'Toxic' માટે યશે લીધી કરોડોમાં ફી, જાણો કિયારા અડવાણી અને નયનતારાને મળ્યા કેટલા પૈસા
છેલ્લું અપડેટ : 09 Jan 2026
ગીતૂ મોહનદાસના નિર્દેશનમાં બનેલી અને યશ દ્વારા લખાયેલી ફિલ્મ 'ટોક્સિક: અ ફેરીટેલ ફોર ગ્રોન-અપ્સ' અંદાજે ₹300 થી ₹600 કરોડના જંગી બજેટમાં તૈયાર કરવામાં આવી છે. આ ફિલ્મમાં યશ મુખ્ય ભૂમિકામાં જોવા મળશે, જ્યાં તે 'રાયા' નામનું પાત્ર ભજવી રહ્યો છે. તેની દમદાર હાજરી આ ફિલ્મની સૌથી મોટી તાકાત માનવામાં આવે છે. અહેવાલો મુજબ, યશને આ ફિલ્મ માટે અંદાજે ₹50 કરોડ ફી આપવામાં આવી છે.
કિયારા અડવાણીની ફીમાં મોટો ઉછાળો
રિપોર્ટ્સ અનુસાર, ફિલ્મમાં કિયારા અડવાણી ફીમેલ લીડ રોલમાં છે. તે ફિલ્મમાં 'નાચિયા' નું પાત્ર ભજવી રહી છે. કિયારાએ પોતે જણાવ્યું છે કે આ તેના કરિયરના સૌથી મુશ્કેલ રોલ્સમાંનો એક છે. અહેવાલો મુજબ, કિયારાએ પોતાની ફીમાં લગભગ 114 ટકાનો વધારો કર્યો છે અને તેને ₹15 કરોડ મળ્યા છે. આ ફી સાઉથની સુપરસ્ટાર નયનતારા કરતા પણ વધારે હોવાનું કહેવાય છે.
નયનતારાનો દમદાર અવતાર
ફિલ્મમાં નયનતારા પણ એક મહત્ત્વની ભૂમિકામાં જોવા મળશે. સાઉથની આ લેડી સુપરસ્ટાર યશની ફિલ્મમાં 'ગંગા' નામનું પાત્ર ભજવી રહી છે. તેના પહેલા લુકમાં તે શૉટગન પકડેલી અત્યંત શક્તિશાળી અવતારમાં જોવા મળી હતી. ડાયરેક્ટર ગીતૂ મોહનદાસના જણાવ્યા અનુસાર, આ ફિલ્મમાં નયનતારા એક તદ્દન નવા રૂપમાં જોવા મળશે. રિપોર્ટ્સ મુજબ, તેને ₹12 થી ₹18 કરોડની ફી મળી છે.
અન્ય કલાકારોની ફી અને પાત્રો
રુક્મિણી વસંત: તે ફિલ્મમાં 'મેલિસા' ના રોલમાં જોવા મળશે. તેનું પાત્ર સ્ટાઇલિશ હોવાની સાથે મજબૂત પણ છે. તેને અંદાજે ₹3 થી ₹5 કરોડ ફી આપવામાં આવી હોવાનું કહેવાય છે.
હુમા કુરેશી: હુમા ફિલ્મમાં 'એલિઝાબેથ' ના પાત્રમાં દેખાશે. તેનો લુક રહસ્યમય અને ડરામણો છે. અહેવાલો મુજબ, હુમાને આ ફિલ્મ માટે ₹2 થી ₹3 કરોડ મળ્યા છે.
તારા સુતારિયા: તેને ફિલ્મમાં 'રેબેકા' તરીકે રજૂ કરવામાં આવી છે. તેનું પાત્ર ગ્લેમરસ હોવાની સાથે જોખમી પણ છે. તારાને પણ આ ફિલ્મ માટે અંદાજે ₹2 થી ₹3 કરોડની ફી મળી છે.
આ કલાકારો ઉપરાંત ફિલ્મમાં સંયુક્તા મેનન, નવાઝુદ્દીન સિદ્દીકી, અક્ષય ઓબેરોય, સુદેવ નાયર, ટોવિનો થોમસ, ડેરેલ ડી'સિલ્વા, નતાલી બર્ન, બેનેડિક્ટ ગેરેટ અને કાયલ પોલ પણ મહત્વની ભૂમિકામાં જોવા મળશે. આ ફિલ્મ દ્વારા યશ 4 વર્ષ પછી પડદા પર વાપસી કરી રહ્યો છે.
