધ્યાનમાં રાખીને પ્રશાસન અને કંપની દ્વારા તમામ શ્રમિકોને તાત્કાલિક અસરથી સુરક્ષિત સ્થળોએ ખસેડવાની કામગીરીને સર્વોચ્ચ અગ્રતા આપવામાં આવી રહી છે. પહાડી વિસ્તારોમાં સતત વણસી રહેલી પરિસ્થિતિ પર વહીવટી તંત્ર પણ ખૂબ જ બારીકાઈથી નજર રાખી રહ્યું છે.
બ્યૂરો રિપોર્ટ જીએસટીવી
