VIDEO: સિક્કિમના રિંબીમાં પહાડ ધસ્યા ભયાનક ભૂસ્ખલનમાં અનેક ઘરોને થયું ભારે નુકસાન!
છેલ્લું અપડેટ : 25 Sept 2026
સિક્કિમના રિંબીમાં પહાડ ધસ્યા
ભયાનક ભૂસ્ખલનમાં અનેક ઘરોને થયું ભારે નુકસાન!
સિંગલીતામ અને રિંબીમાં મડસ્લાઇડથી આફત
પશ્ચિમ સિક્કિમના રિંબી ગામ અને તેના આસપાસના વિસ્તારોમાં સતત વરસી રહેલા આફતના વરસાદના કારણે ભયાનક ભૂસ્ખલન સર્જાયું છે. સતત માટી અને પથ્થરો ધસી પડતાં સ્થાનિક નિવાસી મકાનોને મોટું નુકસાન પહોંચ્યું છે. પહાડનો એક મોટો હિસ્સો નીચે સરકી આવતાં અનેક ઘરો કાટમાળ હેઠળ દબાઈ ગયા છે, જેના કારણે પ્રદેશમાં ભારે અફરાતફરી અને ભયનો માહોલ વ્યાપી ગયો છે. રિંબી ઉપરાંત સિંગલીતામ વિસ્તારમાં પણ તાજા ભૂસ્ખલનના કારણે કાદવ-કચરાનો મોટો ધસમસતો પ્રવાહ રસ્તાઓ પર ફરી વળ્યો છે. આ હોનારતથી સ્થાનિક રહીશોની સુરક્ષા સામે ગંભીર જોખમ ઊભું થયું છે. માર્ગો પર માટી અને વિશાળ શિલાઓ જમા થઈ જતાં વાહનવ્યવહાર ઠપ થઈ ગયો છે, જેનાથી પહાડી ગામડાઓની માર્ગીય કનેક્ટિવિટી તૂટી ગઈ છે અને ગ્રામજનો પોતાના જ વિસ્તારોમાં સંપર્કવિહોણા બની ગયા છે.
રોડ કનેક્ટિવિટી ઠપ થતા નાગરિકો અટવાયા!
કાદવના પ્રવાહ વચ્ચે યુદ્ધના ધોરણે રાહત કામગીરી શરૂ!
ઘટનાની ગંભીરતાને ધ્યાનમાં રાખીને જિલ્લા પ્રશાસન અને સ્થાનિક રાહત ટુકડીઓ તાત્કાલિક હરકતમાં આવી ગઈ છે. અસરગ્રસ્ત વિસ્તારોમાં તાકીદે રાહત અને પુનઃસ્થાપન કામગીરી હાથ ધરવામાં આવી છે. જોખમી મકાનોમાં રહેતા લોકોને સુરક્ષિત આશ્રયસ્થાનોમાં ખસેડવામાં આવી રહ્યા છે, જ્યારે જેસીબી અને હેવી મશીનરીની મદદથી રસ્તાઓ પરથી કાટમાળ હટાવીને કનેક્ટિવિટી પૂર્વવત કરવાની કામગીરી યુદ્ધના ધોરણે ચાલી રહી છે. સિક્કિમ જિલ્લા પ્રશાસન દ્વારા જાહેર કરાયેલા તાજેતરના દ્રશ્યોમાં ભૂસ્ખલનથી ક્ષતિગ્રસ્ત થયેલા મકાનો, રસ્તાઓ પર ભરાયેલો ગંદો કાદવ અને બચાવ કામગીરીમાં જોડાયેલી ટીમો સ્પષ્ટ જોઈ શકાય છે. સતત વરસી રહેલા વરસાદના કારણે પુનઃ ભૂસ્ખલન થવાની ભીતિ સેવાઈ રહી છે. તંત્ર દ્વારા સમગ્ર પશ્ચિમ સિક્કિમમાં એલર્ટ જાહેર કરીને નાગરિકોને અત્યંત સાવચેત રહેવા અપીલ કરવામાં આવી છે.
બ્યૂરો રિપોર્ટ જીએસટીવી
