VIDEO: "જાગો ઈન્ડિયા, તેમને મરવા ન દો..." સોનમ વાંગચૂકને લઈને વિશાલ દદલાનીએ વ્યક્ત કરી ચિંતા!
છેલ્લું અપડેટ : 16 Jul 2026
સોનમ વાંગચુક જંતર-મંતર પર અનિશ્ચિત મુદ્દતના અનશન પર બેઠા છે. વાંગચુકના સ્વાસ્થ્યને લઈને એક જનહિત અરજી (PIL) પણ દાખલ કરવામાં આવી છે, જેની સુનાવણી આજે હાથ ધરાશે. સોનમ વાંગચુકના અનશનને ૧૮ દિવસ પૂરા થઈ ચૂક્યા છે. હવે જનતાની સાથે-સાથે તેમને સેલિબ્રિટીઝનો પણ સપોર્ટ મળી રહ્યો છે. અનુરાગ કશ્યપ, સ્વરા ભાસ્કર, કુનિકા સદાનંદ, રાખી સાવંત, અભય દેઓલ અને નસીરુદ્દીન શાહ જેવા તસામ સિતારાઓ તેમનું સમર્થન કરી રહ્યા છે.
હવે મ્યુઝિક કમ્પોઝર અને સિંગર વિશાલ દદલાનીએ સોનમ વાંગચુકના સપોર્ટમાં એક વીડિયો શેર કર્યો છે. આવો જોઈએ કે તેમણે વાંગચુકના આંદોલન અંગે શું કહ્યું.
વાંગચુકના સપોર્ટમાં વિશાલ દદલાની
વિશાલ દદલાનીએ વીડિયોમાં જણાવ્યું કે, "હું આ વીડિયો એ તમામ લોકો માટે બનાવી રહ્યો છું, જેઓ અત્યારે આપણા દેશ માટે જંતર-મંતર પર લડી રહ્યા છે. હું માફી માંગું છું કે અત્યારે હું ત્યાં તમારી સાથે નથી, કારણ કે હું યુએસ (US) ટૂર પર છું. પરંતુ મારું દિલ ત્યાં જ છે અને તમે એ જાણો છો. પ્લીઝ સોનમ વાંગચુક જીને આ વીડિયો જરૂર બતાવજો. તેમને કહેજો કે હું તેમની માફી માંગું છું કે હું ત્યાં તેમની સાથે હાજર રહી શક્યો નથી. જો હું ઇન્ડિયામાં હોત, તો ચોક્કસ ત્યાં જ હોત."
વિશાલ દદલાનીએ આગળ કહ્યું કે, "તમે ખૂબ જ સારી બાબતો માટે લડત ચલાવી રહ્યા છો. મારી બસ એક જ ઈચ્છા છે કે તેમને કંઈ ન થાય. હું તેમને વિનંતી કરું છું કે તમે અનશન તોડી દો. હું સરકારને પણ વિનંતી કરું છું કે તેમની વાત સાંભળે. આમાં કોઈ હક બહારની વાત નથી કરી રહ્યું. આ કોઈ સત્તા પરિવર્તનની લડાઈ નથી. આ વાત આપણા દેશના વિદ્યાર્થીઓની છે, તેમના ભવિષ્યની છે અને આપણા દેશના ભવિષ્યની છે. હું સરકારને કહીશ કે તેઓ લોકોનો અવાજ સાંભળે."
વિશાલ દદલાનીએ વીડિયોના કેપ્શનમાં લખ્યું કે, "જાગો ઇન્ડિયા. સોનમ વાંગચુકને મરવા ન દો. તેઓ આપણા અને આપણા બાળકો માટે ભૂખ હડતાળ પર બેઠા છે. તેઓ દેશના ભવિષ્ય માટે લડી રહ્યા છે."
હવે જોવાનું એ રહેશે કે સેલિબ્રિટીઝ અને સામાન્ય જનતાના આટલા મોટા સપોર્ટ બાદ વાંગચુકની આ લડાઈ ક્યારે અને કયા મોડ પર જઈને પૂરી થાય છે.
