VIDEO: મીઠાના અગરોમાં ખુશીની હેલી
છેલ્લું અપડેટ : 26 Aug 2026
મીઠાના અગરોમાં ખુશીની હેલી
વરસાદી ઋતુમાં શ્રમિક પરિવારનું બજેટ હવે નહીં ખોરવાય
ચોમાસામાં કામકાજ ઠપ પણ આર્થિક સહારાનો ટેકો
તામિલનાડુના દરિયાકાંઠાના જિલ્લા થૂથુકુડીમાં ચોમાસાની ઋતુમાં મીઠાના અગરોનું કામકાજ સંપૂર્ણપણે ઠપ થઈ જતું હોવાથી શ્રમિકોને ભારે આર્થિક મુશ્કેલીઓનો સામનો કરવો પડે છે. આ પરિસ્થિતિને ધ્યાનમાં રાખીને તામિલનાડુ સરકાર દ્વારા અગરીયાઓ માટે વરસાદી ઋતુમાં આપવામાં આવતી જીવનનિર્વાહ રાહત રકમમાં વધારો કરવાની જાહેરાત કરવામાં આવી છે, જેને થૂથુકુડીના હજારો શ્રમિકોએ ભારે ઉત્સાહ સાથે આવકારી છે. મીઠાના અગરો અને શ્રમિક વસાહતોમાંથી આવેલા દ્રશ્યોમાં અગરીયા પરિવારના સભ્યોમાં ખુશી અને સંતોષનો માહોલ જોઈ શકાય છે. ચોમાસાના મહિનાઓ દરમિયાન વરસાદ અને પાણી ભરાવાને કારણે અગરોમાં કામ બંધ થઈ જતાં આ મજૂરોની રોજીરોટી છીનવાઈ જાય છે. આ મુશ્કેલ સમયમાં આર્થિક સહાયમાં કરાયેલો આ વધારો શ્રમિક પરિવારના દૈનિક ઘરચલાવ ખર્ચ, બાળકોના અભ્યાસ અને જીવન જરૂરિયાતો પૂરી કરવા માટે ખૂબ જ ઉપયોગી સાબિત થશે. .
રાહત ફંડ વધતાં થૂથુકુડીના મીઠા મજૂરોમાં નવો ઉત્સાહ
વરસાદની મોસમમાં જ્યારે કામ-ધંધો હોતો નથી ત્યારે અગરિયાઓ માટે પરિવારનું પેટ ભરવું મુશ્કેલ બનતું હતું, પરંતુ સરકારના આ વધારાથી તેમને મોટી આર્થિક રાહત મળશે. શ્રમિકોએ ખુશી વ્યક્ત કરતાં જણાવ્યું કે અગરીયાઓની વર્ષો જૂની માંગણી તરફ ધ્યાન આપીને સરકારે રાહત રકમ વધારી છે, જેનાથી ચોમાસાના દિવસો શાંતિથી પસાર થઈ શકશે. બંને શ્રમિકોએ આ નિર્ણય બદલ તંત્રનો આભાર માન્યો હતો. થૂથુકુડી દેશમાં મીઠાના ઉત્પાદન માટેનું મુખ્ય કેન્દ્ર છે, જ્યાં હજારો પુરુષ અને મહિલા શ્રમિકો કડક તડકામાં કામ કરીને પોતાનું ગુજરાન ચલાવે છે. આ નિર્ણયથી સ્થાનિક મજૂર યુનિયનો અને અગરીયા પરિવારોમાં હરખની હેલી જોવા મળી રહી છે. વરસાદી આફત વચ્ચે સરકારી સહાયનો આ મોટો ટેકો શ્રમિકોને ચોમાસાની ઋતુમાં આત્મનિર્ભર બનીને આર્થિક કટોકટીમાંથી ઉભરવામાં મદદરૂપ થશે.
બ્યૂરો રિપોર્ટ જીએસટીવી
