VIDEO: છોટાઉદેપુરના સરહદી ગામોમાં દુષ્કાળ જેવી સ્થિતિ વરસાદના અભાવે ડાંગરનો પાક બરબાદ!
છેલ્લું અપડેટ : 23 Sept 2026
છોટાઉદેપુરના સરહદી ગામોમાં દુષ્કાળ જેવી સ્થિતિ
વરસાદના અભાવે ડાંગરનો પાક બરબાદ!
છોટાઉદેપુર તાલુકામાં મધ્યપ્રદેશની સરહદે આવેલા પહાડી ગામોમાં ચાલુ વર્ષે નહિવત વરસાદના કારણે ડાંગરના પાકને ભારે મોટું નુકસાન પહોંચ્યું છે. આ સીમાંત વિસ્તારમાં સિંચાઈની પૂરતી સુવિધાના અભાવે મોટાભાગના ગ્રામીણ ખેડૂતો સંપૂર્ણપણે ચોમાસાના વરસાદ પર નિર્ભર રહીને ખેતી કરે છે. પરંતુ પૂરતો વરસાદ ન પડતાં ખેતરોમાં પાણીની તીવ્ર અછત સર્જાઈ છે, જેના કારણે ડાંગરનો પાક વિકાસ પામ્યા વગર જ ખેતરોમાં સુકાઈ રહ્યો છે. સ્થાનિક ખેડૂતોના જણાવ્યા મુજબ, તેમણે મોંઘા ભાવના બિયારણ, ખાતર, દવા અને મજૂરી પાછળ હજારો રૂપિયાનો ખર્ચ કર્યો હતો. પરંતુ કુદરતની રૂઠન અને સિંચાઈ માટે બોરવેલ કે નહેરોની સગવડ ન હોવાથી તેમની આખી મોસમની મહેનત અને મૂડી એળે ગઈ છે. ડાંગરનો પાક સંપૂર્ણપણે નિષ્ફળ જતાં સરહદી વિસ્તારના આદિવાસી ખેડૂતો પર આર્થિક સંકટ ઘેરાયું છે અને પરિવારનું જીવનનિર્વાહ ચલાવવું પણ મુશ્કેલ બની ગયું છે.
સિંચાઈ વગર અટવાયો જગતનો તાત
ખેતરોમાં જ સુકાઈ ગયો લાખો રૂપિયાનો પાક!
ભૌગોલિક પરિસ્થિતિના કારણે આ પહાડી ક્ષેત્રમાં અન્ય કોઈ વૈકલ્પિક સિંચાઈ વ્યવસ્થા ઉપલબ્ધ ન હોવાથી ખેડૂતોની સ્થિતિ અત્યંત કફોડી બની ગઈ છે. વાવેતર માટે લીધેલી લોન અને દેવું કેવી રીતે ભરપાઈ કરવું તેને લઈને કૃષિકારોમાં ભારે નારાજગી અને દેવાના ડુંગર નીચે દબાઈ જવાનો ભય વ્યાપી ગયો છે. ખેડૂતોએ તંત્ર સામે આક્રોશ ઠાલવતાં સ્પષ્ટ કર્યું છે કે જો વહેલી તકે સરકારી સ્તરેથી કોઈ રાહત નહીં મળે તો તેઓ પાયમાલ થઈ જશે.છોટાઉદેપુરથી સામે આવેલા દ્રશ્યોમાં પાણી વગર કરમાઈ ગયેલા ડાંગરના ખેતરો અને પોતાની આપવીતી જણાવતા ચિંતિત ખેડૂતો સ્પષ્ટ જોઈ શકાય છે. ખેડૂતોની માંગ છે કે રાજ્ય સરકાર અને પાક વિમા કંપનીઓ દ્વારા તાત્કાલિક અસરગ્રસ્ત ગામોમાં સ્પેશિયલ ટીમ મોકલીને નુકસાનીનો સર્વે કરાવવામાં આવે. પીડિત ખેડૂતોને યોગ્ય અને આર્થિક વળતર ચૂકવવામાં આવે જેથી આ મુશ્કેલ સમયમાં તેમને થોડી આશ્વાસનરૂપી રાહત મળી શકે.
બ્યૂરો રિપોર્ટ જીએસટીવી